ەلورداعا جۇك ارتقان وتىز بوتالى تۇيە جەتەلەگەن ونەرپازدار, ەلۋگە تارتا اتتى قىز-بوزبالا باستاعان « ۇلى جىبەك جولى. كونە تارازدان استاناعا تارتۋ» اتتى ەتنومادەني كەرۋەن كەلدى. تاريحي مەكەن تارازدان اسەم استاناعا ەكى ايدان اسا ءجۇرىپ جەتكەن ولار جول بويى ون بەكەتكە ايالداپ, ۇلتىمىزدىڭ ۇمىت بولعان سالت-داستۇرلەرىن پاش ەتكەن. كەرۋەنمەن كەلگەن ونەرپازدار مەن سپورت شەبەرلەرى ەندى اي سوڭىنا دەيىن باس شاھارىمىزدا ەكسپو-2017 حالىقارالىق كورمەسى اياسىندا جامبىل وبلىسىنىڭ مادەني كۇندەرىن وتكىزەدى.
«حان شاتىر» ساۋدا جانە ويىن-ساۋىق ورتالىعى ماڭىنداعى «عاشىقتار» ساياباعىنا كەلىپ توقتاعان كەرۋەندى قارسى الۋعا استانا اكىمى اسەت يسەكەشەۆ, جامبىل وبلىسى اكىمى كارىم كوكىرەكباەۆ جانە سول توپىراقتا تۋعان زيالى قاۋىم وكىلدەرى كەلدى. باسقوسۋدا وڭىرگە قاراستى ون اۋداننىڭ كوركەمونەرپازدارى «اۋليەاتادان جىر شاشۋ» اتتى كونتسەرت قويدى.
«ەكى مىڭ جىلدان اسا تاريحى بار قاسيەتتى اۋليەاتا جەرىنەن, جىر الىبى جامبىلدىڭ ەلىنەن 1400 ادام استاناعا كەلدى. ەتنومادەني كەرۋەن 20 مامىر كۇنى تاراز قالاسىنان جولعا شىعىپ, جامبىل وبلىسىنىڭ التى اۋدانى مەن قاراعاندى وبلىسىنىڭ ءتورت اۋدانىن باسىپ, جول بويى مادەني شارالار وتكىزىپ, ەكى اي دەگەندە استاناعا تابان تىرەدى. بۇل – ءبىزدىڭ ءوڭىردىڭ ەكسپو-2017 حالىقارالىق كورمەسىنە ەڭ ۇلكەن تارتۋى. كەرۋەن قۇرامىندا ەكى جۇزگە تارتا تانىمال ونەرپازدارىمىز بار», دەگەن وبلىس اكىمى كەرۋەن توبىنىڭ 1300 شاقىرىم جولدى باسىپ وتكەندە قيىندىقتارعا دا كەزىككەنىن جەتكىزدى.
«ارينە, ارقانىڭ توسىنە كونە شاھاردان ات, تۇيەمەن, اربامەن اشىق اسپان استىندا جەتۋ وڭاي ەمەس. اسىرەسە, ەكى اپتا بۇرىنعى اپتاپ ىستىق كەزىندە تەمپەراتۋراسى 46-47 گرادۋسقا دەيىن كوتەرىلگەن مويىنقۇم دالاسىنان ءوتۋ ونەرپازدارعا دا, مالدارعا دا قيىنعا سوقتى. بىراق سول ماشاقاتتىڭ ءبارىن جەڭىپ, استانانىڭ قاق تورىنە جەتتىك», دەدى كارىم كوكىرەكباەۆ.
«عاشىقتار» ساياباعىندا جامبىل وبلىستىق تاريحي-ولكەتانۋ مۋزەيىنىڭ «تاراز – تاريحتىڭ التىن دiڭگەگi» اتتى كورمەسى ءوتىپ, ساق داۋىرىنەن قازاق حاندىعى قۇرىلعانعا دەيىنگى 300-دەن استام جادىگەر – تاريحي ينستاللياتسيالار, تيىندار, قۇمىرالار جانە تارازدىق قىلقالام شەبەرلەرىنىڭ سۋرەتتەرى جۇرتشىلىق نازارىنا ۇسىنىلدى. سونداي-اق, «كونە تاراز الەمى» تاريحي-مادەني ەكسپوزيتسيالىق كەشەنى اشىلىپ, كيىز ۇيلەر تىگىلدى. قولدان جاسالعان اشەكەي بۇيىمدار, مۋزىكالىق اسپاپتار, جەمىس-جيدەكتەر مەن كوكونىستەر ساتىلىمعا شىعارىلدى.
ايشا ءبيبى مەن قاراحان, نەمەرەسىنە ەرتەگى ايتىپ وتىرعان اجە جانە قۇس ۇشىرىپ, تازى جۇگىرتكەن اڭشىلاردىڭ ءسانى مەن سالتاناتى جاراسقان كەرۋەن استانا تۇرعىندارى مەن قوناقت+ارىنا ۇمىتىلماس اسەر سىيلادى. «بۇل ەستەن كەتپەيتىن ەرەكشە ساپار بولدى. ءبىزدى جول بويىنداعى ءاربىر اۋىل قۋانىشپەن قارسى الدى», دەيدى كەرۋەن قۇرامىنداعى اجەي تامارا ابدىكارىموۆا.
ەكسپو-2017 كورمەسى اياسىندا 30 شىلدەگە دەيىن جالعاساتىن مادەني كۇندەردە ەلوردالىق تۇرعىندار مەن قوناقتار وبلىستىق فيلارمونيا ۇجىمىنىڭ «اۋليەاتادان – ءان شاشۋ» باعدارلاماسىن, قازاق دراما تەاترىنىڭ «قىز جىبەك» ساۋندترەگىن, ا.بەكبوسىننىڭ «دومالاق ەنە», س.بالعاباەۆتىڭ «ەڭ جاقسى ەركەك» سپەكتاكلدەرىن, «الاتاۋ» فولكلورلىق ءانسامبلىنىڭ «عاسىرلار اۋەنى» كونتسەرتىن جانە د.تاڭاتاروۆ, ق.نۇرتاس, ي.راسىلحان سىندى تانىمال انشىلەردىڭ قاتىسۋىمەن وتەتىن ء«بىر اۋەن, ءبىر ولەڭ» كەشىن تاماشالايدى. مادەني شارالاردىڭ كوپشىلىگى «عاشىقتار ساياباعىندا» وتەدى.
باس قالاداعى «قازانات» يپپودرومىندا ۇلتتىق ات سپورتى تۇرلەرى – كوكپار, اۋدارىسپاق, تەڭگە ءىلۋ, جامبى اتۋ ويىندارىنىڭ كورسەتىلىمدەرى ۇيىمداستىرىلادى. «ەتنواۋىل» قالاشىعى ماڭىندا قازاق كۇرەسى, اسىق اتۋ, بەس تاس, الاڭداعى توعىزقۇمالاق ويىندارىنىڭ كورسەتىلىمىمەن قاتار, قۇسبەگىلىك جانە تازى, توبەت يتتەر كورمەسى وتەدى.
سونىمەن بىرگە, 28-30 شىلدە كۇندەرى جامبىلدىقتار «قازاقستان» سپورت كەشەنى اۋماعىندا اۋىلشارۋاشىلىق جارمەڭكەسىن وتكىزىپ, استانالىقتارعا 245 توننا ەكولوگيالىق تازا, جوعارى ساپالى ازىق-ت ۇلىك ونىمدەرىن ۇسىنادى.
اسحات رايقۇل,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات,
«ەگەمەن قازاقستان»
