ءبىزدى ەرتەڭ ماڭىزدى ءارى جاۋاپتى ويىن كۇتىپ تۇر. «استانا» ءوز دەڭگەيىنەن جوعارى ونەر كورسەتۋى كەرەك. سوڭعى كەزدەرى ەلوردالىق ۇجىم ءوز دارەجەسىندە ويناي الماي ءجۇر. «لەگيا» ءسوزسىز بۇل كەزدەسۋدىڭ ءفاۆوريتى بولىپ ەسەپتەلەدى. دەگەنمەن, ءار ويىندا فاۆوريتتەر عانا جەڭە بەرمەيتىنى بەسەنەدەن بەلگىلى. كىمنىڭ جەڭىسكە دەگەن قۇلشىنىسى جوعارى بولسا, سول باسىم بولادى.
مارين توماسوۆتى تىزىمگە قوسىپ ۇلگەردىڭىزدەر مە؟
ازىرگە بۇل ماسەلە شەشىمىن تاپقان جوق. ويىنشىلاردى تولىعىمەن تىركەۋ ءۇشىن ءبىزدىڭ ازداعان بولسىن ۋاقىتىمىز بار. ءبارى مەن ويلاعانداي بولادى دەپ ويلايمىن.
وتكەن ويىننان كەيىن كوماندانىڭ ءوتۋ دەڭگەيىن تومەن باعالادىڭىز…
ءبىز جاتتىعۋ كەزىندە قولىمىزدان كەلگەننىڭ ءبارىن جاسادىق. ماكسيمالدى دەڭگەيگە كوتەرۋ ءۇشىن تىنباي دايىندالدىق.
بۇل ويىندا قاقپاعا گول جىبەرمەۋ ەڭ باستى ماقسات پا؟
ارينە, گول جىبەرمەۋ باستى ماقساتتارىمىزدىڭ ءبىرى. دەگەنمەن دە ءوز تاكتيكامىزدى قولدانىپ, جەڭىسكە جەتۋگە تىرىسۋىمىز كەرەك.
سينتەتيكالىق الاڭدا ونەر كورسەتۋ «استاناعا» باسىمدىلىق بولىپ ەسەپتەلە مە؟
بۇرىنعى الاڭ جاقسى ەدى. قازىر جاڭاسى بولعاندىقتان ازداپ قيىنداۋ. دوپ تا جىلدام ۇشپايدى. بىراق باستىسى ەكى كوماندا ءبىر الاڭدا وينايدى ەمەس پە؟!
«سپارتاك», «توبىل» كوماندالارىنا قارسى ويىنداعى نەگىزگى قۇرامدا وزگەرىس بولا ما؟
توماسوۆتىڭ جاعدايى ازىرگە ناقتى بەلگىسىز. ءبارىن ەرتەڭ ويىن الدىندا جىگىتتەردىڭ دايىندىعىنا قاراي كورەمىز.
لاسلو كلياينحايسلەر ەرتەڭگى ويىندا الاڭنىڭ قاي تۇسىندا وينايدى؟
لاسلونىڭ قاي تۇستا وينايتىنى ەرتەڭ ءبىر-اق بەلگىلى بولادى.
«توبىلعا» قارسى ويىندا قاقپاعا نەناد ەريچ شىقتى. ال ەرتەڭ كىمدى شىعارۋدى جوسپارلاپ وتىرسىز؟
قاقپاشىلارىمىز قازىر جوعارى دەڭگەيدە ونەر كورسەتىپ ءجۇر. سوندىقتان ەرتەڭ كىمدى شىعاراتىنىم قازىر بەلگىسىز.
«لەگيانىڭ» سوڭعى ويىندارىن كوردىڭىز بە؟ بۇل ۇجىمعا قانداي باعا بەرەسىز؟
البەتتە. ولاردىڭ چەميوناتتارىنىڭ دەڭگەيى جوعارى. ول جاقتا چەمپيوناتتىڭ سوڭعى تۋرلارى ءوتىپ جاتىر. ءبارى بارىن سالىپ ونەر كورسەتىپ ءجۇر.
ايتا كەتەيىك, وتكەن اينالىمدا «سپارتاك» كومانداسىنا قارسى ويىننان كەيىن ستانيمير ستويلوۆ پولشالىق ۇجىمنان ءوتۋ مۇمكىندىگىن بەس-اق پايىزعا باعالاعان بولاتىن. ال «لەگياعا» قارسى ويىن ەرتەڭ 20:00-دە «استانا ارەنا» ستاديونىندا وتەدى.
ايان ءابدۋالي,
«ەگەمەن قازاقستان»
