گەنانىڭ تەڭدەسسىز شەبەرلىگىنە تاڭعالعاندارعا ونىڭ ءومىر جولى ۇلگى ىسپەتتى. تاياۋدا كاسىپقوي بوكس تۋرالى اقپارات تاراتاتىن تانىمال boxingnewsonline.com سايتى گولوۆكيننىڭ قازىرگى جەتىستىگىنە جەتكەنگە دەيىنگى 5 ماڭىزدى ءساتىن اتاپ كورسەتىپتى.
«قىركۇيەكتىڭ 16-سى كۇنى ت-موبايل ارەناسىندا ورتا سالماقتىڭ چەمپيونى گولوۆكين ساۋل الۆارەس كانەلومەن جۇدىرىق ءتۇيىستىرىپ, بيىلعى ەڭ ماڭىزدى جانە كوپ كۇتىلگەن جەكپە-جەگىن وتكىزەدى. مەكسيكالىقپەن بولاتىن ايقاس الدىندا قازاق بوكسشىسىنىڭ ەستە قالارلىق 5 ءساتىن ۇسىنىپ وتىرمىز» – دەپ جازادى boxingnewsonline.com سايتى.
گەنانىڭ كارەراسىنداعى ەڭ اۋەلگى ماڭىزدى ءسات – اۋەسقوي رينگتەگى تەڭدەسسىز ناتيجەسى دەپ ەسەپتەيدى ماقالا اۆتورى. «كاسىپقوي رينگتە كوتەرىلگەنگە دەيىن ول قازاقستاندا اتى شىعىپ, اۋەسقوي بوكستا 345 مارتە جەڭىسكە جەتىپ, 5 كەزدەسۋدە عانا ۇتىلىپ, تەڭدەسسىز ناتيجەگە قول جەتكىزدى. 2003 جىلى تايلاندتا وتكەن الەم چەمپيوناتىندا التىن مەدال جەڭىپ العاننان كەيىن گولوۆكيننىڭ اتاعى ودان ءارى اسقاقتادى» – دەپ جازادى boxingnewsonline.com. ماقالا اۆتورىنىڭ پىكىرىنشە, افينى وليمپياداسى (2004 جىل) گەنانىڭ سپورتتىق ومىرىندەگى ەڭ ماڭىزدى ءسات. سونداي-اق, بايراقتى باسەكەنىڭ كۇمىسى كاسىپقوي بوكستاعى تاڭعالارلىق تاعدىرىنىڭ ىرگەتاسى بولدى دەيدى اۆتور.
گەنناديدىڭ كاسىپقوي رينگتەگى كەزەڭى كەلەسى ءبىر ماڭىزدى ءسات ابەل سانچەسپەن كەلىسىمگە كەلۋى ەكەنىنە توقتالادى. «كاسىپقوي رينگكە اۋىسقان سوڭ گولوۆكين اعايىندى كليچكولار سەكىلدى مەديسون سكۆەر گاردەندە جەكپە-جەك وتكىزۋدى ماقسات ەتتى. ارمانىنا جەتۋ ءۇشىن ول ك2 پروموۋتەرلىك كومپانياسىمەن كەلىسىمشارت جاساسىپ, ارداگەر باپكەر ابەل سانچەستىڭ قاراماعىنا كەلدى» – دەپ مالىمدەيدى boxingnewsonline.com. ماقالادا باپكەردىڭ جاس قازاق بوكسشىسىنا بىردەن كوڭىلى تولعانى ايتىلعان. «سانچەس مەكسيكالىقتاردىڭ جويقىندىعىن گولوۆكيننىڭ بايقامپاز اۋەسقوي شىعىس ستيلىمەن بايلانىستىردى. ناتيجەسىندە, سوققىسى ءدوپ تيەتىن, جاۋجۇرەك بوكسشى قالىپتاستى.
ماقالاعا دەن قويار بولساق, 2010 جىلى 14 تامىزدا تۇڭعىش رەت كاسىپقوي بوكستان چەمپيونى» اتانۋى – گولوۆكيننىڭ ومىرىندەگى ءۇشىنشى ماڭىزدى ءسات. سول كەزدە گەنا كولۋمبيالىق ميلتون نۋنەسپەن WBA Interim تۇجىرىمداماسىنا تالاسقان بولاتىن. «گولوۆكيننىڭ قارسىلاسى جەكپە-جەك باستالا سالا قوجىراپ, كوزدى اشىپ-جۇمعانشا 58 سەكۋند ىشىندە گولوۆكين نۋنەستى نوكاۋتقا جىبەردى. قازاق WBA Interim بەلدىگىن العان, الايدا ءبىر جىلدان كەيىن WBA-نىڭ تۇراقتى چەمپيونى اتاندى».
Boxingnewsonline.com گولوۆكيننىڭ كەلەسى ءبىر ماڭىزدى قادامى دەپ كەلل برۋكپەن وتكىزگەن جەكپە-جەگىن ەسەپتەيدى. اتالعان كەزدەسۋ گەنانىڭ ۇلىبريتانياداعى تانىمالدىعىن ارتتىرۋعا سەبەپ بولدى. ەستەرىڭىزدە بولسا, بۇل جەكپە-جەك بىلتىر 10 قىركۇيەكتە لوندوندا وتكەن ەدى. جەكپە-جەكتىڭ 5-راۋندىندا گولوۆكيننىڭ نوسەردەي جاۋعان سوققىلارىنا برۋكتىڭ شىداماعانىن كورگەن باپكەرلەرى شاكىرتىنىڭ جەڭىلگەنىن مويىنداپ, شارشى الاڭداعى ايقاستى مەرزىمىنەن بۇرىن توقتاتقان بولاتىن. ماقالا اۆتورىنىڭ سوزىنە سۇيەنسەك, گەنانىڭ كارەراسىنداعى بەسىنشى ماڭىزدى ءسات رەتىندە دانيەل دجەيكوبسپەن وتكەن جەكپە-جەك ەسەپتەلەدى. ورتا سالماقتاعى الەمنىڭ ەكى مىقتى بوكسشىسى وتكىزگەن كەزدەسۋدە امەريكالىق بىلعارى قولعاپ شەبەرى گولوۆكينگە اجەپتەۋىر قارسىلىق كورسەتتى دەپ تاپسىرلەيدى boxingnewsonline.com. ايتسە دە, مايقۇدىقتىڭ مايتالمانى قارسىلاسىنا دەس بەرگەن جوق.
گەننادي گولوۆكين كەلەسى جەكپە-جەگىن 18 قىركۇيەكتە لاس-ۆەگاستا ساۋل الۆارەسكە قارسى وتكىزەدى. الداعى كەزدەسۋدە گەنانىڭ 4 بەلدىگى, WBA تۇجىرىمداماسىنىڭ سۋپەر چەمپيونى, WBC تۇجىرىمداماسىنىڭ چەمپيونى, IBF تۇجىرىمداماسىنىڭ چەمپيونى, IBO جەڭىمپازى اتاقتارى مەن The Ring جۋرنالىنىڭ بەلدىگى ساراپقا سالىنادى. بۇل – گولوۆكيننىڭ كاسىپقوي رينگتەگى 38-ءشى جەكپە-جەگى. گەنا ءالى بىردە-ءبىر رەت جەڭىلىپ كورگەن جوق. قىركۇيەكتەگى كەزدەسۋدە دە مايقۇدىقتىڭ مايتالمانى جەڭىستى جولىن جالعاستىرادى دەپ سەنەمىز.
اعىلشىن تىلىنەن ازىرلەگەن
اباي اسانكەلدى ۇلى,
«ەگەمەن قازاقستان»
