تالدىقورعانداعى «جاستار» مادەني-دەمالىس ساياباعى مەن قاراتال جاعالاۋىن ۇلگى ەتە وتىرىپ سالىنعان ۇشارالداعى جاڭا ساياباق كوز قۋانتادى. مامىر ايىندا پايدالانۋعا بەرىلگەن دەمالىس ورنىنىڭ اۋماعى - 15,1 گا. بولىنگەن 103,6 ملن. تەڭگەگە اتالمىش ساياباقتىڭ جوندەۋ جانە اباتتاندىرۋ جۇمىستارىن «الاكول جىلۋ» جشس ساپالى جۇرگىزگەن. اللەيادا ساۋلەتتىك مۇسىندەر, ماڭگىلىك ەل مونۋمەنتى قويىلعان. مۇندا بالالارعا ارنالعان شاعىن فۋتبول جانە ويىن الاڭدارى, ۆەلوسيپەد جولى, دەنە شىنىقتىرۋعا ارنالعان قۇرىلعىلار قاراستىرىلىپ, سۋبۇرقاق, ۇلكەن قولشاتىر ۇلگىسىمەن ساندەتىلىپ جابىلعان ورىندىقتار ورناتىلعان.
وبلىس اكىمى ا. باتالوۆ ساياباقتا سەرۋەندەپ جۇرگەن تۇرعىندارمەن, ويىن الاڭىنداعى بالالارمەن تىلدەستى. جاڭادان شاڭىراق كوتەرىپ جاتقان جاستارعا ساياباق ىشىندە جولىعىپ, تىلەگىن ءبىلدىرىپ, اق جول تىلەدى.
مۇنان سوڭ الاكول جاعالاۋىن دامىتۋدىڭ ەگجەي-تەگجەيلى جوسپارىمەن, كول جاعالاۋىن بەكىتۋ, اۆتوكولىك جولدارىن قايتا جاڭعىرتۋ, اقشيدە سالىناتىن تەمىر جول ۆوكزالى قۇرىلىسىنىڭ جوبالارىمەن, كول جاعالاۋىندا ءتۋريمزدى دامىتۋ شارالارىمەن تانىستى.
وبلىس اكىمى ا. باتالوۆ كول جاعالاۋىن بەكىتۋ جۇمىستارىن جۇرگىزبەس بۇرىن عىلىمي زەرتتەۋ شارالارىن اتقارۋ قاجەتتىگىن ايتتى. جاعالاۋدىڭ قاي تۇسىن سۋ ءجيى شاياتىنىن, تولقىن سوققىسى قاي جەرگە كوپ تيەتىنىن, جالپى جاعالاۋدى بەكىتۋ بارىسىندا نازارعا الىنۋى ءتيىس ماسەلەلەردى ارنايى عىلىمي ماماندارمەن بىرلەسە وتىرىپ اتقارۋدى تاپسىردى. سونىمەن قاتار تەمىر جول ۆوكزالىنىڭ قۇرىلىسىن تامىز ايىنىڭ ورتاسىنان كەشىكتىرەي باستاۋ قاجەتتىگىن ەسكەرتتى.
سونداي-اق اقشي اۋىلىنداعى «AQUAMARINE resort», «Alakol resort» سياقتى قوناق ءۇي كەشەندەرىن ارالاۋ بارىسىندا كول جاعالاۋىنداعى ءتۋريزمدى دامىتۋ ءۇشىن ەڭ الدىمەن قىزمەت كورسەتۋ ساپاسى جوعارى, دەمالۋشىلارعا بارلىق قولايلى جاعدايلار قاراستىرىلعان قوناق ۇيلەردىڭ ماڭىزى زور ەكەنىن ايتتى. اۋدان اكىمى الىبەك جاقانباەۆقا الاكول ماڭىندا ءتۋريزمدى دامىتۋ شارالارىن ۇزدىكسىز جۇرگىزۋدى تاپسىردى.
