– بىراق ول ايتۋعا عانا وڭاي! – دەيدى باتىس قازاقستان وبلىستىق پەريناتالدىق ورتالىعى ديرەكتورىنىڭ ەمدەۋ ءىسى جونىندەگى ورىنباسارى ەسەت ەرالين.
شالا تۋعان بالاعا ەرەكشە كۇتىم كەرەك. تىماققا سالىپ, كەرەگەنىڭ باسىنا ءىلىپ قوياتىن باياعى زامان جوق. قۇدايعا شۇكىر, قازىر پەرزەنتحانالاردا ۋاقىتىنان ەرتە تۋعان, ءتۇرلى اۋىتقۋى بار نارەستەلەرگە كۇتىم كورسەتەتىن مەديتسينالىق اپپاراتتار بار عوي. سونىڭ وزىندە ءومىر مەن ءولىم اراسىنداعى ارپالىستان امان قالعان ءاربىر ءسابيدىڭ تاعدىرى – دارىگەرلەر ءۇشىن زور جەڭىس, ۇلكەن قۋانىش.
پەريناتالدىق ورتالىقتى ارالاپ كەلەمىز. ەسەت عابيت ۇلى بۇرىلىس-قالتارىسى كوپ ۇزىن دالىزبەن ءجۇرىپ كەلىپ, ءبىر قابىرعانى الىپ تۇرعان ۇلكەن سۋرەتتى تاقتانىڭ الدىنا توقتادى. تاقتادا شالا تۋعان, دۇنيەگە كەلگەندە سالماعى از بولعان سابيلەردىڭ جاڭا تۋعان كەزىندەگى سۋرەتى مەن كەيىن وسكەن كەزدەگى باقىتتى بەينەسى ىلىنگەن ەكەن.
– مىناۋ اندريۋشينا, دۇنيەگە كەلگەندە سالماعى 763 گرامم عانا بولعان ەدى. قازىر 2,5 جاستا. ال مىناۋ – اپالى-ءسىڭلىلى قۇرماشەۆالار, ومىرگە كەلگەن كەزدە ۇشەم قىزدىڭ ءبىرى – 1280, ءبىرى – 1320, ءۇشىنشىسى – 2400 گرامم بولعان ەدى, مىنا سۋرەتتە بي كويلەگىن كيىپ, بوي تۇزەي قالعانىن كورمەيسىز بە؟! ومىرگە 817 گرامم بولىپ كەلگەن بەرنيازوۆا, 718 گرامم بولعان بەككەر دە بوي جەتتى. سالماعى 1 كەلىگە جەتەر-جەتپەس بولىپ كەلگەن قاجىمۇراتوۆا – قازىر وقۋ وزاتى. جارىق دۇنيە ەسىگىن نەبارى 876 گرامم بولىپ اشقان عاينۋللين دا جىگىت بولىپ قالدى, – دەپ تانىستىرا باستايدى ەسەت عابيت ۇلى. داۋىسىنان ماقتانىش سەزىلەدى.
ەسەت عابيت ۇلى – 2002 جىلى م.وسپانوۆ اتىنداعى باتىس قازاقستان مەديتسينالىق اكادەمياسىن بىتىرگەن اكۋشەر-گينەكولوگ. باتىس قازاقستان وبلىسىنىڭ جاڭاقالا اۋدانىندا, ورال قالالىق №2 پەرزەنتحانادا اكۋشەر-گينەكولوگ, بوساندىرۋ بولىمشەسىنىڭ مەڭگەرۋشىسى قىزمەتىن اتقارعان. 2015 جىلعى ماۋسىمنان بەرى باتىس قازاقستان وبلىستىق پەريناتالدىق ورتالىعى ديرەكتورىنىڭ ەمدەۋ جۇمىسى جونىندەگى ورىنباسارى.
ەسەت عابيت ۇلىن ارىپتەستەرى جوعارى بىلىكتى ساناتتاعى دارىگەر اكۋشەر-گينەكولوگ رەتىندە ەرەكشە سىيلايدى. «جەدەل اكۋشەرلىك-گينەكولوگيالىق كومەك كورسەتۋدە اكۋشەرلىك جاردەمنىڭ بارلىق ءتۇرىن, جۇكتى ايەلدەر مەن بوساناتىن ايەلدەردى كونسەرۆاتيۆتىك ەمدەۋدىڭ تاكتيكاسىن مەڭگەرگەن. ءوز جۇمىسىندا جاڭا مەديتسينالىق تەحنولوگيالاردى پايدالانادى. بىرنەشە رەت انا مەن بالا ومىرىنە قاۋىپ توندىرگەن جاعدايلارعا قاتىسىپ, مۇنداي جاعدايلاردان ارقاشان ءساتتى ناتيجەمەن شىعىپ كەلەدى. ديرەكتوردىڭ ورىنباسارى لاۋازىمىندا ەڭبەك ەتە وتىرىپ, كاسىبي ۇجىم قۇرا ءبىلدى. اكۋشەريا مەن گينەكولوگياداعى سىني جاعدايلار كەزىندە كەزەك كۇتتىرمەيتىن كومەك كورسەتۋدىڭ بارلىق تۇرلەرىن مەڭگەرگەن, ءوزىنىڭ كاسىبي دەڭگەيىن ۇنەمى ارتتىرىپ وتىرادى» دەلىنگەن ەكەن كەيىپكەرىمىزدى جوعارى مەملەكەتتىك ناگرادا ۇسىنعان قۇجاتتا.
