كەڭەسكە ورتالىق مەملەكەتتىك ورگانداردىڭ باسشىلارى, «اتامەكەن» ۇكپ باسقارما توراعاسى ابىلاي مىرزاحمەتوۆ, قاراعاندى وبلىسىنىڭ وڭىرلىك كاسىپكەرلەر پالاتاسىنىڭ ديرەكتورى ەرنار كۇلپەيىسوۆ, «جەكەشەلەندىرۋ بيۋروسى» جشس ديرەكتورى الەكساندر پەروۆ, «اسپاپ» پك ديرەكتورى تولەگەن ءاشىموۆ, «شىعىس» شق باسشىسى شاميل وسين, «Kazcenterelectroprovod» جشس باس ديرەكتورى سەرگەي كيم, «قاراعاندى وبلىسى قۇرىلىس سالۋشىلار قاۋىمداستىعى» جك جانە زتب ديرەكتورى نايليا قايىربەكوۆا, «ماگنيتكا قازامەتا» جشس ديرەكتورى اندرەي ۆيتيك قاتىستى.
كەزدەسۋدە تۇرمىستىق قىزمەتتەرگە سارالانعان ءتاريفتى جويۋ, ەسكىرگەن قۇرىلىس نورمالارى مەن ەرەجەلەرىنىڭ ورنىنا ەۋروكود جۇيەلەرىن ەنگىزۋ, اوك ينۆەستيتسيالىق سۋبسيديالارىن تولەۋ, وتاندىق تاۋار وندىرۋشىلەرگە شيكىزاتقا يمپورتتىق كەدەن باجى مەن قر اۋماعى بويىنشا جۇكتەردى تاسىمالداۋعا كەتەتىن شىعىنداردىڭ وتەماقىسىن تومەندەتۋ تۇرعىسىنان قولداۋ كورسەتۋ ماسەلەلەرى تالقىلاندى. بۇدان وزگە, مونوپوليستەردىڭ تۇتىنۋشىلارمەن ءوزارا قارىم-قاتىناسىنا جانە كاسىپكەرلىك قىزمەتتى دامىتۋعا كەدەرگى كەلتىرەتىن فاكتورلارعا بايلانىستى ماسەلەلەر كوتەرىلدى.
كاسىپكەرلەر قوزعاعان تاقىرىپتارعا قر ۇلتتىق ەكونوميكا ءمينيسترى ت. سۇلەيمەنوۆ, قر ينۆەستيتسيالار جانە دامۋ ءمينيسترى ج. قاسىمبەك جانە قر اۋىل شارۋاشىلىعى ۆيتسە-ءمينيسترى گ. يساەۆا تۇسىنىكتەمە بەرىپ ءوتتى.
قر پرەمەر-ءمينيسترى باقىتجان ساعىنتاەۆ قازاقستاندا كاسىپكەرلىكتى دامىتۋ مىندەتىن, ەكونوميكالىق ءوسىمنىڭ جاڭا مودەلىن قالىپتاستىرۋ اياسىندا, ەلباسى ن. نازارباەۆ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىندا قويعانىن اتاپ ءوتتى. وسىعان وراي, ۇكىمەت بيزنەسكە قولداۋ كورسەتۋ ماسەلەلەرىنە ەرەكشە كوڭىل بولۋدە.
باقىتجان ساعىنتاەۆ ەلىمىزدە جۇرگىزىلىپ جاتقان تەحنولوگيالىق جاڭعىرتۋ جۇمىستارى وتاندىق كاسىپكەرلەردى جاڭا وندىرىستەر مەن ونىمدەر شىعارۋعا تارتۋعا ۇلكەن مۇمكىندىكتەر بەرەتىنىن ايتتى. سونداي-اق, كاسىپكەرلەر سەرۆيستىك قىزمەتتەر مەن قاراپايىم زاتتار ەكونوميكاسى سەكىلدى ەكونوميكا سەكتورلارىن ودان ءارى دامىتۋعا بەلسەندى تۇردە اتسالىسا الادى. بۇل, ءوز كەزەگىندە, وزگە سالالاردان بوساتىلاتىن الەۋەتتى جۇمىسشىلارعا قوسىمشا جۇمىس ورىندارىن اشۋعا مۇمكىندىك بەرەدى.
كەزدەسۋدىڭ سوڭىندا باقىتجان ساعىنتاەۆ ۇكىمەتتىڭ بيزنەس قاۋىمداستىقتى مازالاعان ماسەلەلەردى تالقىلاۋ ءۇشىن قاشان دا اشىق ەكەنىن ايتىپ, كاسىپكەرلەردى ەكونوميكانى جاڭعىرتۋ اياسىنداعى مىندەتتەردى ىسكە اسىرۋعا بىرلەسىپ, بەلسەندىرەك قاتىسۋعا شاقىردى.
مەملەكەتتىك ورگاندارعا اتالعان ماسەلەلەردى باقىلاۋعا الۋ تاپسىرىلدى.
