قۇرىلتايدىڭ ەستافەتاسىن ءار اۋدان كەزەكپەن قابىلدايدى ەكەن. بۇل جولى بەرديۋجە اۋدانىنىڭ اكىمشىلىگى مەن وسىندا جۇمىس جاسايتىن قازاق دياسپورا وكىلدىگى قۇشاق جايا قارسى الىپ, ەرەكشە قوناقجايلىلىق تانىتتى. القالى باسقوسۋدا سويلەگەن چەشەندەر تۇمەننىڭ تورقالى توپىراعىندا وسىمەن 21-ءشى رەت ءوتىپ وتىرعان قۇرىلتايدىڭ ەل مەن ەلدى بايلانىستىراتىن, حالىق پەن حالىقتى جاقىنداستىراتىن, جاس بۋىندى انا ءتىلى مەن ۇلتتىق سالت-داستۇرلەرىن, ادەت-عۇرىپتارىن ۇمىتپاۋعا, تانىپ-بىلۋگە ۇمتىلدىراتىن يگى شارا ەكەنىن اتاپ كورسەتتى. تۇمەن وبلىستىق قازاق ۇلتتىق-مادەني اۆتونومياسىنىڭ توراعاسى ەسىمحان جانتاسوۆتىڭ جالىندى سوزدەرى جينالعانداردى سۇتتەي ۇيىتتى.
– جات جەردە جۇرسەك تە, ەش كەمدىك كورىپ وتىرعان جوقپىز. قازاقستاننىڭ, ەلباسى نۇرسۇلتان نازارباەۆتىڭ شەتتە جۇرگەن اعايىندارعا جاساپ وتىرعان جان-جاقتى قامقورلىعىنا شەكسىز ريزامىز. بۇرىن جاستارىمىز انا تىلىندە سويلەۋگە ۇيالاتىن. قازىرگى تالاپتارى زور. ءبىز ءوز تاراپىمىزدان ءتۇرلى بايقاۋلار, كونكۋرستار وتكىزىپ, قال-قادىرىمىزشە مۇرىندىق بولىپ كەلەمىز, – دەدى ول.
تەرىسكەيلىك دەلەگاتسيانى باستاپ بارعان وبلىستىق اسسامبلەيانىڭ حاتشىلىق مەڭگەرۋشىسى نايل ساليموۆ ەكى ءوڭىردى شەكارا ءبولىپ تۇرعانىمەن, مادەني-رۋحاني تۇتاستىق تەرەڭدە جاتقانىن, قاي سالادا بولماسىن بەرىك ىنتىماق ورناعانىن ايتا كەلىپ, ايماق باسشىسى قۇمار اقساقالوۆ بەرىپ جىبەرگەن ارنايى سىيلىقتى سالتاناتتى تۇردە تابىس ەتتى.
وسىندا «رەگيون تيۋمەن» تەلەارناسىنىڭ اعا رەداكتورى الەكساندر ليششەنكومەن تانىستىق. سويتسە, ول قازاقستاندا دۇنيەگە كەلىپتى. قازاق ەلى جايلى ايتقان جىلى سوزدەرى جانىمىزعا مايداي جاعىپ, باردىڭ قادىرىن بىلمەي, پارقىنا جەتپەي جۇرگەن جەرلەستەرىمدى ەسكە الدىم. ساشا كىشكەنتاي كەزىنەن ابايدىڭ ولەڭدەرىن جاتتاپ, قۇرمانعازىنىڭ كۇيلەرىن تىڭداپ ءوسىپتى. بالالىق شاعى مۇنارتىپ قالعان ورتاسىن, ق ۇلىن-تايداي تەبىسىپ وسكەن دوستارىن ساعىنعانى بىردەن ايتويلاپ تۇردى. بىردە-ءبىر قۇرىلتايدان شەت قالماپتى.
تۇمەن تورىندەگى قازاق تويىنىڭ اجارىن بالۋانداردىڭ كۇرەسى, الامان بايگە, ءداستۇرلى اندەر بايقاۋى, قىز سىنى ودان ءارى اشا ءتۇستى.
جىراقتا جۇرسە دە, جۇرەگى اتامەكەن دەپ سوعاتىن, تىلەگى دە, تىلەۋى دە ورتاق اعايىندارىمىزدىڭ تۇرمىس-تىرشىلىگىنە قانىعىپ قايتتىق.
ساعىندىق ماۋعازين,
جۋرناليست
سولتۇستىك قازاقستان وبلىسى