– بىلتىر اقساي قالاسىندا وقىس وقيعا بولدى. ءبىر كەلىنشەكتىڭ ۇستىنە قوقىس كونتەينەرى قۇلاپ كەتكەن. قول-اياعى سىنىپ, باسىنا زاقىم كەلگەن ايەلدىڭ قۇرساعىندا التى ايلىق بالاسى بار ەدى, - دەپ ەسكە الادى ەسەت ەرالين.
ناۋقاس بىردەن اقساي اۋرۋحاناسىنا جەتكىزىلگەن. ول جەردە العاشقى مەديتسينالىق كومەك كورسەتىلگەن سوڭ ورال قالاسىنا اكەلىندى. نەيروحيرۋرگتەر مەن تراۆماتولوگتەر وتالارىن جاساپ, ايەل ءوز-وزىنە كەلگەن سوڭ اكۋشەر-گينەكولوگتار بولاشاق انانى قامقورلىققا الدى.
– ءبىز قۇرساقتاعى ءسابيدىڭ جەتىلۋىن, انا مەن بالانىڭ دەنساۋلىعىن مۇقيات باقىلاپ, قولدان كەلگەنشە جاعداي جاسادىق. ءسويتىپ, ۋاقىتى كەلگەندە كەسار تىلىگىن جاساپ, ءسابيدى دۇنيەگە اكەلدىك. قۇدايعا شۇكىر, انا دا, بالا دا امان! بۇل وقيعا دارىگەر قاۋىمىنا ۇلكەن سىن بولدى, ابىرويمەن وتكەنىمىزگە قۋانامىز, – دەيدى ەسەت عابيت ۇلى.
كەيىپكەرىمىزدىڭ وسى سالادا ەڭبەك ەتىپ جۇرگەنىنە 14 جىلدان اسىپ بارادى. «كىندىگىن كەسكەن بالالارىم 2 مىڭنان اسقان شىعار», دەيدى ول ك ۇلىپ.
قۇدايعا شۇكىر, جىل باسىنان بەرى پەرزەنتحانادا انا ولىمىنە جول بەرىلگەن جوق. بالا تۋ كورسەتكىشى دە جىل سايىن ءوسىپ كەلەدى. ورتالىق ماماندارى جەدەل دارىگەرلىك كومەك قاجەت بولسا, وبلىستىڭ كەز كەلگەن تۇكپىرىنە اتتانىپ كەتۋگە دايار. سانيتارلىق اۆياتسيا ارقىلى اكۋشەر-گينەكولوگتار 2016 جىلى 55 مارتە جولعا شىعىپتى. بيىلدىڭ وزىندە 16 شاقىرتۋ بولعان.
– بۇگىندە عىلىم دامىدى, تەحنولوگيا جەتىلدى. ينتەرنەت ارقىلى اۋىل-اۋدانداعى ارىپتەستەرىمىزگە كاسىبي كەڭەس بەرۋ, اقىلداسۋ وڭايلادى. ساناۆياتسيا كومەگى دە كەز كەلگەن ۋاقىتتا دايىن. سوندىقتان, ءوز تاراپىمىزدان انا مەن بالاعا كاسىبي مەديتسينالىق جاردەم كورسەتۋگە ارقاشان دايىنبىز. تەك ءبىزدىڭ بولاشاق انالارىمىز تاراپىنان دا جاۋاپكەرشىلىك كەرەك-اق. جۇكتىلىك كەزەڭىندە ۋاقىتىمەن تىركەۋگە تۇرۋ, ۋزي-دەن ءوتۋ, ءوز دەنساۋلىعىن كۇتۋ تۋرالى بولاشاق انالارعا ايتۋدان, قايتالاۋدان جالىقپايمىز. ويتكەنى ومىرگە پەرزەنت اكەلۋدەن, جاڭا ادام اكەلۋدەن ارتىق جاۋاپتى نارسە جوق قوي, – دەيدى ەسەت عابيت ۇلى.
قازبەك قۇتتىمۇرات ۇلى,
«ەگەمەن قازاقستان»
ورال
