– ۆارشاۆادا وقىعان قازاق جاستارىنىڭ باسى مەن ەمەس قوي, – دەپ جىميادى ارىستانبەك. – XX عاسىردىڭ باسىندا ءبىلىم الۋعا ۇمتىلعاندار كوبىنە ورال, سەمەي, ۆەرنىي جانە تاشكەنت سياقتى قالالارداعى گيمنازيالاردا وقىعان. كەيىن الىس-جاقىن ءىرى قالالارداعى ينستيتۋتتاردا ءبىلىمىن جالعاستىرعان. 1910-1920 جىلدارى ۆارشاۆادا وقىعان زيالىلاردىڭ اراسىندا قاناي بورانباەۆ, ءابىلماجىن كۇشىكوۆ تە بولعان. قاناي بورانباەۆ كەيىننەن قازسسر-ءىنىڭ ادىلەت حالىق كوميسسارى-رەسپۋبليكا پروكۋرورى لاۋازىمىندا بولىپ, سوت, پروكۋراتۋرا ورگاندارىنىڭ قالىپتاسۋىنا, كادرلاردى تاربيەلەۋدە وزىندىك قولتاڭباسىن قالدىردى. ال ءابىلماجىن كۇشىكوۆكە كەلسەك, اۋىل شارۋاشىلىعى سالاسىنا زور ۇلەس قوسقان, – دەيدى ارىستانبەك.
ارىستانبەك ورىنباساروۆ ۆارشاۆانىڭ «Vistula» ۋنيۆەرسيتەتىندە وقىپ, «حالىقارالىق ەكونوميكا» باكالاۆرى دارەجەسىن الدى. 2015 جىلى ەۋروپا مەن ازيانى قازاقستان ارقىلى قوسۋعا باعىتتالعان «زاماناۋي جىبەك جولى جوباسى» دەگەن تاقىرىپتا ديپلومدىق جۇمىسىن جازىپتى.
– ديپلومدىق جۇمىسىم «قازاقستاننىڭ كوزىمەن: جاڭا جىبەك جولى باستامالارى» («The New Silk Road Initiatives From Kazakhstan`s Perspective») دەپ اتالادى. وندا ۇلى جىبەك جولىنىڭ زامانىنداعى ماڭىزدىلىعىن ايقىنداي كەلىپ, قازىرگى تاڭداعى قىتايدىڭ, اقش-تىڭ, ەۋروپا وداعىنىڭ جانە رەسەيدىڭ ازيا مەن ەۋروپانى ورتالىق ازيا ارقىلى) جاقىنداستىرا تۇسەتىن جوبالارىنىڭ قازاقستان ءۇشىن ماڭىزدىلىعى سيپاتتالادى.
قازاقستانداعى «نۇرلى جول» ەكونوميكالىق ساياساتىنىڭ نەگىزگى ماقساتتارىنىڭ ءبىرى – اتاپ وتكەن باستامالاردى ءبىر جەرگە توپتاستىرىپ, ەلىمىزدە شيكىزاتقا تاۋەلدى ەمەس جاڭا ءبىر دامۋ باعىتىن اشۋ ەكەنى ءسوز بولادى. ديسسەرتاتسيامدى گارۆارد ۋنيۆەرسيتەتىنىڭ تۇلەگى, جىبەك جولى سالاسىندا 40 جىلعا تاياۋ تاجىريبە جيناقتاعان پولياك پروفەسسورى ۆويچەح حيۋبنەردىڭ باعىت-باعدارىمەن جازىپ شىقتىم. ادامگەرشىلىگى مول, ءبىلىمى مەن بىلىكتىلىگى اسا جوعارى, پوليگلوت حيۋبنەردەن ديسسەرتاتسيا جازعان 6 اي ىشىندە ەكونوميكالىق ءبىلىم عانا ەمەس, سابىرلىلىق پەن كىشىپەيىلدىلىك سەكىلدى ادامي قاسيەتتەرگە باۋلۋ كۋرسىنان وتكەندەيمىن, – دەيدى ارىستانبەك.
