اڭگىمە بارىسىندا سەنات توراعاسىنىڭ ورىنباسارى س.گروموۆ استانا مەن پاريج ىنتىماقتاستىعىنىڭ جوعارى دەڭگەيىن جانە ونىڭ كوپتۇرپاتتى ەكەنىن اتاپ ءوتتى. «ديپلوماتيالىق قاتىناستار ورناعان 25 جىلدا بىرلەسكەن كۇش-جىگەردىڭ ارقاسىندا قازاقستان-فرانتسيا قاتىناستارى ستراتەگيالىق ارىپتەستىك دەڭگەيىنە كوتەرىلدى. ءبىزدىڭ فرانتسيامەن بەلسەندى ساياسي قاتىناستارىمىز ەكى ەلدىڭ ىسكەرلەر قاۋىمدارى اراسىندا قالىپتاسقان بەرىك ەكونوميكالىق بايلانىستارمەن نىعايا ءتۇستى», – دەپ اتاپ ءوتتى س.گروموۆ. قازاقستان مەن فرانتسيانىڭ پارلامەنتشىلەرىنىڭ پارلامەنتارالىق ۇنقاتىسۋلارى دا جۇزدەسۋشىلەردىڭ وڭ باعاسىنا يە بولدى.
كەزدەسۋ بارىسىندا قازاقستان ەكونوميكاسىن ءارتاراپتاندىرۋ جانە ءبىزدىڭ ەلىمىزدە عىلىمي الەۋەتى زور, جوعارى تەحنولوگيالىق جانە ەكسپورتقا باعدارلانعان وندىرىستەردى دامىتۋ جونىندەگى ءىرى جوبالاردى ىسكە اسىرۋعا فرانتسۋز بيزنەسىنىڭ اتسالىسۋىنا قاتىستى پىكىر الماسىلدى. س.گروموۆ فرانتسۋز بيزنەس قاۋىمداستىعىن ەكسپو-2017 حالىقارالىق كورمەسى نەگىزىندە اشىلاتىن بۇۇ اياسىنداعى جاسىل تەحنولوگيالار مەن ينۆەستيتسيالار ورتالىعىنىڭ, جاڭا تەحنولوگيالار پاركىنىڭ, استانا حالىقارالىق قارجى ورتالىعىنىڭ جۇمىسىنا قاتىسۋعا شاقىردى.
كەزدەسۋ سوڭىندا س.گروموۆ فرانتسۋز دەلەگاتسياسىن جىل باسىندا ءبىزدىڭ ەلىمىزدە جۇزەگە اسقان كونستيتۋتسيالىق رەفورمالار مەن پرەزيدەنت نۇرسۇلتان نازارباەۆتىڭ قازاقستاندى ودان ءارى جاڭعىرتۋ جونىندەگى «قازاقستان-2050» ستراتەگياسى مەن ۇلت جوسپارىندا كوزدەلگەن مىندەتتەر تۋرالى حاباردار ەتتى.
