قالالىق سايىستاردا مەشىتتەرىنىڭ جاقسى اتىن شىعارۋ ءۇشىن جارىس جولىنا تۇسكەن 10 كوماندا ءال-فارابي اتىنداعى قازاق ۇلتتىق ۋنيۆەرسيتەتىنىڭ فۋتبول الاڭىنا جينالدى. ونىڭ بەسەۋى «تولە بي», قالعان بەسەۋى «مۋززاميل» مەشىتىنىڭ ۇجىمدارى بولدى.
جارىس جولىندا 10 ۇپاي جيناعان «قارا تامىر» كومانداسى ءبىرىنشى ورىن الىپ, «تولە بي» مەشىتىنىڭ ابىرويىن قورعايتىن بولدى. ەكىنشى ورىندى «اڭسار» ويىنشىلارى يەمدەنسە, «ارمان» فۋتبولشىلارى 6 ۇپاي جيناپ, قولانى قاناعات تۇتتى.
ال «مۋززاميل» مەشىتىنىڭ وكىلدەرى اراسىندا «ساليح», «سپارتا» جانە «درۋجبا-1» كوماندالارى 9 ۇپايدان قانجىعاعا بايلاپ, جۇلدەلى ورىنداردى جەكە كەزدەسۋلەرى ارقىلى ءبولىپ الدى.
ايتقانداي, «اسىل مۇرا» باعدارلاماسى اياسىندا وتكەن فۋتبول ءتۋرنيرى 7 شىلدە كۇنى اشىلىپ, الماتى قالاسىنىڭ مەشىتكە كەلۋشى جاماعاتتارى اراسىنداعى بۇقارالىق سپورتتى دامىتۋعا نەگىزدەلگەن.
الدىڭعى اپتادا باستاۋ العان فۋتبول ليگاسىنا قالادا ورنالاسقان 48 مەشىتتىڭ وكىلدەرى ءوزارا مىقتىنى انىقتاپ, قالالىق تۋرنيردە جولىعاتىن بولادى.
ايناش ەسالي,
«ەگەمەن قازاقستان»
الماتى
