جەڭىمپازداردى ماراپاتتاۋ راسىمىنە جانە فەستيۆالدىڭ جابىلۋ سالتاناتىنا كەلگەن وتاندىق جانە شەتەلدىك كينو جۇلدىزدارى, قازىلار القاسى, فەستيۆال ۇمىتكەرلەرى جانە وزگە دە تانىمال تۇلعالار قىزىل كىلەم ۇستىندە ءجۇرىپ ءوتتى.
ۇزدىك تۋىندىلار سەگىز نەگىزگى نوميناتسيا بويىنشا انىقتالدى. نەتپاك ۇيىمىنىڭ ارنايى سىيلىعى قىرعىزستاندىق رەجيسسەر اقتان ارىم قۇباتتىڭ «كەنتاۆر» فيلمىنە بەرىلدى. فيپرەسسي (حالىقارالىق كينوپرەسسا فەدەراتسياسى) سىيلىعىن رەسەيلىك بوريس حلەبنيكوۆتىڭ «اريتميا» ءفيلمى جەڭىپ الدى. ودان بولەك, «ۇزدىك قىسقا مەتراجدى فيلم» قوسىمشا نوميناتسياسى بويىنشا شابىت ۋنيۆەرسيتەتىنىڭ بيىلعى تۇلەگى مەيىرجان ساندىبايدىڭ «يت» ءمۋلتفيلمى ۇزدىك دەپ تانىلدى. فەستيۆالدىڭ باستى اقپاراتتىق سەرىكتەسى «حابار» ارناسىنىڭ جۇلدەسى «ەششە ودين دەن» (قازاقستان) كينوكارتيناسىنا بەرىلدى.
«ۇزدىك ەر ادام بەينەسى» نوميناتسياسىنا ازەربايجاندىق اكتەر قۇربان يسلاموۆ لايىق دەپ تانىلدى. ول «گراناتوۆىي ساد» فيلمىندە (ازەربايجان) باستى ءرولدى سومداعان ەدى. سونداي-اق, بۇل فيلم قازىلار القاسىنىڭ ارنايى سىيلىعىنا يە بولدى. قازىلار القاسىنىڭ ەكىنشى سىيلىعى «پۋتەۆايا ستانتسيا» فيلمىنە (ۆەتنام) بەرىلدى. ال «ۇزدىك رەجيسسەرلىك جۇمىس» نوميناتسياسى بويىنشا قىرعىزستاندىق «كەنتاۆر» ءفيلمى جەڭىمپاز اتاندى.«ۇزدىك ايەل ادام بەينەسى» ءۇشىن XIII "ەۋرازيا" حالىقارالىق كينوفەستيۆالىنىڭ جۇلدەسى «مويا سچاستليۆايا سەميا» ءفيلمىنىڭ (گرۋزيا) اكتريساسى يا شۋگلياشۆيليگە بەرىلدى.
فەستيۆالدىڭ باس جۇلدەسىن قازاقستاندىق رەجيسسەر ءسابيت قۇرمانبەكتىڭ «ورالمان» كارتيناسى جەڭىپ الدى. اۋعانستاننان وزدەرىنىڭ تاريحي وتانى قازاقستانعا كوشىپ كەلگەن وتباسىنىڭ وقيعاسى باياندالاتىن بۇل فيلم ءساۋىر ايىندا يراندا وتكەن حالىقارالىق «فادجر» كينوفەستيۆالىندە «ازيانىڭ ۇزدىك ءفيلمى» جۇلدەسىن العان.
سونىمەن بىرگە, سالتاناتتى كەش بارىسىندا قر مادەنيەت جانە سپورت ءمينيسترى ارىستانبەك مۇحامەدي ۇلى امەريكادان ارنايى كەلگەن گولليۆۋد اكتەرى دجون مالكوۆيچكە «كينويندۋستريانى دامىتۋعا قوسقان ۇلەسى ءۇشىن» ماراپاتىن تابىستادى. شارا سوڭىندا كورەرمەندەرگە تانىمال فرانتسيالىق رەجيسسەر ليۋك بەسسوننىڭ «ۆالەريان جانە مىڭ عالامشار قالاسى» ءفيلمى قازاق تىلىندە كورسەتىلدى.
ەسكە سالا كەتسەك, XIII «ەۋرازيا» حالىقارالىق كينوفەستيۆالى قازاقستان استاناسىندا 22-28 شىلدە ارالىعىندا ءوتتى. كينوفەستيۆالگە گولليۆۋدتىق جۇلدىزدار ەدريان بروۋدي, نيكولاس كەيدج, دجون مالكوۆيچ جانە تمد ەلدەرىنىڭ رەجيسسەرلەرى مەن كينو مايتالماندارى كەلدى.
