ەكى جاقتى كەلىسسوز قازاقستان مەن رۋمىنيا ديپلوماتيالىق قارىم-قاتىناسىنىڭ ورناۋىنا 25 جىل تولۋىنا وراي وتكىزىلدى. مەرەيتويلى كەزدەسۋدەن كەيىن مينيسترلەر بۇقارالىق اقپارات قۇرالدارى وكىلدەرىنە مالىمدەمە جاسادى.
ء«بىز ىنتىماقتاستىقتىڭ ەكى جاقتى جانە كوپ جاقتى ماسەلەلەرىن تالقىلاپ, ساۋدا-ەكونوميكا جانە ينۆەستيتسيا سالالارىنداعى ءوزارا ارەكەتتەستىكتىڭ كوكجيەكتەرىن بەلگىلەدىك. ەكى ەلدىڭ الەۋەتى جەتەتىن ترانزيتتىك-كولىكتىك قاتىناستى ءتيىمدى پايدالانۋعا قاتىستى ىنتىماقتاسۋ ماسەلەلەرىن قارادىق. بۇگىنگى تاڭدا ەنەرگەتيكا سالاسىنداعى ىنتىماقتاستىق ساۋدا جانە ەكونوميكالىق بايلانىسىمىزدىڭ باسىم تاراپى بولىپ سانالادى. الايدا بۇعان قاراماستان ساۋدا سالالارىن كەڭەيتۋ جانە ونى كەڭ تاراپتاندىرۋ ءبىزدىڭ باستى مىندەتىمىز», – دەدى قايرات ءابدىراحمانوۆ.
ءمينيستردىڭ پىكىرىنشە, قازاقستان تاراپى ەلدى جانداندىرۋعا ارنالعان جوبالارعا رۋمىن بيزنەس وكىلدەرىنىڭ قاتىسقانىنا مۇددەلى كورىنەدى. سونىمەن قاتار, ەكى ەل اراسىنداعى مادەني جانە عىلىمي ساباقتاستىقتى دامىتۋ ءۇشىن شاكىرت الماستىرۋ بويىنشا وقيتىن ستۋدەنتتەر سانىن ۇلعايتۋ, اكادەميالىق سالا ماماندارىنىڭ جيىنىن وتكىزۋ سەكىلدى قادامدار جاسالاتىنىن ايتادى قايرات ءابدىراحمانوۆ.
قازاقستان سىرتقى ىستەر ءمينيسترىنىڭ ايتۋىنشا رۋمىنيا بالقان تۇبەگىندەگى ەڭ ماڭىزدى ارىپتەس بولسا, ءوز كەزەگىندە تەودور-ۆيورەل مەلەشكان قازاقستاندى ورتا ازياداعى تەڭدەسسىز سەرىكتەس دەپ ەسەپتەيتىنى جەتكىزدى.
«مەنىڭ ءىس-ساپارىم ناقتى ناتيجەلەر اكەلگەنىنە قۋانىشتىمىن. ءبىز ديپلوماتيالىق قارىم-قاتىناستىڭ ورناۋىنا 25 جىل تولۋىنا وراي رۋمىنيا ساۋدا پالاتاسى مەن «اتامەكەن» ۇلتتىق كاسىپكەرلەر پالاتاسىنىڭ ارىپتەستىگى تۋرالى كەلىسىمگە قول قويدىق», – دەدى رۋمىنيا سىرتى ىستەر ءمينيسترى تەودور-ۆيورەل مەلەشكان.
ورتاق كەلىسىمگە قول قويىلعاننان كەيىن بالقان تۇبەگىنەن كەلگەن مەيماندار مەن قازاقستان تاراپى «ەكسپو-2017» حالىقارالىق كورمە اياسىندا ءوتىپ جاتقان رۋمىنيا كۇندەرىن تاماشالاۋعا اتتاندى.
اباي اسانكەلى ۇلى,
«ەگەمەن قازاقستان»
