الماتى اكىمى باۋىرجان بايبەك جۇمىس بارىسىندا جاياۋ جۇرگىنشىگە باسىمدىلىق بەرەتىن پانفيلوۆ, جىبەك جولى, گوگول, قابانباي باتىر كوشەلەرى مەن «استانا» الاڭىنىڭ قايتا جاسالۋىن تەكسەردى, مەردىگەر ۇيىمداردىڭ نازارىن جۇمىستىڭ ساپاسى مەن بەلگىلەنگەن مەرزىمدە اياقتالۋىنا اۋداردى.
قالا اكىمىنە قازىرگى كەزدە جىلۋ جۇيەلەرىن اۋىستىرۋ جۇمىستارىنىڭ اياقتالعانى,ارىق لوتوكتارىنىڭ توسەلگەنى, كەسپە تاستار نەگىزىنىڭ جاسالعانى, كوشە جارىعى جەلىلەرىنىڭ تارتىلعانى, قۇرعاق سۇبۇرقاقتاردىڭ ىسكە قوسىلعانى باياندالدى. كەلەسى اپتادان باستاپ جوعارىدا اتالعان كوشەلەردە بىرىڭعاي ارحيتەكتۋرالىق ستيل قالىپتاستىرۋ ءۇشىن نىسانداردىڭ سىرتقى بەتتەرىن جاڭارتۋ جۇمىستارى باستالادى.بۇرىننان بار جاسىل جەلەكتەر سول بويى ساقتالادى. كومەسكى كەڭىستىكتى كەڭەيتۋ ماقساتىندا بيىك اعاشتار, قايىڭ, ەمەن جانە باسقالارى, مىڭنان استام بۇتا-شىلىك وتىرعىزۋ قاراستىرىلعان.جالپى 330 مىڭ شارشى مەتر جەرگە جاسىل جەلەك وتىرعىزىلادى.
جىبەك جولى كوشەسىن قوناەۆ كوشەسىنەن جەلتوقسان كوشەسىنە دەيىن قايتا جاساۋ بارىسىندا اربات بۇرىنعى كەلبەتىن ساقتايدى,تولىق اباتتاندىرىلادى جانە جەكە فۋنكتسيونالدى ايماقتارعا بولىنەدى. دەمالىس ورىندارى ارتادى, بۇرىننان بار فونتاندار قايتا جاسالادى, سپورت جانە بالالار الاڭدارى پايدا بولىپ, كەسپە تاستىڭ ورنىنا جوعارى ساپالى گرانيت توسەلەدى.
پانفيلوۆ كوشەسى بويىمەن قابانباي باتىر كوشەسىنەن باستاپ جىبەك جولىنا دەيىنگى ارالىقتاعى جاياۋ جۇرگىنشى جولىنا دا گرانيت توسەلەدى, مۇندا دا دەمالاتىن ورىندار, سپورت جانە بالالار الاڭدارى, اباتتاندىرىلعان ۆەلوجولدار بولادى. اتاپ وتەرلىك جايت, جوندەۋ جۇمىستارى باستالعان كەزدە كونە قالانىڭ ەسكى كەسپە تاستارى تابىلعان ەدى, جوبانىڭ جالپى كومپوزيتسياسىندا ولار دا پايداعا اسادى.
«استانا» الاڭىندا كولىك قوزعالىسى جولاعى قىسقارادى, بوساعان كەڭىستىكتەرگە قوسىمشا اعاشتار وتىرعىزىلادى, ەكى قۇرعاق سۋبۇرقاق پايدا بولادى. وسىلايشا, جاياۋ جۇرگىنشىلەر مەن كولىك لەگى ەكىگە بولىنەدى, اۆتوتۇراق ايماعى شەكتەلەدى. الاڭنىڭ سولتۇستىك بولىگىنە ەكولوگيالىق تازا گرانيت تاستار توسەلەدى.
قابانباي باتىر مەن گوگول كوشەلەرىندە قوزعالىس بولىگىن شەكتەۋ قاراستىرىلماعان, بىراق جاياۋ جۇرگىنشى جولىنىڭ تۇگەل بويىنا كولىك قويۋعا تىيىم سالىنادى,ءاۆتوموبيلدى تەك ارنايى جابدىقتالعان «قالتالاردا» عانا قالدىرۋعا بولادى. تروتۋارلارعا گرانيتتى جانە بەتوندى پليتكالار توسەلەدى, گازونداردى قورعاۋ ءۇشىن بۇتاق-شىلىكتەر وتىرعىزىلىپ, بالالار الاڭدارى جانە باسقالارى ۇيىمداستىرىلادى.
