تابيعاتتىڭ تىلسىم سىرلارىنىڭ ءبارى دە ادام بويىنان كورىنىس تاۋىپ وتىرادى. كەيدە كەيبىر ادامداردىڭ بولمىسىنان اقىلعا سىيمايتىن, ساناعا باعىنبايتىن قۇبىلىستاردى دا بايقاپ قالامىز. مۇندايدا جاراتىلىستىڭ جۇمباعىن جانىمىزبەن ءتۇسىنىپ, كوڭىلىمىزبەن ءتۇيسىنىپ كورۋگە تالپىنۋعا تۋرا كەلەدى. ايتسە دە اركىم ءتۇسىنىپ بولمايتىن ەرەكشە جاعدايلار ەل اراسىندا ءجيى كەزدەسەدى.
ايرىقشا دارىنىمەن ەلدى تاڭداندىرىپ, حالىقتىڭ ىقىلاسىنا يە بولعاندار كوپ بولماسا دا بار. ارينە مۇنداي جاندارعا كوپشىلىكتىڭ تاڭدانا ءارى قىزىعا قارايتىنى ءسوزسىز. تاراز قالاسىندا تۇراتىن سەگىز جاسار نۇرداۋلەتتىڭ دە ەشكىمدە كەزدەسە بەرمەيتىن ەرەكشە قابىلەتى كوپتى تاڭداندىرماي قويمايدى. «ماگنيت بالا» اتانىپ كەتكەن ونىڭ بويىندا ماگنيتتىك تارتىلىس كۇشى بار ەكەن. تەمىردەن جاسالعان كەز كەلگەن كىشىگىرىم زاتتاردى بالا دەنەسىنە جاقىنداتقاندا, تۋرا ءبىر ماگنيتكە قويعانداي جابىسىپ قالادى. اۋەلى اس قاسىقتارىن جابىستىرىپ كورگەن ول بۇگىندە ۇيالى تەلەفون, پلانشەت سياقتى زاتتاردى دا كەۋدەسىندە ۇستاپ تۇرا بەرەدى. ەندى تابيعاتتىڭ مۇنداي عاجايىبىنا تاڭدانباسقا امال جوق.
نۇرداۋلەت تاراز قالاسىنداعى №29 مەكتەپتە وقيدى. بيىل ەكىنشى سىنىپقا كوشكەن بالا اۋەل باستان-اق ءوزىنىڭ العىر ءارى زەرەك ەكەنىن بايقاتىپتى. ساباق ۇلگەرىمى دە وتە جاقسى. بالانىڭ التى جاسىندا ويانعان ەرەكشە قابىلەتىن ءبىرىنشى بولىپ اتاسى ارىستانبەك بايقاعان ەكەن. بالانىڭ اناسى ايدا ونىڭ دەنەسىنە جابىساتىن تەمىر قۇرالدارىنىڭ كۇن ساناپ ارتىپ كەلە جاتقانىن, ءتىپتى كەيدە ول مىنگەن كولىكتىڭ دە جۇرمەي قالاتىنىن ايتادى. ءارى كۇن وتكەن سايىن ەشكىم ءتۇسىنىپ بولمايتىن قىرلارىنىڭ اشىلىپ كەلە جاتقانىن اڭگىمەلەدى. دەگەنمەن, زەرەك ءارى اقىلدى نۇرداۋلەت ەكسپو-2017 كورمەسىن تاماشالاۋ ءۇشىن استانا قالاسىنا ساپارلاپ كەتىپتى. ەل مەرەيىن اسىرعان ايتۋلى كورمەگە قىزىعۋشىلىق تانىتىپ, تاماشالاۋعا كەتكەنى دە نۇرداۋلەتتىڭ ويلاۋ قابىلەتىنىڭ ەرەكشەلىگىن تانىتسا كەرەك.
قالاي بولعاندا دا, بالانىڭ بويىندا ءبىر قاسيەتتىڭ بارى انىق. ايتپەسە ادامنىڭ دەنەسىنە تەمىردىڭ جابىسىپ قالۋى سيرەك قۇبىلىس قوي. بىراق ادام بالاسى ومىردە ءتۇرلى تىلسىمدارعا كۋا بولادى. ءومىر بارىسى كۇتپەگەن عاجايىپتاردى العا توسادى. ءبىز دە ءبۇلدىرشىننىڭ جولىنىڭ اشىق بولۋىن جانە ومىردە جولىنىڭ اق بولۋىن تىلەدىك.
حاميت ەسامان,
«ەگەمەن قازاقستان»
جامبىل وبلىسى
