بiلiم جانە عىلىم مينيسترلiگi بالالاردىڭ قۇقىن قورعاۋ كوميتەتi ادەتتە جاڭا وقۋ جىلىنىڭ باستالۋىنا بiر اي قالعاندا «مەكتەپكە جول» جالپىرەسپۋبليكالىق قايىرىمدىلىق اكتسياسىن وتكiزەدi. بيىلعى اكتسيا 1 تامىزدان 30 قىركۇيەككە دەيىن «مەنiڭ تاڭداۋىم – بالالارعا كومەك كورسەتۋ!» ۇرانىمەن وتەدi. ەكى اي بويى جۇرگىزىلەتىن اۋقىمدى شارانىڭ ماقساتى – الەۋمەتتىك جاعدايى تومەن وتباسىلار مەن قاراۋسىز قالعان بالالاردى مەكتەپكە دايىنداپ, قاجەتتى قۇرال-جابدىقتارىن الىپ بەرۋ.
ورتالىق كوممۋنيكاتسيالار قىزمەتىندە وتكەن بريفينگتە ءبىلىم جانە عىلىم مينيسترلىگى بالالاردىڭ قۇقىن قورعاۋ كوميتەتى توراعاسىنىڭ ورىنباسارى مانشۇك ابدىكارىم جىلدان جىلعا اكتسيانىڭ اۋقىمى كەڭەيىپ, تۇراقتى دەمەۋشىلەر مەن مەتسەناتتاردىڭ قاتارى ارتقانىن جەتكىزدى. بىلتىر 320 مىڭ بالاعا جالپى سوماسى 2 ملرد 468 ملن تەڭگەنىڭ كومەگى كورسەتىلىپتى. كومەككە مۇقتاج بالالارعا كومەكتەسۋ جاعىنان جامبىل, قاراعاندى, قىزىلوردا, اقتوبە وبلىستارى كوش باستاعان. بۇل وڭiرلەردە 30 مىڭنان استام بالا «مەكتەپكە جول» اكتسياسىنا قاتىسىپ, مەكتەپكە قاجەتتى كەرەك-جاراقتارمەن قامتاماسىز ەتىلىپتى. ال اكتسيا اياسىندا قارجى تارتۋ جاعىنان الماتى, قاراعاندى, جامبىل, وڭتۇستiك قازاقستان وبلىستارى الدىڭعى لەكتەن كورىنگەن. ءار ءوڭىر شامامەن 500 ملن تەڭگەدەن استام قاراجات تارتىپ, كومەككە ءزارۋ جەتكىنشەكتەرگە مەكتەپ قۇرالدارىن الىپ بەرگەن.
مانشۇك ابدىكارىمنىڭ ايتۋىنشا, بيىلعى اكتسيا بارىسىندا وقۋشىلاردىڭ جاپپاي مەكتەپكە بارۋىنا ايرىقشا كوڭىل بولىنبەك. بىلتىر كورىنگەن جەردە تۇنەپ, قاراۋسىز قالعان 280 بالا انىقتالعان ەكەن. بيىل وسىنداي الەۋمەتتىك سەبەپكە بايلانىستى ساباقتان قالۋ جاعدايلارىن بولدىرماۋ ءۇشىن رەيدتىك شارالار ۇيىمداستىرىلاتىن بولادى. ءتيىستى ماماندار پاتەرلەردى, ساياجايلاردى ارالاپ, اتا-اناسىنىڭ باقىلاۋىنسىز قالعان بالالاردى ىزدەستىرەدى.
البەتتە, بالالاردىڭ قۋانىشى – قۋانىشتاردىڭ تورەسى. جاعدايى تومەن وتباسىلاردىڭ بالالارىنا كومەكتەسىپ, ساۋاپ العانعا نە جەتسىن؟! بىراق جىلت ەتكەن جاقسىلىعىن جۇرتقا جاريالاپ, سونىڭ ەسەبىنەن وزىنە جارناما جاساعىسى كەلىپ تۇراتىن ادامدار دا جوق ەمەس. بىلتىر وسى اكتسيا اياسىنداعى قايىرىمدىلىعىن جاريالى تۇردە جاسايمىن دەپ, بالالار مەن اتا-انالاردىڭ نامىسىنا ءتيىپ كەتكەن وقيعالار بولعانى ەسىمىزدە. وسىدان ساباق العان مينيسترلىك وكىلدەرى ەندى قايىرىمدىلىق كومەك ەشقانداي سالتاناتتى تۇردە نەمەسە مەكتەپتەگى ساپ تۇزەۋدە تاپسىرىلماۋ جونىندە وڭىرلەرگە نۇسقاۋ حات جولداپتى.
نەگىزى, «مەكتەپكە جول» اكتسياسىنا كەز كەلگەن جاعدايى جوق وتباسىلار قاتىسىپ, كومەك الا الادى. ول ءۇشىن 8-7172-74-25-28 ءنومىرلى جەدەل جەلىگە حابارلاسۋى كەرەك. ال الەۋمەتتىك احۋالى تومەن وتباسىلارعا كومەكتەسەمىن دەگەن اق نيەتتى ازاماتتار بولسا, 8-7172-74-21-40 تەلەفونىنا حابارلاسىپ, قول ۇشىن بەرۋگە بولادى.
بريفينگتە ەلىمىزدەگى مەكتەپتەردىڭ جاڭا وقۋ جىلىنا دايىندىق بارىسى, مەكتەبى جوق اۋىلدىڭ بالالارىن ورتالىقتارعا تاسىمالداۋ ماسەلەسى دە ايتىلدى. مينيسترلىكتىڭ مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى زەينەپ ماقسۇتوۆانىڭ مالىمەتىنشە, رەسپۋبليكا بويىنشا بيىل 369 مىڭ بالا ءبىرىنشى سىنىپقا بارادى دەپ جوسپارلانۋدا. جاڭا وقۋ جىلىنا مەكتەپتەردىڭ ماتەريالدىق-تەحنيكالىق بازاسى دا, كادرلار قۇرامى دا دايىن. بۇگىندە بارلىعى 325 مىڭ پەداگوگ بولسا, 1 قىركۇيەكتە 10 مىڭعا جۋىق جاس مامان مەكتەپتەرگە جۇمىسقا قابىلدانباق.
جالپى, بيىلعى 27 شىلدەدەگى كورسەتكىش بويىنشا, 46 مەكتەپ جابىلسا, ەسەسىنە 16 جالپى ءبىلىم بەرەتىن مەكەمە اشىلعان. جاڭا وقۋ جىلىندا ەلىمىز بويىنشا 75 جاڭا مەكتەپ ىسكە قوسىلادى دەپ كۇتىلۋدە.
بۇگىندە 22 مىڭ 278 وقۋشى اۆتوبۋسپەن مەكتەپكە تاسىمالدانادى. وسى ماقساتتا 768 اۆتوبۋس دايىن تۇر ەكەن. ونىڭ 42 پايىزى سوڭعى بەس جىلدا جاڭارتىلسا, بىلتىر 23 جاڭا اۆتوبۋس ساتىپ الىنىپتى.
قىمبات توقتامۇرات,
«ەگەمەن قازاقستان»
