«TOKYO ROPE MFG., CO. LTD» باسقارۋشى كومپانياسىنىڭ شەشىمى نەگىزىندە رۋميل تاۋفيكوۆ «Tokyo Rope Almaty» كومپانياسى ديرەكتورلار كەڭەسىنىڭ توراعاسى بولىپ تاعايىندالدى. حابارلامادا ايتىلعانىنداي, ول جاڭا قىزمەتىندە كومپانياعا تىكەلەي باسشىلىق جاساۋمەن قاتار وڭتۇستىك استانانىڭ يندۋستريالدى ايماعىنداعى الماتى مەتيز زاۋىتى قۇرىلىسى جوباسىن جانە زاۋىت ونىمدەرىن جاقىن جانە شەتەلدەرگە, سونىڭ ىشىندە ساۋد ارابياسىنا, وزبەكستانعا, قىرعىزستان مەن رەسەيگە جانە نورۆەگياعا جەتكىزۋ باعدارلاماسىن جۇزەگە اسىرۋمەن اينالىسادى.
الماتى قالاسى اكىمىنىڭ ءباسپاسوز قىزمەتى ءمالىم ەتكەندەي, مەتالدان جاسالعان اسا ءتوزىمدى تەمىر تورلار مەن پانەلدەر شىعاراتىن «Tokyo Rope Almaty» اتتى العاشقى زاۋىت وتكەن جىلدىڭ قاراشا ايىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ قاتىسۋىمەن اشىلعان ەدى. مەملەكەت باسشىسى جاپونيا پرەمەر-ءمينيسترى سيندزو ابەمەن كەزدەسۋ بارىسىندا تاراپتار ەكىجاقتى ىنتىماقتاستىقتى نىعايتۋعا ۋاعداسلاقان بولاتىن.
مەملەكەت باسشىسىنىڭ جاپونياعا ساپارىنان سوڭ الماتىدا جاپوندىق ىسكەرلىك كلۋبى مەن جاپوندىق يندۋستريالدى پارك قۇرىلدى, ال شىلدە ايىندا جاپوندىق «Tokyo Rope Manufacturing» ترانسۇلتتىق كومپانياسى ينجەنەرلىك جۇيەلەردى قورعايتىن ءونىم شىعاراتىن الماتىداعى ەكىنشى جوعارىتەحنولوگيالى زاۋىت سالىناتىن جەرگە كاپسۋلانى قاققان بولاتىن.
«Tokyo Rope Manufacturing» ديرەكتورلار كەڭەسىنىڭ توراعاسى شيگەتو تاناكي بۇل زاۋىتتىڭ جاپونيادان وزگە ەلدە بالاماسى جوق ەرەكشە كاسىپورىن ەكەنىن ايتقان بولاتىن. يندۋستريالدى ايماقتاعى 4 گەكتار جەرگە ورنالاساتىن زاۋىتتى ىسكە قوسۋ ءۇشىن شەتەلدىك كومپانيا جۇمسايتىن ينۆەستيتسيا كولەمى 3,6 ملرد. تەڭگەنى قۇرايدى.مۇندا جوعارى ساپالى مەتالل تروستار, تاۋلى جانە كارەرلى جۇمىستار ءۇشىن بولاتتان جاسالىپ, قورعاسىنمەن قاپتالعان تورلار, بۋروسۆايلىق انكەرالار جانە باسقا دا ونىمدەر شىعارىلادى. ونىمدەردە قازاقستاندىق مازمۇننىڭ ۇلەسى بولعاندىقتان وزىندىك قۇنى دا ءبىرشاما ارزان. ءوندىرىس كولەمى بويىنشا جىلىنا 17 مىڭ توننا ءونىم شىعارىلادى. زاۋىتتى ىسكە قوسۋ 2018 جىلعا جوسپارلانعان.
«Tokyo Rope» كومپانياسىنىڭ نەگىزى وسىدان 130 جىل بۇرىن قالانعان, بولات ارقاندار شىعارۋ بويىنشا الەمدە جەتەكشى ءرول اتقارادى, سونىمەن قاتار سەلگە, داۋىلعا, ءتۇرلى تاس كوشكىندەرىنە قارسى ءتۇراتىن نىسانداردى سالۋدى جوبالاۋمەن, مونتاجداۋمەن دە اينالىسادى. بۇگىنگى كۇنى الەمدەگى ءىرى 20 كوپىردىڭ 12-ءسى (بوسفور بۇعازىنىڭ, سۋەتس كانالىنىڭ بويىنداعى, گونكونگتەگى الەمدەگى ەڭ ۇزىن ستوۋنكاتەرس كوپىرلەرى) جاپوندىق مەتالل ارقاندارىن پايدالانىپ سالىنعان. جاپونيادا شىعاتىن ءاربىر ءتورتىنشى اۆتوكولىكتە «Tokyo Rope» ونىمدەرى بار. كومپانيا جەدەل ليفتەرگە جانە ينجەنەرلىك قورعانىسقا قاجەت جوعارى ساپالى ونىمدەر شىعارۋمەن دە تانىمال.
ەستەرىڭىزگە سالا كەتەيىك, جاڭا تاعايىنداۋعا دەيىن رۋميل تاۋفيكوۆ الماتى قالاسى اكىمىنىڭ ورىنباسارى قىزمەتىندە بولدى. ول جولاۋشى كولىگى جانە اۆتوموبيل جولدارى باسقارماسىنا باسشىلىق جاساي وتىرىپ, قالانىڭ كولىك قۇرىلىمىن رەفورمالاۋدى بەلسەندى جۇرگىزدى, جالاقى جونىندەگى قارىزدى 1 ملرد. تەڭگەگە ازايتىپ, جۇمىسپەن قامتۋ جانە ميگراتسيا ماسەلەسىمەن اينالىستى. توتەنشە جاعدايلار دەپارتامەنتىمەن بىرگە توتەنشە جاعدايلاردىڭ الدىن الۋ جانە جويۋ, مورەندى كولدەردىڭ تايازدانۋىن بولدىرماۋ بارىسىندا قوماقتى جۇمىستار جۇرگىزدى, حالىقتى جۇمىسپەن قامتۋ جانە الەۋمەتتىك باعدارلامالاردى جۇزەگە اسىرۋ بويىنشا ۇتىمدى شەشىمدەر قابىلدادى, دەنساۋلىق ساقتاۋ باسقارماسىنا باسشىلىق جاساي وتىرىپ, مىندەتتى مەديتسينالىق ساقتاندىرۋ جۇيەسىن ەنگىزۋگە جانە باسقادا ماڭىزدى شارالاردى جۇزەگە اسىرۋعا تىكەلەي ىقپال ەتتى.
