بۇل تۋرالى وبلىس اكىمى بەردىبەك ساپارباەۆ وڭىردەگى بارلىق بۇقارالىق اقپارات قۇرالدارى باسشىلارمەن, رەداكتورلارمەن جانە جۋرناليستەرمەن كەزدەسۋىندە دايەكتى دالەلدەر كەلتىرە وتىرىپ, ناقتى باياندادى.
ايتا كەتەيىك, ەكونوميكانىڭ بەلسەندى ءوسىمى وبلىستىڭ رەسپۋبليكاداعى شاپشاڭ داميتىن وڭىرلەرلەردىڭ بەستىگىنە كىرۋىنە مۇمكىندىك بەردى. ەسەپتى كەزەڭدە ونەركاسىپتىك ءونىم ءوندىرىسىنىڭ كولەمى 4,9 پايىز ارتتى. ونەركاسىپ كاسىپورىندارى 700 ملرد تەڭگەنىڭ ءونىمىن ءوندىردى. وڭدەۋ ونەركاسىبى 111,4 پايىزعا ءوستى. اتالمىش كورسەتكىش بويىنشا وبلىس ەلىمىزدەگى وڭىرلەر اراسىندا ەكىنشى ورىنعا كوتەرىلدى. نەگىزگى كاپيتالعا قۇيىلعان ينۆەستيتسيا 131,8 پايىزدى قۇرادى. بۇل وزگە وڭىرلەرمەن سالىستىرعاندا اناعۇرلىم جوعارى كورسەتكىش بولىپ تابىلادى. ءوڭىر ەكونوميكاسىنا 160 ملرد تەڭگەدەن استام قارجى تارتىلدى. اعىمداعى جىلى 1700 جاڭا جۇمىس ورنىن اشا وتىرىپ, جالپى قۇنى 33 ملرد تەڭگە بولاتىن 17 ينۆەستيتسيالىق جوبانى جۇزەگە اسىرۋ كوزدەلۋدە. جالپى, وسى كەزەڭدە وڭىردە 8,2 مىڭ جاڭا جۇمىس ورنى قۇرىلدى.
اۋىل شارۋاشىلىعىنىڭ جالپى ءونىمى دە 103,7 پايىزعا ءوستى. وبلىستا «كووپەراتسيا تۋرالى» زاڭ ءتيىمدى جۇزەگە اسىرىلۋدا, قازىردىڭ وزىندە 171 كووپەراتيۆ قۇرىلدى, تاعى 26-سى وسى جىلدىڭ سوڭىنا دەيىن جۇمىسىن باستايتىن بولادى.
سونداي-اق, قۇرىلىس جۇمىستارىنىڭ كولەمى 111 پايىزعا ءوسىپ, 242 مىڭ شارشى مەتر تۇرعىن ءۇي پايدالانۋعا بەرىلدى. ال جىل سوڭىنا دەيىن كەم دەگەندە 650 مىڭ شارشى مەتر تۇرعىن ءۇي سالىنادى. جەكە تۇرعىن ءۇي قۇرىلىسىن دامىتۋ اياسىندا وسى جىلى 15 مىڭ جەر تەلىمىن بەرۋ جوسپارلانۋدا. ايتا كەتۋ كەرەك, اقتوبە – قازاقستانداعى «نۇرلى جەر» باعدارلاماسى اياسىندا «تاۋنحاۋس» تيپىندەگى ءۇش قاباتتى نەسيەلىك جانە تەز تۇرعىزىلاتىن جەكە تۇرعىن ۇيلەردىڭ قۇرىلىسىن جۇرگىزىپ جاتقان قالالاردىڭ بىردەن-ءبىرى. ءبىرىنشى كەزەڭدە 210 مىڭ شارشى مەتر تۇرعىن ءۇي نەمەسە 2952 پاتەر, سونىڭ ىشىندە 2017 جىلى 914 پاتەر سالىنباق. بەلسەندى تۇرعىن ءۇي قۇرىلىسىمەن قاتار قالانى كوركەيتۋ جانە كوگالداندىرۋ جۇمىستارى جۇرگىزىلۋدە.
ءوڭىر باسشىسىنىڭ ايتۋىنشا, 2017 جىلى وبلىستا سالىنىپ جاتقان 23 مەكتەپتىڭ 14-ءى پايدالانۋعا بەرىلىپ, 5450 ورىندىق مەكتەپكە دەيىنگى بالالار مەكەمەسى اشىلاتىن بولادى.وڭىردە ساپالى ءارى قولجەتىمدى مەديتسينانىڭ دامۋىنا دا باسا نازار اۋدارىلۋدا. اقتوبەدە باتىسقازاقستاندىق مەديتسينا كلاستەرىن دامىتۋ جۇمىستارى جالعاسۋدا. وسى جىلدىڭ وزىندە 29 دەنساۋلىق ساقتاۋ نىسانىن, سونىڭ ىشىندە اۋدانداردا سالۋ قاراستىرىلعان.
وڭىردە سونداي-اق, كولىك-لوگيستيكا سالاسىن بەلسەندى دامىتۋ جالعاستىرىلادى. وسى جىلى بارلىعى 141 شاقىرىمدىق رەسپۋبليكالىق ماڭىزى بار جولدار 2,3 ملرد تەڭگەگە, 298,5 شاقىرىمدىق وبلىستىق جانە جەرگىلىكتى ماڭىزى بار جولدار 8,8 ملرد تەڭگەگە ورتاشا جوندەۋ جۇمىستارىن قاجەت ەتەدى. «اقتوبە-ور» كولىك جولىن قايتا قالپىنا كەلتىرۋ, اقتوبە قالاسىنان شىعاتىن جولداعى وتپەجولدى سالۋ سەكىلدى ت.ب. ءىرى جوبالاردى جۇزەگە اسىرۋ باستالدى.
وبلىستا مال ازىعىن دايىنداۋ دا قارقىندى جۇرگىزىلۋدە. جالپى, وڭىردە قول جەتكەن بيىكتەن الاسارماۋدىڭ بارلىق العىشارتتارى بار.
تەمىر قۇسايىن,
«ەگەمەن قازاقستان»
اقتوبە
