مامانداردىڭ ايتۋىنشا, سوڭعى جىلدارى قالدىقتاردى قالپىنا كەلتىرۋ ماسەلەسىن وڭ جولعا قويۋعا باسا نازار اۋدارىلىپ كەلەدى. ماسەلەن, ءبىر عانا الماتى قالاسى مەن الماتى وبلىسىندا جىلىنا 20 مىڭ دوڭگەلەك جارامسىز بولادى. ونىڭ 70 پايىزى جەڭىل كولىكتەر دوڭگەلەگى بولسا, قالعان 30 پايىزى جۇك كولىكتەرىنە تيەسىلى. بۇل ءوز كەزەگىندە ءتۇرلى زيانكەستەردىڭ كوبەيۋى مەن قورشاعان ورتانىڭ لاستانۋىنا اكەلىپ سوعادى. مۇنى بولدىرماۋدىڭ جالعىز جولى – ىستەن شىققان ماتەريالداردى قايتا وڭدەپ باسقا دا جۇمىستارعا پايدالانۋ. ازىرگە 30 ادامدى جۇمىسپەن قامتىپ وتىرعان زاۋىتتىڭ العاشقى اياق الىسى جامان ەمەس. الداعى ۋاقىتتا اۋقىمىن كەڭەيتىپ, وندىرىستىك قۋاتىن ەكى ەسەگە دەيىن ارتتىرۋدى كوزدەپ وتىر.
– قازىر قالا مەن وبلىس اۋماقتارىن ارالاپ ەسكى, جارامسىز دوڭگەلەكتەردى جيناۋمەن اينالىسىپ كەلەمىز. بارلىق ازاماتتاردى وسى باستامانى قولداۋعا شاقىرىپ, ىستەن شىققان دوڭگەلەكتەرىن زاڭدى قۇجات بويىنشا بىزگە وتكىزۋلەرىن سۇرايمىز. دامىعان مەملەكەتتەردە جارامسىز قالدىقتاردى ارنايى مەكەمەلەرگە وتكىزۋ ءۇشىن ازاماتتار اقشا تولەيدى. ءبىز تەگىن قابىلدايمىز. قاي جەردەن بولسا دا دوڭگەلەكتەردى ءوزىمىز الىپ كەتەمىز. قۇر قوقىسقا اينالىپ جاتقانشا يگىلىككە جاراعانى جاقسى عوي. بىزدەن شىققان ونىمدەر بالالار الاڭىنىڭ توسەنىشىنە, گازونداردىڭ استىڭعى قاباتىنا توسەۋگە, سونداي-اق, ۇنتاقتالعان شينالار باسقا ەلدەردىڭ تاجىريبەسىندەگىدەي تاس جولداردىڭ قۇرامىنا قوسپا رەتىندە قوسىلادى. قازىرگى تاڭدا ەلىمىز اتالعان قوسپانى رەسەيدەن يمپورتتاپ وتىر, – دەيدى «Q-Recycling» شينا وڭدەۋ زاۋىتىنىڭ ديرەكتورى جاسۇلان سايكاتوۆ.
ماماندار كورشى ەلدەن يمپورتتالاتىن ءونىمنىڭ تونناسى 120 مىڭ تەڭگە بولسا, وزىمىزدە وندىرىلەتىن ءونىمنىڭ تونناسى 80 مىڭ تەڭگە بولاتىنىن ايتادى.
بۇگىنگى تاڭدا ەل اۋماعىندا جارامسىز دوڭگەلەكتەردى قايتا وڭدەۋمەن اينالىساتىن 10-عا جۋىق زاۋىت بار. الماتى اۋماعىندا بوي كوتەرگەن جاڭا زاۋىت وبلىستاعى شينا وڭدەيتىن تۇڭعىش زاۋىت بولىپ وتىر. جالپى قۇنى 150 ملن تەڭگەنى قۇرايتىن ءوندىرىس وشاعى جەكە ينۆەستورلاردىڭ قارجىلاندىرۋىمەن ىسكە قوسىلعان.
ارمان وكتيابر,
«ەگەمەن قازاقستان»
الماتى
