قر ۇۇ «شىعىس» وڭىرلىك قولباسشىلىعىنىڭ ءباسپاسوز قىزمەتىنىڭ باستىعى باعدات امانگەلدىنىڭ حابارلاۋىنشا, وسكەمەندەگى «شىعىس» وڭىرلىك قولباسشىلىعىنا بيىلعى كوكتەمدە الماتى قالاسىنان, قىزىلوردا, پاۆلودار, جامبىل, اقمولا, قاراعاندى جانە وڭتۇستىك قازاقستان وبلىستارىنان شاقىرىلعان جانە جاس سارباز كۋرسىنان وتكەن 450 جاۋىنگەر كەلگەن. بۇگىن ولار وتانعا جانە حالىققا ارقاشان ادال بولۋعا انت ەتىپ, ۇلتتىق ۇلاننىڭ تولىققاندى جاۋىنگەرى اتاندى.
ايتا كەتەرلىگى, بيىلعى جىلى ۇلتتىق ۇلان قاتارىنا قوسىلعالى وتىرعان جاس ساربازدار ءۇشىن انت قابىلداۋ قازاقستان رەسپۋبليكاسى قارۋلى كۇشتەرىنىڭ جانە ۇلتتىق ۇلاننىڭ 25 جىلدىق مەرەيتويىمەن تۇسپا-تۇس كەلىپ وتىر.
سالتاناتتى شاراعا وسكەمەن قالاسىنىڭ اكىمى جانە دە وبلىستىق, قالالىق ءماجىلىس دەپۋتاتتارى, «نۇر وتان» حدپ فيليالىنىڭ باسشىلارى, ءدىني ۇيىم وكىلدەرى مەن ىشكى اسكەر ارداگەرلەرى, سونداي-اق ەلىمىزدىڭ ءار وڭىرىنەن كەلگەن ساربازداردىڭ تۋعان-تۋىستارى مەن وقۋشىلار قاتىستى. انت قابىلداۋ ءراسىمى بارىسىندا جاس ساربازداردىڭ ساپتىق دايىندىق جانە قويان-قولتىق ۇرىس ادىستەرى كورسەتىلدى.
«بۇگىن سەندەر قازاقستان مەملەكەتىنە جانە ونىڭ پرەزيدەنتىنە, اتا زاڭىنا ادال قىزمەت ەتۋگە سالتاناتتى تۇردە انت بەردىڭدەر! بەرگەن انتتارىڭا ادال بولىپ, جاۋىنگەرلىك قىزمەتتەرىڭدى ابىرويمەن اتقارىپ, اتا-انالارىڭا امان-ەسەن ورالۋلارىڭا تىلەكتەسپىن!» -دەدى قر ۇلتتىق ۇلانى «شىعىس» وڭىرلىك قولباسشىلىعىنىڭ قولباسشىسى گەنەرال-مايور تالاپكەر امرەەۆ.
شارا سوڭىندا جاس ساربازدار نەگىزگى جەكە قۇراممەن ءبىر ساپتا سالتاناتتى شەرۋمەن ءجۇرىپ ءوتتى.
