«وسكەمەنىم, قاشان سەنەن قازاقى وت كورەمىن» دەپ جىرلاپ ەدى دۇنيەدەن جارىق جۇلدىزداي جارق ەتىپ اعىپ وتكەن اقىن, رەجيسسەر رۇستەم ەسداۋلەتوۆ. وسكەمەن ونەرىنىڭ تاسىن ورگە دومالاتۋعا ولشەۋسىز ۇلەس قوسقان دارىندى جاستىڭ ارمانى ەندى ورىندالا باستاعان سەكىلدى. جاقىندا ءوندىرىستى شاھاردىڭ كورنەكتى جەرلەرىنە الاشتىڭ ارداقتىلارى, ۇلت ۇستازدارى ءاليحان بوكەيحان, احمەت بايتۇرسىن ۇلى, مىرجاقىپ دۋلاتوۆتىڭ كوشەلى سوزدەرىنىڭ ءىلىنۋى سوزىمىزگە دالەل. سانالى عۇمىرىن ءميللاتىنىڭ مۇددەسىنە ارناعان تۇلعالاردىڭ «ۇلتىنا, جۇرتىنا قىزمەت ەتۋ – بىلىمنەن ەمەس, مىنەزدەن», «جۇرت ءادىل بولماي, جۇرت ءىسى وڭعا باسپايدى» ء(اليحان بوكەيحان), «بالام دەيتىن جۇرت بولماسا – جۇرتىم دەيتىن بالا قايدان شىقسىن», «ادامعا ەڭ قىمبات نارسە – جۇرت قامى, جۇرت ءىسى» (احمەت بايتۇرسىن ۇلى) دەگەن سەكىلدى ساليقالى سوزدەرى قالا كوشەلەرىنىڭ اجارىن اشىپ, كوركىن كىرگىزە تۇسكەندەي.
وسكەمەن قالالىق ىشكى ساياسات ءبولىمىنىڭ قىزمەتكەرى الىبەك تۇرسىمبەتوۆ كەسكەكتى ءداۋىردىڭ كەسەك قايراتكەرلەرىنىڭ قاناتتى سوزدەرى «الاش» پارتياسىنىڭ 100 جىلدىعى مەن ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا كورسەتىلگەن مىندەتتەردى جۇزەگە اسىرۋ اياسىندا شاھاردىڭ قازاقستان, م.گوركي كوشەلەرى جانە ق.ساتپاەۆ, تاۋەلسىزدىك, اباي, جەڭىس داڭعىلدارى بويىنداعى 19 بيلبوردقا ورنالاستىرىلعانىن ايتادى. «الداعى ۋاقىتتا قالا كوشەلەرىنە شاكارىم قۇدايبەردى ۇلى, رايىمجان مارسەكوۆ, ءماننان تۇرعانباەۆ, بياحمەت سارسەنوۆ سىندى الاشتىڭ وزگە دە قايراتكەرلەرىنىڭ تاعىلىمدى سوزدەرىن ءىلۋدى جوسپارلاپ وتىرمىز. بۇدان بولەك ءوڭىر تاريحىنىڭ تەرەڭنەن تامىر تارتاتىنىن ايعاقتايتىن بەرەل, شىلىكتى قورعاندارى, جيدەباي سەكىلدى تاريحي ورىندار تۋرالى سىر شەرتەتىن قۇندى ماعلۇماتتاردى دا شاھاردىڭ كورنەكتى جەرلەرىنە ورنالاستىرماق ويدامىز», دەيدى ول.
ازامات قاسىم,
«ەگەمەن قازاقستان»
وسكەمەن
