وڭتۇستىك امەريكانىڭ قاق ورتاسىندا ورنالاسقان بۇل مەملەكەت تىكەلەي تەڭىزگە شىعا المايدى. الايدا ەل اۋماعىنان وتەتىن پارانا وزەنىن ءوز پايداسىنا ۇتىمدى پايدالانۋدا. مۇندا الەمدە ۇلكەندىگى جاعىنان ەكىنشى ورىندا تۇرعان يتايپۋ سۋ ەلەكتر ستانساسى ورنالاسقان. ونىڭ وندىرىستىك قۋاتى – 14 مىڭ مەگاۆاتت. وعان قوسا ياكيرەتا جانە اكاراي سۋ ەلەكتر ستانسالارى بار. وسىنىڭ ارقاسىندا پاراگۆاي ەنەرگيانىڭ 99,6 پايىزىن جاڭعىرمالى قۋات كوزدەرىنەن الادى.
سالتاناتتى راسىمگە ارنايى كەلگەن مارتەبەلى مەيماندار ءسوز الىپ, كورمەنىڭ ءمان-ماڭىزىنا توقتالدى. «قازاقستان تاراپىنا حالىقارالىق ماڭىزدى شاراعا ءبىزدى شاقىرعانى ءۇشىن العىس ايتامىن. كورمەنىڭ تاقىرىبى دا ۇتىمدى تاڭدالعان. بۇگىنگى تاڭدا جاسىل ەنەرگياعا كوشۋ جاھان ءۇشىن جانە حالىقارالىق قاۋىمداستىق ءۇشىن وزەكتى ماسەلەنىڭ ءبىرى. ال ءبىزدىڭ ەلىمىز الەمدە بالامالى قۋات كوزىن ءوندىرۋ جانە ەكسپورتتاۋ بويىنشا كوش باسىنداعىلاردىڭ قاتارىندا. وتكەن جىلدىڭ سوڭىندا برازيليامەن اراداعى يتايپۋ سۋ ەلەكتر ستانساسى ساعاتىنا 100 ملن مەگاۆاتت قۋات وندىرگەنىن ماقتانىشپەن ايتامىن. بۇل – الەمدىك رەكورد», دەدى پاراگۆايدىڭ سىرتقى ىستەر ءمينيسترىنىڭ ورىنباسارى وسكار كابەلو سارۋببي.
