كۇرەس
تايلاند استاناسى بانگكوكتا كۇرەس تۇرلەرىنەن كادەتتەر اراسىندا ازيا چەمپيوناتى اياقتالدى. قازاقستاندىق ەركىن كۇرەس بالۋاندارى ءبىر التىن, ەكى كۇمىس جانە ءۇش قولا مەدال يەلەندى. 69 كيلودا مەيرامبەك سۇلەيمەنوۆ ازيا چەمپيونى اتانسا, 46 كيلودا بەلدەسكەن ەلامان قادىرسەيىت پەن اقبار قۇربانوۆ (50 كگ) كۇمىس مەدال يەلەندى. داۋلەت تەمىرجانوۆ (54 كيلو), داۋلەت ءتاجىباي (58 كيلو), ساۆەت ابىلاي (85 كيلو) ازيا چەمپيوناتىنىڭ قولا جۇلدەگەرى اتاندى.
ال قىزدار كۇرەسىنەن مارال تاڭىربەرگەنوۆا (38 كگ), اياجان مارقاشەۆا (43 كگ) جانە البينا قايىرگەلدينوۆا (63 كگ) كۇمىس مەدال يەلەنسە, 40 كيلودا ەل نامىسىن قورعاعان ايدانا سۇلتانوۆا قولا جۇلدەنى قاناعات تۇتتى.
گرەك-ريم كۇرەسىنىڭ جاس بالۋاندارى ءۇش التىن, ءبىر كۇمىس مەدال جەڭىپ الدى. ەركەبۇلان ارداقوۆ (46 كگ), راحات ساعىمباي (63 كيلو) مەن داۋلەت جالعاسوۆ (76 كگ) ءوز سالماقتارىندا ازيانىڭ تەڭدەسسىز سپورتشىسى اتانسا, 42 كيلو سالماقتا كۇرەسكەن ەراسىل مامىربەكوۆ كۇمىس مەدالعا يە بولدى.
تەننيس
استاناداعى «داۋلەت» ۇلتتىق تەننيس ورتالىعىندا تەننيستەن قازاقستان رەسپۋبليكاسى پرەزيدەنتى كۋبوگى اياقتالدى. حالىقارالىق تۋرنيرگە بيىل الىس-جاقىن شەتەلدىڭ 21 ەلىنەن كەلگەن 200-دەن اسا الەمنىڭ ۇزدىك تەننيسشىلەرى باعىن سىنادى.
ءتۋرنيردىڭ ەرلەر اراسىنداعى فينالدىق باسەكەگە وتانداسىمىز ميحايل كۋكۋشكين مەن بەلورۋسسيالىق تەننيسشى ەگور گەراسيموۆ شىققان بولاتىن. ءۇش سەتكە سوزىلعان ويىندا ەگور گەراسيموۆ 7:6 (11:9), 4:6, 6:4 ەسەبىمەن جەڭىسكە جەتىپ, «پرەزيدەنت كۋبوگى-2017» جارىسىنىڭ جەڭىمپازى اتاندى. ايتا كەتەيىك, ءتۋرنيردىڭ فينالىنا شىققانى ءۇشىن كۋكۋشكين اتر رەيتينگىندە 16 ساتى جوعارىلاپ, 102-ورىنعا تۇراقتادى.
ۆەلوسپورت
ۆەلوسپورتتان «تۋر دە فرانس-2017» ۆەلوكوپكۇندىگىنىڭ بيىلعى جارىسى ءوز مارەسىنە جەتتى. فرانتسيا تاسجولدارىندا وتكەن جىلدىڭ ءىرى تۋرنيرىندە Sky كومانداسىنىڭ بريتانيالىق سپورتشىسى كريس فرۋم جەڭىمپاز اتاندى. ول قاتارىنان ءۇشىنشى, ال جالپى ءتورتىنشى رەت (2013, 2015, 2016, 2017) جەڭىسكە جەتىپ وتىر.
ال «استانا» ۆەلوكومانداسىنىڭ كاپيتانى فابيو ارۋ ءتۋرنيردى بەسىنشى ورىنمەن اياقتادى. قازاقستان ۆەلوسپورت فەدەراتسياسىنىڭ پرەزيدەنتى دارحان قالەتاەۆ «استانانىڭ» بيىلعى ناتيجەسىنە كوڭىلى تولاتىنىن جەتكىزدى.
ءالي بيتورە,
«ەگەمەن قازاقستان»
