4 تامىزعا دەيىن جالعاساتىن بقو كۇندەرى اياسىندا قابانباي باتىر داڭعىلى بويىنداعى ەتنواۋىلدا وبلىستىق تاريحي-ولكەتانۋ مۋزەيى كەلۋشىلەردى ءوز ەكسپوناتتارىمەن تانىستىرسا, وبلىستىق حالىق شىعارماشىلىعى ورتالىعى «ەكسپو-2017 - الەم كورمەسىنە ساياحات» اتتى ساندىك قولدانبالى قولونەر شەبەرلەرى مەن اق جايىق ءوڭىرى سۋرەتشىلەرىنىڭ كورمەسىن ۇيىمداستىردى.
باتىسقازاقستاندىق جۋرناليست نۇرتاي تەكەباەۆ مالىم ەتكەنىندەي, مۋزەي جادىگەرلەرى قويىلعان كيىز ۇيلەردىڭ ىشىندە «التىن حانشايىم» ەكسپوزيتسياسى, قۇرمانعازى دومبىراسىنىڭ كوشىرمەسى, ءا. قاستەەۆتىڭ 1941 جىلى سالعان «تولەگەن مەن قىز جىبەكتىڭ كەزدەسۋى» اتتى كارتيناسى, جاڭگىر حان ءمۋنديرىنىڭ, ونىڭ جارى فاتيما حانىمنىڭ سالتاناتتى كەشتە كيەتىن كويلەگىنىڭ كوشىرمەلەرى, بوكەي ورداسى تاريحي-مۋزەي كەشەنىنىڭ ۇلگىسىن كورۋگە بولادى. سونىمەن قاتار مۋزەي قورىنان الىنعان وبلىس اۋماعىنداعى لەبەدەۆكا, قىرىقوبا قورعاندارىنان تابىلعان ارحەولوگيالىق قازبا ماتەريالدارى, التىن جاپسىرمالار, ات ابزەلدەرى, زەرگەرلىك بۇيىمداردىڭ مول جيىنتىعى, ءوڭىر تاريحىنا قاتىستى قۇندى قۇجاتتار بار. 400-گە جۋىق مۋزەي جادىگەرى كەلۋشىلەردىڭ نازارىنا ۇسىنىلدى.
وبلىستىق حالىق شىعارماشىلىعى ورتالىعىنىڭ مامانى باتىرحان قايىروۆتىڭ سوزىنە قاراعاندا, ەتنواۋىلداعى كورمەگە باتىس قازاقستان وبلىسىنان كەلگەن 21 قولونەر شەبەرى قاتىسۋدا. كورمە بارىسىندا نۇربول ءامىرجانوۆ كەراميكادان ىدىس جاساۋدان شەبەرلىك ساعاتىن كورسەتتى. شىڭعىرلاۋ اۋدانىنداعى «مارفۋعا» تىگىن تسەحىنىڭ يەسى اسەل سۇلتانعاليەۆا قىز جاساۋىنا قاتىستى ونىمدەردى الا كەلىپتى. اقجايىق اۋدانىنىڭ تۇرعىنى ەرلان بەكتەنوۆتىڭ زەرگەرلىك بۇيىمدارى رەسپۋبليكا كولەمىنە كەڭىنەن تانىمال. ورال قالاسىنداعى «Women Art ديزاين» كومپانياسى ۇلتتىق بۇيىمدار گالەرەياسىن جابدىقتاعان. شىعارماشىلىق توپتىڭ قۇرامىندا قازاقستان ديزاينەرلەرى وداعىنىڭ مۇشەلەرى رايسا الەكسەەۆا, مارينا ەرمەكقاليەۆا, ناتاليا بريكس بار. 2012 جىلى سەۋل قالاسىندا وتكەن حالىقارالىق سامميتتە ەلباسىمىز «Women Art ديزاين» دايىنداعان تۇماردى سول كەزدەگى اقش پرەزيدەنتى باراك وباماعا سىيعا تارتقان. ورالدىق «تەكەمەت» جەكە سەرىكتەستەسىگى دە اتالعان كومپانيا سەكىلدى شەتەلدەردە كورمەلەر ۇيىمداستىرىپ ۇلگەرگەن. ءبىر ايتا كەتەتىن جايت, كورمەگە قاتىسىپ جاتقان كاسىپكەرلەر ءوز بۇيىمدارىن ساتتىققا قويا الادى.
ەتنواۋىلدا قوستاناي وبلىسىنىڭ قولونەر شەبەرلەرى دە بار. ولار باتىسقازاقستاندىق توپپەن شىعارماشىلىق بايلانىس جاساۋدا.
ايتا كەتەيىك, «ەكسپو-2017» حالىقارالىق كورمەسى اياسىندا استانادا بقو-نىڭ مادەنيەت كۇندەرىن وتكىزۋگە 111,8 ملن تەڭگە بولىنگەن. وبلىستىڭ مادەنيەت جانە ونەر ۇجىمدارى ەلوردادا 10 كونتسەرتتىك باعدارلاما مەن 8 سپەكتاكلدى كورەرمەندەر نازارىنا ۇسىنادى. سونىمەن قاتار «قازانات» يپپودرومىندا 3-4 تامىز كۇندەرى كوكپار, تەڭگە ءىلۋ, اۋدارىسپاق, جامبى اتۋ جانە قىز قۋدان ۇلتتىق سپورت ويىندارى ۇيىمداستىرىلماق. بقو كۇندەرى 4 تامىز كۇنى «ەكسپو-2017» الاڭىنداعى امفيتەاتردا ونەر ۇجىمدارىنىڭ گالا-كونتسەرتىمەن تامامدالماق.
