مەملەكەت باسشىسى نۇرسۇلتان نازارباەۆ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا بىلىمگە ەرەكشە ماڭىز بەرگەن-ءدى. كاسىبي ءبىلىمدى دامىتۋ مىنە, وسى تالاپقا جاۋاپ بەرۋمەن قاتار, جاستاردىڭ بۇل ومىردەگى ءوز ورىندارىن تابۋىنا قولعابىس تا بولادى. بۇل رەتتە كوكشەتاۋ قالاسىندا ادامداردىڭ ءومىرىن ساقتاپ قالا الاتىن مامانداردى دايارلايتىن ەكى بىردەي نىساننىڭ قولدانىسقا بەرىلۋى شىنىمەن دە قۋانىشتى جايت. مۇندا دايىندالاتىندار توتەنشە جاعدايدا نە ىستەۋلەرى كەرەكتىگىن جاقسى مەڭگەرۋمەن قاتار, قورقىنىشتى جەڭۋدىڭ دە حاس شەبەرلەرى بولا الادى. مۇنداي ماشىقتى ەندى ولار ءورت-قۇتقارۋشىلاردى دايارلايتىن مانەج بەن اسكەري جەكپە-جەك ونەرىن زەرتتەيتىن عىلىمي-زەرتتەۋ ورتالىعى جانە قولدانبالى زەرتحانا ارقىلى جۇزەگە اسىراتىن بولادى.
اتالعان كەشەن كوپسالالى ازاماتتىق قورعانىس كوللەدجىندە ورنالاسقان. وقۋ ورنىنىڭ باسشىسى شوقان قاسىمنىڭ سوزىنە قاراعاندا, مەكەمە بازاسىندا 2009 جىلدان ء«ورت قاۋىپسىزدىگى» جانە «توتەنشە جاعدايلاردا قورعاۋ» سالالىق ماماندىقتار اشىلعان. وسىلايشا مامانداردىڭ ماشىقتارىن ۇشتاپ, كاسىبي دايارلىعىن بارىنشا ارتتىرۋ-
عا جاعداي جاسالعانىن ەرەكشە اتاپ كەتكەن ءجون.
ءورت-قۇتقارۋ مانەجىنىڭ قولدانىسقا بەرىلۋىمەن ەندى جاتتىعۋلاردى كۇن دەمەي, ءتۇن دەمەي, ءتىپتى, جىلدىڭ بارلىق مەزگىلىندە جۇرگىزە بەرۋگە مۇمكىندىك تۋىپ وتىر. ءتورت قاباتتى ءورت ءسوندىرۋ مۇناراسىندا ستۋدەنتتەر وزدەرىنىڭ بولاشاق قۇتقارۋشىلار رەتىندەگى ماشىعى مەن ەپتىلىگىن, ءتىپتى توزىمدىلىگىن بارىنشا شىڭدايتىن بولادى. سونداي-اق, اتالعان وقۋ ورنى حالىقارالىق ازاماتتىق قورعانىس ۇيىمىمەن بايلانىستى ەكەنىن ەسكەرسەك, ەندى كوللەدجدىڭ سپورتتىق مانەج بازاسىندا حالىقارالىق شارالاردى وتكىزۋگە دە مۇمكىندىك بار.
ال اسكەري جەكپە-جەك ونەرىن زەرتتەيتىن عىلىمي-زەرتتەۋ ورتالىعىنىڭ اشىلۋى سپورتشىلاردىڭ اسكەري جەكپە-جەك ونەرىنىڭ فيلوسوفياسىن, بيومەحانيكاسىن جانە فيزيولوگياسىن تەرەڭ ۇعىنۋعا مۇمكىندىك بەرەدى. سونىمەن بىرگە, دايارلىق بارىسى جاتتىعۋدا جاراقات الىپ قالۋعا, سونداي-اق, ادامداردىڭ دەنساۋلىعىنا نۇقسان كەلتىرىپ الۋدان قورعاۋعا سەپتەسەتىن بولادى. عزو جانىنداعى قولدانبالى زەرتحانا «دەنە شىنىقتىرۋ جانە سپورت» ماماندىعى بويىنشا وقىتىلىپ جاتقانداردىڭ الەۋەتىن ارتتىرۋعا وزىندىك ۇلەسىن قوساتىنى تۇسىنىكتى دە.
بۇعان قوسا, كوللەدج اۋلاسىندا زاماناۋي ءورت جانە اپاتتى-قۇتقارۋ تەحنيكالارىمەن جابدىقتالعان اپاتتى-قۇتقارۋ ءبولىمى دەپوسىنىڭ عيماراتى دا سالىنعان.
اسقار تۇراپباي ۇلى,
«ەگەمەن قازاقستان»
اقمولا وبلىسى
