برازيليالىق شابۋىلشى ماۋسىم الدىنداعى تۋرلاردان كەيىن "بارسەلونامەن" بىرگە يسپانياعا ورالماعان.
وسىعان دەيىن پسج باسشىسى ناسسەر ءال حەلايفي وسى ترانسفەر ءۇشىن كەلىسىمشارتتا كورسەتىلگەن 220 ملن ەۋرونى تولەۋگە دايىن ەكەنىن مالىمدەگەن بولاتىن. ال ويىنشىنىڭ پاريجدىك ۇجىمعا اۋىسقانى ءۇشىن 50 ملن ەۋرو, ال ونىڭ اكەسى ءارى اگەنتى 36 ملن ەۋرو كولەمىندە سىياقى الماق.
سونىمەن قاتار, نەيمار 2022 جىلى قاتاردا وتەتىن الەم چەمپيوناتىنىڭ ەلشىسى اتانۋى مۇمكىن.
ايتا كەتەيىك, نەيماردى كاتالونيالىق كوماندا 2013 جىلدىڭ جازىندا برازيليالىق "سانتوستان" رەسمي تۇردە 57 ملن ەۋروعا ساتىپ العان. الايدا كلۋبتى دا, ويىنشىنى دا يسپانيا مەن برازيليانىڭ ارنايى مەكەمەلەرى سالىق تولەۋدەن جالتاردى دەپ ايىپتاپ, ءتۇرلى كولەمدە ايىپپۇل سالعان بولاتىن. تاعى ءبىر ايتا كەتەرلىگى وسى ترانسفەردەن "سانتوسقا" رەسمي تۇردە 17 ملن ەۋرو عانا تۇسكەن. ال قالعان قارجى نەيمارعا يەلىك ەتەتىن كومپانياعا اۋدارىلدى.
ەگەر الداعى ۋاقىتتا نەيمار رەسمي تۇردە پاريجدىك ۇجىمعا اۋىسار بولسا, قارجىلىق فەير پلەي زاڭىن بۇزۋى ابدەن مۇمكىن. ال ەگەر وسى جايت تىركەلگەن بولسا, ۋەفا باسشىلىعى پسج-نى چەمپيوندار ليگاسى مەن ەۋروپا ليگاسىنا قاتىسۋىنا شەكتەۋ قويىپ, جاڭا ترانسفەرلەر جاساۋىنا تىيىم سالۋى مۇمكىن.
ول "بارسەلونا" ساپىندا بۇگىنگە دەيىن بارلىعى 186 رەسمي ويىنعا قاتىسىپ, 106 گولدىڭ اۆتورى اتاندى.
