قازاقستاندا ءسىزدى قالاي قارسى الدى؟ «استانادان» قانداي ويىن كۇتەسىز؟
استانادا ءبىزدى جاقسى قارسى الدى. قازاق حالقىنىڭ قوناقجاي حالىق ەكەنىن و باستان بىلەتن ەدىم. سوندىقتان بۇل بىزگە جاڭالىق بولمادى. دەگەنمەن, ماتچ كەزىندە جاعدايىمىزدى قيىنداتۋ ءۇشىن بارىن سالاتىنىن دا جاقسى بىلەمىز. بۇل فۋتبولدا قالىپتى جاعداي. سەبەبى, جاسىل الاڭدا دوستىق بولمايدى
جاساندى الاڭدا ويىن ناتيجەسىنە اسەر ەتە مە؟ ءبىز پولشا قۇراماسىنىڭ بۇل ستاديوندا تەڭ ويناعانىن جاقسى بىلەمىز.
پولشادا ءوزىمزدىڭ ويىندار بولدى. سوندىقتان مۇنداي الاڭدا تولىققاندى دايىندالىپ ۇلگەرمەدىك. بەلگىلى ءبىر دەڭگەيدە اسەر ەتەتىنى بەلگىلى. بىراق بۇل پروبلەمانى شەشۋگە تىرىسامىز. ەرتەڭگە دەيىن ۋاقىت بار.
«استانا» ءوز الاڭىندا سوڭعى ءۇش جىلدا ون ءۇش ويىن قاتارىنان ەشكىمگە ەسە بەرمەي كەلە جاتقانىن بىلەمىز. وسىعان بايلانىستى قانداي پىكىر بىلدىرەسىز؟
بۇل تۋرالى ارينە بىلەمىز. دەگەنمەن, قازىرگى باستى ماقساتىمىز – ەكى ويىننىڭ ناتيجەسى بويىنشا كەلەسى ىرىكتەۋ كەزەڭىنە ءوتۋ.
«لەگيا» ىشكى بىرىنشىلىكتە «كورونا» كومانداسىنا قارسى تەڭ وينادى. بۇل چەمپيوندار ليگاسى اياسىنداعى ماڭىزدى ويىن الدىندا كومانداعا كەرى اسەرىن تيگىزبەدى مە؟
ارينە, ءبىز باسقاشا ويىن كۇتكەنبىز. بىراق فۋتبولدا ءبارى مۇمكىن. دەگەنمەن, بۇل ويىندا جىبەرگەن قاتەلىكتەرىمىزدى «استاناعا» قارسى ويىندا قايتالامايمىز دەپ ۇمىتتەنەمىن.
«استانادان» قانداي ويىن كۇتەسىز؟ ەلوردالىق ۇجىمنان قاي ويىنشىنى اتاپ وتەرسىز؟
شىنىمدى ايتسام, «استانادان» كوپ ەشكىمدى بىلمەيمىن. مەن ماەۆسكيدى سىرتتاي تانيتىنىم بار. ءبىزدىڭ ساراپشى ماماندارىمىز «استانا» تۋرالى ارنايى ماتەريال ازىرلەدى. ەرتەڭ ويىن الدىندا وسىعان بايلانىستى فۋتبولشىلارىما ءتيىستى نۇسقاۋلار بەرەمىن.
وتكەن جىلعى «رەالعا» قارسى ويىننىڭ ناتيجەسى ەرتەڭگى ماتچتا «لەگيا» ويىندارىنا قوسىمشا كۇش بەرۋى مۇمكىن بە؟
ارينە, ول ويىن ەسىمىزدە. ول ماتچقا جەتۋ ءۇشىن ءبىز چەمپيون اتانۋىمىز كەرەك بولدى. ارينە ول وتكەننىڭ ەنشىسىندە قالدى. ەندى ەرتەڭگى ويىندى ويلاۋىمىز كەرەك.
«استاناعا» ادەتتەگىدەي 18 ويىنشى 22 شاكىرتىڭىزدى ەرتىپ كەلدىڭىز. وعان نە سەبەپ؟
ءبىز حالىقارالىق ويىندارعا ىلعي دا كوبىرەك ويىنشى اكەلۋدى ءجون كورەمىز. استانا ۆارشاۆادان وتە الىس. كەيبىر ويىنشىلارىمىز ماڭىزدى ساتتە ءوزىن جايسىز سەزىنىپ قالۋى مۇمكىن. ءبىز بارلىعىنا جان-جاقتى دايىن بولۋىمىز كەرەك. «لەگيا» ساپىندا ءالى ويناماعان ويىنشىلار بار. ەرتەڭ ولاردى قولدانۋىمىز مۇمكىن. سونداي-اق, بۇل ويىنعا ەكى تاكتيكا قولدانۋدى جوسپارلادىق. قاي ءادىستى قولداناتىمىز بەلگىلى بولادى.
«استانا» باپكەرى «لەگيادان» ءوتۋ مۇمكىندىگىن بەس پايىزعا باعالادى. ال ءسىز ءوز كومانداڭىزدى قانشا پايىزعا باعالايسىز؟
مەن ءۇشىن 50-50. سەبەبى, ەكى ويىن وتەدى. ستانيمير ستويلوۆ مىرزا بەس پايىز دەگەنمەن باسقا ناتيجەنى كۇتۋى مۇمكىن. ءبىز ءمادريدتىڭ «رەالىنا» قارسى ويىندا جەڭۋ مۇمكىندگىمىزدى نەبارى ءبىر پايىزعا باعالانعانبىز. بىراق سوڭىندا قانداي ناتيجەمەن اياقتالعانىن كوردىڭىزدەر.
ايان ءابدۋالي,
«ەگەمەن قازاقستان»
