ەڭ اۋەلى اقجار اۋىلىنىڭ قاق ورتاسىندا ۇلى ابايدىڭ ەڭسەلى ەسكەرتكىشى سالتاناتتى تۇردە اشىلدى. بيىكتىگى تۇعىرىمەن قوسا العاندا 7 مەتر بولاتىن تۋىندىنىڭ اۆتورى – تارباعاتايدىڭ تۋماسى, ەسىمى ەلگە بەلگىلى سۋرەتشى الىبەك شوقانوۆ. «بۇل – مەنىڭ تارباعاتاي اۋدانىنداعى ەكىنشى ابايىم. بىلتىر اقسۋات اۋىلىندا ھاكىمنىڭ ءمۇسىنى قويىلعان بولاتىن. ەسكەرتكىشتى قاشاۋعا ەكى اي ۋاقىت جۇمسادىم. ارينە, وڭاي بولدى دەپ ايتا المايمىن. ۇلى اقىنعا بۇعان دەيىن قويىلعان ەسكەرتكىشتەردىڭ بارلىعىن مۇقيات قاراپ شىقتىم. دانىشپاننىڭ ويلى كەيىپتەگى بەينەسىن كورسەتۋگە تىرىستىم. جۇرەك تۇسىندا – وڭ قولى, سول قولىندا – كىتابى. سوندىقتان بۇل جەرگە كەلگەن ادام اقىننىڭ ولەڭدەرىن, قارا سوزدەرىن ەسكە الىپ, تۇلعا رۋحىنا باس يەدى دەپ ويلايمىن», دەيدى سۋرەتشى. ەسكەرتكىشتىڭ اشىلۋ سالتاناتىنا اقىننىڭ تۋعان توپىراعى – اباي اۋدانىنان ايگىلى جازۋشى مۇحتار اۋەزوۆتىڭ رۋحاني ءىنىسى بولعان, قالامگەر كامەن ءورازاليننىڭ ۇلى ەلدار ورازالين مەن اسەت مىرزاقاسىم ارنايى قاتىسىپ, ۇلىلار ەلىنىڭ لەبىزىن جەتكىزدى. سونىمەن قاتار اقجاردا بەلگىلى جۋرناليست, قالامگەر, ۇزاق جىلدار وبلىستىق «رۋدنىي التاي» گازەتىندە قىزمەت اتقارعان شاكەرحان ازمۇحانبەتوۆتىڭ «ۇكىلى نايزا ۇستاعان ءۇش بايجىگىت» اتتى كىتابىنىڭ تۇساۋكەسەر ءراسىمى ءوتىپ, شارا سوڭىندا كىتاپ اۆتورىنا «تارباعاتاي اۋدانىنىڭ قۇرمەتتى ازاماتى» اتاعى تابىس ەتىلدى.
ءدال وسى كۇنى ماڭىراق اۋىلىندا دا بىرقاتار يگى شارالار ۇيىمداستىرىلدى. شارانىڭ ەڭ ۇلكەنى – قاراكەرەي قابانبايدىڭ نەمەرە ءىنىسى ءارى ۇزەڭگىلەس سەرىگى بولعان, جەتىسۋ, تارباعاتاي, التاي ولكەلەرىن جوڭعارلاردان ازات ەتۋ جورىقتارىندا ەرلىگىمەن كوزگە تۇسكەن داۋلەتباي باتىر مەن ءباھادۇردىڭ ۇرپاعى, اقىن ءارىمجان جانۇزاق ۇلىنا ەڭسەلى ەسكەرتكىشتىڭ قويىلۋى. ەرەكشە اتاپ وتەرلىگى, قوس ەسكەرتكىش تە «تۋعان جەرگە – تاعزىم» اكتسياسى اياسىندا بوي كوتەرگەن.
اۋدان اكىمى دىلدابەك ورازباەۆ ەلگە تۇتقا, جەرگە پانا بولعان ەرلەردىڭ ەسىمدەرىن ۇلىقتاپ, ۇرپاق جادىندا جاڭعىرتۋ ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىنىڭ اياسىندا قولعا الىنىپ جاتقانىن, مەملەكەت باسشىسىنىڭ تولعامى اۋىلداعى ازاماتتاردىڭ جىگەرىن جانىپ, ۇلكەن سەرپىن بەرگەنىن, تۋعان جەرگە دەگەن قۇرمەتىن ارتتىرا تۇسكەنىن ايتادى. ماسەلەن, ەكپىن اۋىلىنىڭ تۋماسى, كاسىپكەر دۋلات تاستەكەەۆ تۋعان اۋىلىنداعى ءبىر كوشەنى 15 ميلليون تەڭگەگە تولىقتاي اسفالتتاپ بەرىپتى. مۇنداي مىسالداردى كوپتەپ كەلتىرۋگە بولادى. «بۇرىن اۋدان ورتالىعى بولعان, شالعايداعى اقجار وڭىرىنە ءاردايىم كوڭىل ءبولىپ كەلەمىز. الاشتىڭ عانا ەمەس, ادامزاتتىڭ اقىنىنا اينالعان اباي ەسكەرتكىشى پاريجدە بار, ماسكەۋدە بار, بەيجىڭدە بار. جالپى, ۇلى اقىنعا ەلىمىزدىڭ قاي قالاسىنا, قاي اۋدانىنا, قاي اۋىلىنا ەسكەرتكىش قويساق تا ارتىقتىق ەتپەيدى. ويتكەنى اباي – بارشا قازاقتىڭ ابايى. ال ۇلى تۇلعانىڭ اقجاردىڭ تورىنەن ورىن الۋى ەلدى مەكەننىڭ ەڭسەسىن تىكتەپ, مۇنداعى يگى ىستەردىڭ ەسەلەنە تۇسۋىنە جول اشادى دەپ ويلايمىز», دەگەن اۋدان باسشىسى جاقىن كۇندەرى اقسۋاتتا «تۋعان جەرگە تۋىڭدى تىك» اتتى حالىقارالىق ايتىس ۇيىمداستىرىلىپ, ساسان بي مەن تانا مىرزاعا دا ەڭسەلى ەسكەرتكىش قويىلاتىنىن جەتكىزدى.
ازامات قاسىم,
«ەگەمەن قازاقستان»
شىعىس قازاقستان وبلىسى,
تارباعاتاي اۋدانى
