ورتاق كوزقاراس تانىتىلدى

بۇگىن استانادا مەملەكەت باسشىسى نۇرسۇلتان نازار­باەۆ­تىڭ, مەملەكەتتىك حاتشى قانات ساۋداباەۆتىڭ جانە سىرتقى ىستەر ءمينيسترى ەرجان قازىحانوۆتىڭ قاتىسۋىمەن استاناداعى تاۋەلسىزدىك سارايىندا يادروسىز الەم حالىقارالىق فورۋمى باستالادى. وسىعان وراي كەشە ەلىمىز سىرتقى ىستەر ءمينيسترى بىرقاتار شەتەلدىك دەلەگاتسيا وكىلدەرىمەن كەزدەستى. جالپى, اتالعان فورۋمعا 200-گە تارتا قوناق شاقىرىلسا, ولار­دىڭ ىشىندە قازاقستاندا تىركەلگەن ديپلوماتيالىق كورپۋس, قارۋ­سىزدانۋ جانە تاراتپاۋ سالا­سىن­داعى حالىقارالىق جانە وتاندىق ۇەۇ, ساراپشىلىق قاۋىمداس­تى­عى, اكادەميالىق توپ, الەم ەلدەرى پارلامەنتتەرى مەن ۇكىمەتتەرىنىڭ حالىقارالىق ساياساتتاعى بەلدى ارداگەرلەرى, نەگىزگى يادرولىق قا­رۋسىزدانۋ سالاسىندا ءوزىن تانى­تىپ كەلە جاتقان ەلدەردىڭ ساياسي تۇلعالارى مەن حالىقارالىق ۇي­ىمداردىڭ وكىلدەرى بار. سولاردىڭ ءبىرى وڭتۇستىك افريكا رەسپۋبليكاسىنىڭ بۇرىنعى پرەزيدەنتى, نوبەل سىيلىعىنىڭ لاۋرەاتى فرەدەريك دە كلەرك ەلىمىز سىرتقى ساياسات ۆەدوم­ستۆو­سى­نىڭ باسشىسىمەن جارتى ساعاتتان استام سويلەستى. ول بۇقارالىق اق­پارات قۇرالدارى وكىلدەرىنە بەرگەن بريفينگتە وار-دىڭ قازاق­ستان سياقتى يادرولىق قارۋدان باس تارتقان ەل ەكەندىگىن ايتا كەلىپ, بۇل ونىڭ پرەزيدەنت بولىپ تۇر­عان كەزىندە جۇزەگە اسىرىل­عان­دى­عىن كولدەنەڭ تارتتى. قازاق­ستان­دا وتەتىن فورۋم ماڭىزدى بولىپ سانالادى, سوندىقتان القالى وتىرىس سوڭىنان ارنايى قۇجات قابىلدانۋى ءتيىس, دەدى نوبەل لاۋرەاتى. جاپونياداعى فۋكۋسيما-1 اتوم ەلەكتر ستانساسىنداعى جارىلىسقا قاتىستى ويىن بىلدىرگەن فرەدەريك دە كلەرك ونىڭ يادرولىق قارۋعا قارسىلارعا ۇلكەن كۇش بەرگەندىگىن جەتكىزدى. جا­ھان­دىق اۋا رايىنىڭ جىلىنۋى جاع­دايىندا يادرولىق قارۋدى پايدا­لانۋدى دۇرىس سانامايتىندىعىن ورتاعا سالعان ول يادرولىق وتىندى بەيبىت ماقساتقا پايدالانۋعا قارسى ەمەس ەكەندىگىن اتادى. سونداي-اق كەشە سىرتقى ىستەر ءمينيسترى ەرجان قازىحانوۆتىڭ ەۋروپا كەڭەسىنىڭ باس حاتشىسى تۋر­بورن ياگلاندپەن كەزدەسۋى بولدى. قازاقستان – زاڭداردىڭ ءۇس­تەمدىگى مەن ادام قۇقىنىڭ دە­موكراتيالىق ستاندارتتار مەن پرينتسيپتەرىنە نەگىزدەلگەن, ءتيىمدى باسقارۋدى جىلجىتۋعا قاتىس­تى جارتىلاي كەلىسىمدەر مەن ءبىر­قاتار قۇقىقتىق قۇجاتتارعا قا­تىسا وتىرىپ, ەۋروپا كەڭەسىمەن بايلانىستاردى تەرەڭدەتۋگە ءمۇد­دەلىلىك تانىتىپ كەلە جاتقان ەل. سوندىقتان دا قازاقستاندىق مينيستر ت.ياگلاندقا ەلىمىزدىڭ ۆەنەتسيا كوميسسياسىنا تولىققاندى مۇشەلىگىنە تاپسىرىستى تابىستا­دى. وسى رەتتە دەموكراتياعا قۇ­قىق ارقىلى ەۋروپالىق كوميس­سيا­سى نەمەسە قالا اتىمەن اتا­لىپ كەتكەن ۆەنەتسيا كوميسسياسى ەۋروپا كەڭەسىنە 18 مۇشە مەم­لەكەتتىڭ جارتىلاي كەلىسىمى بوي­ىنشا 1990 جىلى قۇرىل­عان­دى­عىن ايتا كەتۋ كەرەك. ال 2002 جىل­دىڭ اقپانىندا كوميسسيا كەڭەيتىلگەن كەلىسىمگە اينالىپ, وعان ەۋروپالىق ەمەس مەملەكەتتەر دە كىرە باستادى. سىرتقى ىستەر ءمينيسترى ەرجان قازىحانوۆ پەن ەۋروپا كەڭەسىنىڭ باس حاتشىسى تۋربورن ياگلاند بىرلەسكەن مالىمدەمە جاسادى. سىرتقى ىستەر ءمينيسترى مەن باس حاتشى قازاقستاننىڭ كونۆەن­تسيا­لارعا قوسىلۋىن قامتاماسىز ەتۋ ماقساتىندا ىنتىماقتاستىق­تى جانداندىرۋعا دايىن ەكەندەرىن ءبىلدىردى. پارلامەنتتىك ىنتى­ماقتاستىق ماڭىزدى سالا بولىپ تابىلادى. سىبايلاس جەمقورلىق­قا قارسى كۇرەس, بالالار قۇقىق­تارىن قورعاۋ, مادەني ىنتى­ماق­تاستىققا, ەتنوسارالىق جانە مادەنيەتارالىق ۇنقاتىسۋعا ەرەك­شە كوڭىل بولىنگەن. سونداي-اق, تاراپتار قازاقستاننىڭ ەۋروپا كەڭەسىنىڭ ءتيىستى جەكەلەگەن كەلىسىمدەرىنە قوسىلۋىنىڭ تيىمدىلىگىنە ەرەكشە دەن قويدى. قازاق­ستاننىڭ ءبىلىم, مادەنيەت, جاستار جانە سپورت سالالارىنداعى ەۋرو­پالىق مادەني كونۆەنتسياعا قاتى­سۋىنا نەگىزدەلگەن ىنتىماق­تاس­تىق ءۇشىن الەۋەتتى زەردەلەۋگە كەلىسىم بەرىلدى. بۇل باعىتتاعى ىنتىماقتاستىق ءساتتى باستاماعا يە جانە ەكى تاراپ تا ونىڭ ىلگەرىلەۋىنە ءۇمىت ارتادى. اسقار تۇراپباي ۇلى.