قوعامدىق تىڭداۋ بارىسىندا اتالعان شارانىڭ بارىسى تۋرالى ايتىلىپ, قاتىسۋشىلاردىڭ پىكىرلەرى مەن ەسكەرتپەلەرى تىڭدالدى. «جاستار» عىلىمي-زەرتتەۋ ورتالىعىنىڭ ديرەكتورى تالعات قاليەۆتىڭ ايتۋىنشا, وسىنداي ۇلكەن لاگەر ۇيىمداستىرۋ ەلدىڭ تۇراقتىلىعى مەن دامۋىنىڭ بەلگىسى ىسپەتتى. «ەلدىڭ رۋحاني جاڭعىرۋىن وسىنداي بايلانىستار ارقىلى دامىتا الامىز. سونداي-اق, بۇل جاستاردىڭ باسەكەلەستىككە قابىلەتتىلىگىن ارتتىرىپ, ءبىلىم كوكجيەگىن كەڭەيتەتىنى ءسوزسىز», – دەيدى تالعات قاليەۆ.
«نۇر وتان» پارتياسى «جاس وتان» جق توراعاسى دانيار ماناربەك ۇلى اتاپ وتكەندەي, جازعى لاگەردە تۇركى كەڭەسى جاستارى اراسىندا مادەنيەت ارالىق بايلانىس, جاستار ساياساتى سالاسىندا وزىق تاجىريبە مەن يننوۆاتسيالىق جوبالار الماستى.
جيىنعا كەلگەن قوناقتار دا جازعى لاگەرگە قاتىستى ءوز پىكىرلەرىمەن ءبولىستى. قازاقستان كۆن وداعىنىڭ پرەزيدەنتى ەسەن ەلەۋكەننىڭ پىكىرىنشە, تۇركى جاستارىنىڭ باسىن بىرىكتىرەتىن جوبالاردىڭ كوپ بولۋى قۇپتارلىق ارەكەت. ء«بىزدىڭ كۆن وداعى دا تۇركى جاستارىنا ارنالعان «جايدارمان» ويىندارىن ۇيىمداستىرىپ كەلەدى. باستاپقىدا ونىڭ ومىرشەڭدىگىنە كۇمانمەن قاراعاندار بولعان. الايدا تۇركى جاستارى اراسىندا «جايدارمان» وتكىزۋدىڭ مۇمكىن ەكەنىن دالەلدەي الدىق. وسى ورايدا, جازعى لاگەرگە قاتىساتىن ەلدەر سانىن ارتتىرۋدى ۇسىنعىم كەلەدى. ماسەلەن, كورشى رەسەيدەگى ءتۇبى تۇركى ۇلتتار قازاقستانعا ۇلكەن ۇمىتپەن قارايدى», – دەيدى ەسەن ەلەۋكەن.
جازعى لاگەردى ۇيىمداستىرۋشىلارى شاراعا اۋەلى تۇركى كەڭەسىنىڭ قۇرامىنداعى مەملەكەت وكىلدەرىن عانا شاقىرعان ەكەن. الايدا الداعى ۋاقىتتا قاتىسۋشى ەلدەر سانىن ۇلعايتاتىنىن ايتادى. ال ءدىن ىستەرى جانە ازاماتتىق قوعام مينيسترلىگى وكىلدەرى مۇنداي جازعى لاگەردى جىل سايىن وتكىزۋ جوسپاردا بار ەكەنىن جانە ونى ءار ەلدە ۇيىمداستىرىلاتىنىن مالىمدەدى.
سونىمەن قاتار, قوعامدىق تىڭداۋدىڭ سوڭىندا «نۇر وتان» پارتياسى «جاس وتان» جاستار قاناتى توراعاسى دانيار سۇندەتباەۆ پەن «حازار» ازەربايجان ەتنو-مادەني ورتالىعى» جاستار قاناتى توراعاسى ينايات ميفتاليەۆ «قازاقتار سەكىلدى ءومىر ءسۇرۋ» جوباسىن جۇزەگە اسىرۋ بويىنشا مەموراندۋمعا قول قويدى. جوبا ۇيىمداستىرۋشىلارى 3 اي مەرزىمىندە 16 وبلىس, 22 قالانى ارالاپ, كوپشىلىككە حالقىمىزدىڭ مادەنيەتىن, تۇرمىس-تىرشىلىگىن, ءداستۇرىن, فولكلورىن تانىستىرۋدى ماقسات ەتىپ وتىر.
ەستەرىڭىزدە بولسا, 10-16 شىلدە ارالىعىندا اقمولا وبلىسى, زەرەندى اۋىلىندا ءدىن ىستەرى جانە ازاماتتىق قوعام مينيسترلىگى جانە «جاس وتان» جاستار قاناتى كورپوراتيۆتىك قورىنىڭ ۇيىمداستىرۋىمەن تۇركى كەڭەسىنىڭ حالىقارالىق جازعى لاگەرى وتكەن بولاتىن. وعان قازاقستان, ءازىربايجان, تۇركيا جانە قىرعىزستان ەلدەرىنەن كەلگەن 100-گە جۋىق بەلسەندى جاستار قاتىستى. ءتورت ەلدىڭ جاستارىن جيناعان جيىن بارىسىندا توپ قۇرۋعا ارنالعان ترەنينگتەر, كوشباسشىلىق قابىلەتتى دامىتۋ تاسىلدەرى, SMM جۇرگىزۋگە بايلانىستى سەمينارلار وتكىزىلدى. شاراعا جينالعاندار جاستار ساياساتىن جۇرگىزۋگە ارنالعان جوبالاردى ىسكە اسىرۋدىڭ ادىستەرىمەن ءبولىسىپ, تاجىريبە الماستى. سونداي-اق, قاتىسۋشىلار ەلباسىنىڭ «بولاشاققا باعدار: رۋحاني جاڭعىرۋ» ماقالاسىنىڭ نەگىزگى باسىمدىقتارىنا باعىتتالعان ديسكۋسسيالىق الاڭ وتكىزدى.
لاگەردى ۇيىمداستىرۋشىلاردىڭ سوزىنە سۇيەنسەك, بۇل شارا تۇركى مەملەكەتتەرى اراسىنداعى قاتىناستىڭ جاقسارۋىنا, مادەنيەت ارالىق بايلانىسقا, ءتۇرلى دەڭگەيدەگى جاستار جوبالارىن بىرىكتىرۋگە مۇمكىندىك جاسايدى. سونداي-اق, اشىق پىكىر الماسۋ جانە جاستار ۇيىمى مەن كوشباسشىلارى قارىم-قاتىناسىن نىعايتۋ دا وسى جازعى لاگەردىڭ ماقساتتارىنىڭ ءبىرى.
اباي اسانكەلدى ۇلى,
«ەگەمەن قازاقستان»
