كوپشىلىك نازارىن «استانا» كونتسەرت زالىنداعى اتىراۋ وبلىستىق تاريحي-ولكەتانۋ مۋزەيىنىڭ كورمەسى ەرەكشە اۋداردى. مۋزەيدىڭ ءبولىم مەڭگەرۋشىسى وكسانا ءالجانوۆانىڭ ايتۋىنشا, استاناعا 700-دەن استام ءار ءتۇرلى جادىگەر اكەلىنگەن. قۇندى دۇنيەلەر قاتارىندا جىلوي اۋدانىنداعى ارالتوبە قورعانىن قازۋ كەزىندە ەكىنشى «التىن ادامنىڭ» قابىرىنەن تابىلعان قولا قانجار مەن قايراق تاس بار. كۇي اناسى دينا نۇرپەيىسوۆانىڭ 1954 جىلى سوڭعى رەت كونتسەرتكە قاتىسقان كەزىندە تاققان كۇمىس بەلبەۋى دە كورمەنىڭ كوركىن كەلتىرىپ تۇر.
– مۋزەي جادىگەرلەرىنىڭ اراسىندا قولدان جاسالعان دومبىرا بار. ءبىر ەرەكشەلىگى, ونى دايىنداۋعا مالدىڭ سۇيەگى مەن تازا كۇمىس پايدالانىلعان. مۋزەيگە ونى ماحامبەت اۋدانىنىڭ تۇرعىندارى لەكەروۆتەر وتباسى تابىستادى. دومبىرانى 1906 جىلى ارعى اتالارى ءوز قولىمەن جاساعان ەكەن, – دەيدى وكسانا ءالجانوۆا.
ماحامبەت اۋدانىنداعى سارايشىق ەسكى شاھارىنىڭ ورنىنا قازبا جۇمىستارى كەزىندە تابىلعان جادىگەرلەر ايرىقشا نازار اۋدارتادى. مىسال رەتىندە, XIII عاسىرعا جاتاتىن جىلتىر قىتاي فارفورىنان جاسالعان ىدىستى ايتۋعا بولادى. مۇنداي قىش ىدىستار داۋلەتتى ادامداردىڭ اراسىندا ۇلكەن سۇرانىسقا يە بولعان, ەگەر ۋ قۇياتىن بولسا, ىدىس ءتۇسىن وزگەرتەدى ەكەن.
كونە قالا ورنىنان تابىلعان جادىگەرلەر اراسىنان ءيتتىڭ ءىزى بار كىرپىشتى كورۋگە بولادى. مۋزەي قىزمەتكەرىنىڭ ايتۋىنشا, ەرتەدە ءۇيدىڭ ىرگەتاسىنا ءيتتىڭ ءىزى بەدەرلەنگەن كىرپىشتى قويسا, ول شاڭىراق باقىت پەن بايلىقتىڭ ورداسىنا اينالادى دەپ سەنگەن.
باقىتگۇل باباش,
«ەگەمەن قازاقستان»
سۋرەتتى تۇسىرگەن
راقىم قويلىباەۆ
