كەزدەسۋدە ق.ءمامي ەكى ەلدىڭ ىنتىماقتاستىعىن جانداندىرۋعا ەلشىنىڭ تىكەلەي قوسقان ۇلەسىن اتاي كەلە, ەكسپو-2017 كورمەسىنىڭ شەڭبەرىندە سينگاپۋردىڭ ۇلتتىق كۇنىنىڭ تابىستى مەرەكەلەنۋىمەن قۇتتىقتادى.
ز.باحارۋدين ءوز كەزەگىندە ەكى ەلدىڭ ىنتىماقتاستىق دەڭگەيى كوبىنەسە مەملەكەتتىك قۇرىلىمداردىڭ ءوزارا ءىس-قيمىلدى ارتتىرۋىنا تىكەلەي بايلانىستى ەكەندىگىن اتاپ ءوتتى.
ق.ءمامي ەلشىنىڭ قازاقستاننىڭ كونستيتۋتسيالىق رەفورمانى وتكىزۋى تۋرالى سۇراعىنا جاۋاپ بەرە كەلىپ, پرەزيدەنتتىڭ مەملەكەتتىك باعدارلامالاردى بەكىتۋ تۋرالى قۇزىرەتىن ۇكىمەتكە بەرۋ, ىشكى ىستەر جانە ادىلەت مينيسترلەرىن تاعايىنداۋ تەتىكتەرىنىڭ وزگەرۋى, ۇكىمەتتىڭ پارلامەنتكە تىكەلەي ەسەپتىلىگىنىڭ كۇشەيۋى تۋرالى ايتتى. سوت جۇيەسىندەگى جاڭاشىلدىقتار بويىنشا اتا زاڭنان سۋديالىققا كانديداتتاردىڭ 25 جاس شەكتەلىمى تۋرالى تالاپتىڭ الىنىپ تاستالۋىنا ايرىقشا نازار اۋدارىلدى. اتالعان قادام كانديداتتاردى سۋديالىققا 30 جاستان باستاپ تاعايىنداۋ تۋرالى مىندەتتى جاس شەكتەلىمىن ارتتىرۋ جونىندە «سوت جۇيەسى مەن سۋديالاردىڭ مارتەبەسى تۋرالى» كونستيتۋتسيالىق زاڭعا وزگەرىستەر ەنگىزۋگە مۇمكىندىك بەردى.
ەلشى قازاقستاندا جۇزەگە اسىرىلعان كونستيتۋتسيالىق وزگەرىستەردى دەر كەزىندە قولعا الىنعان باستاما دەپ باعالاپ, «سينگاپۋردىڭ تاجىريبەسى قازاقستانعا عانا قىزىقتى ەمەس, سونىمەن قاتار, سينگاپۋر دا قازاقستاننىڭ دامۋ تاجىريبەسىن مۇقيات زەردەلەپ وتىر», دەدى. ز.باحارۋدين مىرزا استاناداعى حالىقارالىق قارجى ورتالىعىنىڭ (احقو) جۇمىسىن ۇيىمداستىرۋعا بەلسەنە قاتىسۋعا ءازىر ەكەندىگىن جەتكىزدى.
وسى ماسەلەنى تالقىلاي كەلە, ق.ءمامي احقو-نىڭ جانىنان ينۆەستيتسيالىق داۋلاردى شەشۋ ماقساتىندا اربيتراج ورتالىعى مەن قارجى سوتىن قۇرۋ جۇمىسىنىڭ بارىسى تۋرالى اڭگىمەلەدى. اتالعان سوت ەلىمىزدىڭ سوت جۇيەسىنە كىرمەيدى, وندا سوت ءىسى اعىلشىن تىلىندە جۇرگىزىلىپ, اعىلشىن-ساكسون قۇقىعى قولدانىلاتىن بولادى. ق.ءمامي جوعارعى سوت احقو-نىڭ ەڭ جاقىن سەرىكتەسى بولىپ تابىلاتىندىقتان, دۋباي قارجى جانە سينگاپۋر اربيتراج ورتالىقتارىنىڭ تاجىريبەسى نەگىزىندە ونىڭ دامۋىنا مۇددەلى ەكەندىگىن اتاپ ءوتتى.
كەزدەسۋ سوڭىندا تاراپتار قازاقستان مەن سينگاپۋردىڭ قۇقىق سالاسىنداعى الداعى ىنتىماقتاستىعى ءوزارا تۇسىنىستىك جاعدايىندا دامي بەرەتىندىگىنە سەنىم ءبىلدىردى.
«ەگەمەن-اقپارات»
