اسىرەسە, قازاقستان رەسپۋبليكاسىنىڭ قىلمىستىق-اتقارۋ كودەكسىن ءتۇسىندىرۋ ماقساتىندا ءىىم قىلمىستىق-اتقارۋ جۇيەسى كوميتەتى سوتتالعان ادامدار ءۇشىن كۇقىقتىق ءتۇسىندىرۋ جۇمىسىن ۇدايى جۇرگىزۋدە. ماسەلەن, وتكەن جىلدىڭ وزىندە تۇزەۋ مەكەمەلەرىندە اتالعان كودەكستىڭ نورمالارىن ءتۇسىندىرۋ بويىنشا 18 مىڭنان استام ءدارىس وتكىزىلگەن.
ونىڭ بىرنەشەۋى قىلمىستىق اتقارۋ جۇيەسى كوميتەتىنە قاراستى استانا قالاسىنداعى ەتس-166/1 مەكەمەسىندە ۇيىمداستىرىلعان. مەكەمە باسشىسى, ادىلەت مايورى مۇرات ورالباەۆ مۇندا باسشىلىق تىزگىنىن قولعا العانىنا از ۋاقىت بولعانىمەن, ول بۇل جەردە جەتى جىلدان بەرى ەڭبەك ەتىپ كەلەدى ەكەن. ىشكى جاعدايدىڭ احۋالىن بەس ساۋساعىنداي بىلەتىن بىلىكتى مامان ءا دەگەندە مەكەمەدەگى تەرگەۋ كابينەتتەرىنىڭ سانىن كوبەيتۋگە كىرىسىپتى.
«كوپتەن بەرى وسى جەردە قىزمەت ەتكەندىكتەن مۇنداعى تەرگەۋ كابينەتتەرىنىڭ ازدىعى ارىپتەستەرىمدى دە الاڭداتاتىن. سوندىقتان دا جاڭا وسى ولقىلىقتىڭ ورنىن تولتىرۋدى ءجون سانادىق. ناتيجەسىندە, جۋىردا عانا 9 تەرگەۋ كابينەتىن تالاپقا ساي ىسكە قوسىلدى. جالپى اۋماعى 110 شارشى مەتردى قۇرايتىن جاڭا تەرگەۋ كابينەتتەرىنىڭ اشىلۋى قاجەتتىلىكتەن تۋىنداعان دۇنيە ەكەنى ءسوزسىز. سەبەبى, قورعاۋشىلار مەن تەرگەۋشىلەر كابينەتتىڭ بوساۋىن كەزەك كۇتىپ سابىلعاندىقتان, ناۋرىز ايىندا مەكەمە باسشىلىعى دوڭگەلەك ۇستەل ۇيىمداستىرىپ, وسىنداي شەشىم قابىلداعان ەدى. ەندى مىنە, قورعاۋشىلارعا بارىنشا قولايلى جاعداي جاسالدى», دەيدى مۇرات ساعىنباي ۇلى.
نەگىزىنەن, اتالعان مەكەمەدە مەملەكەت تاراپىنان بەرىلگەن ليميت 505 بولسا, بۇگىندە تەرگەۋدەگىلەردىڭ سانى 700-دەن اسىپ وتىر. بۇرىندارى وسى ۋاقىتتا بەكىتىلگەن ليميتتەن اسۋ بولماعان ەكەن. سوندىقتان دا جاڭا تەرگەۋ كابينەتتەرىنىڭ اشىلۋىن – ءتۇرلى قولايسىزدىقتاردىڭ الدىن الۋ شاراسى رەتىندە باعالاۋعا بولاتىنداي.
ال ەندى تەرگەۋدەگىلەر مەن سوتتالعاندارعا كۇندەلىكتى قاجەتتىلىكتەن باسقا قانداي جاعداي جاسالعان دەگەن ماسەلە توڭىرەگىندە ايتار بولساق, قازىرگى كەزدە مەكەمەدە تەرگەۋدەگىلەر مەن سوتتالعاندارعا ارنالعان كىتاپحانا جۇمىس ىستەيدى. جۋىردا عانا تولىق جوندەۋدەن وتكەن بۇل كىتاپحانانىڭ قورى ون مىڭعا جۋىقتايدى. سونداي-اق, ول ۋاقىت وتكەن سايىن جاڭارىپ وتىرادى. وسىلايشا, تەرگەۋدەگىلەردىڭ تاپسىرىسى بويىنشا كىتاپحانا قىزمەتكەرلەرى وقىرمانداردىڭ سۇرانىستارىن تۇراقتى تۇردە قامتاماسىز ەتىپ كەلەدى. ءتىپتى, مەكەمەدەگى شارۋاشىلىقپەن قامتاماسىز ەتۋ جاساعىنداعى سوتتالعاندار دا وسى كىتاپحانادان قاجەتتى ادەبيەتتەرىن الىپ, بوس ۋاقىتتارىن پايدالى ىسكە جۇمساپ جاتادى.
قازىرگى كەزدە شارۋاشىلىقپەن قامتاماسىز ەتۋ جاساعىندا ەلۋدەن اسا سوتتالعاندار بار دەسەك, ولاردىڭ ارقايسىسى وزدەرىنە جۇكتەلگەن مىندەتتەردى تياناقتى اتقارادى. ال دەمالىس جانە ءوزىن-ءوزى تاربيەلەۋ سەكتسياسى ءار مەرەكەدە كونتسەرتتەر ۇيىمداستىرىپ, جازاسىن وتەۋشىلەر اراسىندا سپورتتىق ويىنداردان سايىستار وتكىزدى.
بيىلعى جىلدىڭ مامىر ايىندا مەكەمەدە ەكى رەت اشىق ەسىك كۇنى وتكەن بولسا, ونىڭ ءبىرى قالالىق پروكۋراتۋرا تاراپىنان ۇيىمداستىرىلدى. سونداي-اق, مۇنداعى جازاسىن وتەۋشىلەر ازىرلەگەن شاعىن كونتسەرتتىك باعدارلامامەن اسپەتتەلگەن شارا اياسىندا سوتتالعانداردىڭ تۋعاندارى مەكەمە اۋماعىنا كىرىپ, جاقىندارىنىڭ جاتار ورنىن, تاماقتانار جەرى مەن بوس ۋاقىتتارىن وتكىزۋگە ارنالعان دەمالىس بولمەلەرىن, تازالىق كەشەندەرىن ارالاپ شىقتى. ءسويتىپ, كەلۋشىلەردىڭ باسىم بولىگى جاساقتاعى تازالىق پەن جاسالعان جاعدايدى كورىپ كوڭىلدەرىن ءبىر دەمدەپ قايتقان-دى.
نۇرلىبەك دوسىباي,
«ەگەمەن قازاقستان»
