الىپ شاھار الماتىنىڭ تۇبىندە تۇرىپ, ەل كورگەن كوگىلدىر وتىننىڭ قىزىعىن كورمەگەن بىردەن-ءبىر ايماق – جىر الىبى جامبىل اتىنداعى اۋدان بولاتىن. اۋدان ورتالىعى ۇزىناعاشقا گاز كەلگەن قۋانىشتى ول ساتتەر «كۇنى كەشەگە» اينالدى. بۇل يگىلىكتى ءىستىڭ باسىندا «تاۋەكەل گاز قۇبىرى» كومپانياسى تۇردى. اۋىل جانە اۋدان جۇرتشىلىعىنا عانا ەمەس, كۇللى وبلىس اۋماعىنا اتى جايىلعان سول مەكەمەنىڭ كەڭسەسىندە رۋحاني تانىمدىق كەزدەسۋ ءوتتى. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ «ەگەمەن قازاقستان» گازەتىندە جاريالانعان «بولاشاققا باعدار: رۋحاني جاڭعىرۋ» ماقالاسىنىڭ اياسىندا وتكەن شاراعا بايلانىستى ۇجىمعا ەسىمدەرى ەلگە تانىمال ازاماتتار ات باسىن ارنايى بۇرىپ كەلدى. قازاقتان شىققان تۇڭعىش وليمپيادا چەمپيونى جاقسىلىق ۇشكەمپىروۆ جۇزدەسۋدىڭ ماڭىزىن شىنايى تىلمەن بىلاي ءتۇسىندىردى.
– ەلباسى ماقالاسىندا «پراگماتيزم – ءوزىڭنىڭ ۇلتتىق جانە جەكە بايلىعىڭدى ناقتى ءبىلۋ, ونى ۇنەمدى پايدالانىپ, سوعان سايكەس بولاشاعىڭدى جوسپارلاپ الۋ, ىسىراپشىلدىق پەن استامشىلدىققا, داڭعويلىق پەن كەردەڭدىككە جول بەرمەۋ دەگەن ءسوز» دەپ اتاپ كورسەتتى ەمەس پە؟ «تاۋەكەل گاز قۇبىرى» مەكەمەسىنىڭ باسشىسى دانيار نۇرباەۆتى كوپتەن تانيتىندىقتان دا مەن ونى پرەزيدەنتىمىز جوعارىدا ايتقانداي, بۇگىنگى جاڭا قوعامنىڭ بولاشاققا نىق سەنىممەن قادام جاساعان ازاماتى دەپ بىلەمىن. ءبىزدىڭ بۇل كەزدەسۋىمىزدىڭ تۇپكى ءمانى دە وسىناۋ اتپال ازاماتتىڭ ابىرويىن اسقاقتاتۋ, مەرەيىن ءوسىرۋ. ەلىمىزدىڭ ەڭسەسىن كوتەرۋگە ۇلەس قوسقان دانيار مولديار ۇلىنداي سانالى ازاماتتارىمىز لايىم كوپ بولعاي, – دەگەن بۇگىنگى بەلگىلى كاسىپكەر مولديار نۇرباەۆتى «قازاقستاننىڭ 100 جاڭا ەسىمى» قاتارىنا قوسۋعا لايىق ازامات دەپ وي تۇيىندەدى. ايتپاقشى, اتاقتى سپورتشىنىڭ ءوزى دە وسى اۋداندا اۋىل شارۋاشىلىعى سالاسىندا كاسىپكەرلىكپەن اينالىسادى.
– جاقسىلىق اعامنىڭ ءسوزىن ساباقتايىن, – دەگەن جازۋ-
شى-كاسىپكەر, جامبىل اۋدانىنىڭ قۇرمەتتى ازاماتى ماناربەك ءىزباسار بىلاي دەدى: – از عانا ۋاقىت ىشىندە اۋدان حالقىن كوگىلدىر وتىنمەن قامتاماسىز ەتكەن دانيار نۇرباەۆتى قازىرگى زامانىمىزدىڭ قاھارمانى دەپ ايتامىز. مۇنىڭ سىرتىندا ول اۋدان بويىنشا الەۋمەتتىك قولداۋدى قاجەت ەتەتىن 400 وتباسىنا گاز قۇبىرىن تەگىن جۇرگىزىپ, وشاقتارىنا وت بەردى. بۇعان قالاي جانىڭ سۇيسىنبەيدى؟ قوس كاسىپكەردىڭ ءسوزىن وبلىستىڭ قۇرمەتتى ازاماتى, بەلگىلى قالامگەر كۇمىسجان بايجان قىزۋ قوستاپ, جامبىلدان باتا العان جىرشى-تەرمەشى ومىرزاق قارعاباەۆتىڭ ۇلى ءومىرتاي اقىن جىردان شاشۋ شاشتى.
ونەر ادامدارىنىڭ توقايلاسىپ ەلى ءۇشىن ەڭبەك ەتكەن ازاماتقا ەرەكشە ماداق ءبىلدىرۋى تەكتەن تەك ەمەس. ويتكەنى, بيزنەسمەن دانيار نۇرباەۆ اۋدان ومىرىندە ءوتىپ جاتاتىن قانداي دا ءبىر مادەني-ادەبي ءىس-شارالارعا قاتىسۋدان, وعان قولداۋ كورسەتۋدەن ەشۋاقىتتا تىس قالعان ەمەس. ونىڭ ءبىر مىسالى, كاسىپكەر جىگىت اتاقتى ءسۇيىنباي اقىننىڭ كەسەنەسى جانىنان اقىنعا تاعزىم ەتىپ كەلۋشىلەر ءۇشىن اياق سۋىتىپ, تىنىستايتىن جايلى عيمارات سالىپ بەردى. تىزبەلەسە ۇزىناعاشتىڭ بۇگىنگى اتىمتاي جومارتىنىڭ اۋىز تولتىرىپ ايتاتىنداي اتقارعان يگى ىستەرى شاش ەتەكتەن ەكەنى بايقالادى. ءوز كەزەگىندە ءسوز العان «تاۋەكەل گاز قۇبىرى» جشس باسشىسى دانيار نۇرباەۆ ۇجىمىنىڭ اتىنان ەل اعالارىنا – مەكەمەنىڭ بۇگىنگى قۇرمەتتى قوناقتارىنا ءىلتيپاتى ءۇشىن العىس ايتتى. حالىق ءۇشىن, ەلدىڭ بولاشاعى ءۇشىن ۇلتتىق مۇراتتار مەن قازاقستاندى بارلىق سالادا العا جىلجىتۋعا شامشىراق بولاتىن باستى باعدارعا ساي بولاشاقتا دا ەڭبەكتەرىن ەسەلەي بەرەتىندىكتەرىنە سەندىردى.
باستى باعدارلامادا اتاپ كورسەتىلگەندەي قوعامدىق سانانى تەك ساياسي جانە ەكونوميكالىق تۇرعىدان عانا ەمەس, رۋحاني جاعىنان دا جاڭعىرۋ قاجەت ەكەنى وسىناۋ جىلى جۇزدەسۋدە ەرەكشە كورىنىس تاپتى.
تالعات ءسۇيىنباي,
«ەگەمەن قازاقستان»
الماتى
سۋرەتتى تۇسىرگەن نۇرمانبەت قيزات ۇلى