باكالاۆرياتتى تامامداعان كەزدە كەيىپكەرىمىزگە ۆيستۋلا ۋنيۆەرسيتەتىنەن جانە حالىقارالىق 5-6 كومپانيادان جۇمىسقا شاقىرعان ۇسىنىس تۇسكەن. ارىستانبەك ءبىلىمىن جالعاستىرۋدى قالادى. بۇگىندە ول لەون كوزمينسكي اتىنداعى ۋنيۆەرسيتەتتىڭ ماگيستراتۋراسىندا وقيدى. بۇيىرسا, قارجى سالاسىن تەرەڭ يگەرىپ, ينۆەستيتسيالار بويىنشا مامان بولىپ شىقپاق.
– تاڭداۋ اراسىندا نازارباەۆ ۋنيۆەرسيتەت, ۆارشاۆا ۋنيۆەرسيتەتى جانە گەرمانيانىڭ بىرنەشە الدىڭعى قاتارلى ۋنيۆەرسيتەتتەرى بولدى. كوڭىلىمنەن شىققانى لەون كوزمينسكي اتىنداعى ۆارشاۆا ۋنيۆەرسيتەتى بولىپ تۇر. بۇل وقۋ ورنىندا پولشانىڭ عانا ەمەس, باسقا دا ەلدەردىڭ ەڭ ۇزدىك پروفەسسورلارى ءدارىس وقيدى ءارى ماگيستراتۋرامەن قوسا, بۇل جوعارى وقۋ ورنى ەكونوميكا سالاسىندا قىزمەت ەتۋگە مۇمكىندىك بەرەدى, – دەيدى كەيىپكەرىمىز.
ماگيستراتۋرادا وقۋمەن قاتار بۇگىندە ارىستانبەك ينستيتۋتسيالىق ينۆەستورلارعا قىزمەت كورسەتەتىن ەۋروپاداعى ەڭ ءىرى بانك ۆارشاۆاداعى بولىمشەسىندە ەڭبەك ەتىپ ءجۇر.
جىل سايىن ۇزدىك ستۋدەنتتەردى وقيتىن سالاسىنا قاراي ءتۇرلى مەكەمەلەر مەن كومپانيالارعا, كونفەرەنتسيالارعا, تاجىريبەگە ءارى قىزمەتكە دە شاقىرىپ جاتادى. سوڭعى قاتىسقان كونفەرەنتسيام – وتكەن جىلدىڭ 19-28 شىلدە ارالىعىندا اۋستريانىڭ زالتسبۋرگ قالاسىندا ەۋروپا وداعىنىڭ باستاماسىمەن جۇزەگە اسقان «GLOPOLINT Salzburg» ەدى. كونفەرەنتسيادا باستى تالقىلانعان ماسەلەلەر دەموكراتيا, جاھاندانۋ, ادام قۇقىقتارى ءارى ساياسي جۇيەلەرى توڭىرەگىندە ءوربىدى. اۋستريا, گەرمانيا سەكىلدى ەۋروپانىڭ وزىق مەملەكەتتەرىنىڭ ماماندارىمەن تاجىريبە الماسۋدىڭ اسەرى مول. ونىڭ ەرتەڭ ەلگە ورالىپ قىزمەت ەتكەندە پايدالى بولاتىنىنا نىق سەنىمدىمىن, – دەيدى ارىستانبەك.
كەزىندە الاش ارىستارى وقىعان شاھاردا ءبىلىم الۋىمەن قاتار ارىستانبەك سولاردىڭ ءىزىن جالعاستىرىپ, قازاقستاننىڭ ەكونوميكاسى, وركەنيەتى دامىعان وزىق ەلدەردىڭ قاتارىنا قوسىلۋعا ءوز ۇلەسىن قوسپاقشى. العان ءبىلىم-بىلىگىن, تاجىريبەسىن تۋعان ەلىنىڭ قاجەتىنە جاراتقاننان ارتىق ماقتانىش بار ما؟!
قازبەك قۇتتىمۇرات ۇلى,
«ەگەمەن قازاقستان»
