كورمەگە كەلگەن كوپشىلىك ءموردىڭ شىعۋ تاريحى جانە قالىپتاسۋى تۋرالى ءماتىن مەن اۋليەاتا ءوڭىرىنىڭ تاريحىنان سىر شەرتەتىن اۋقىمى ءبىر عاسىردى قامتيتىن قۇجاتتارعا باسىلعان ءمور ۇلگىلەرىمەن تانىستى. ونىڭ اينالاسىنا قازاق حاندارىنىڭ مورلەرىنىڭ كوشىرمەلەرى دە ايشىقتالىپ, كورمە ماڭىزىن ارتتىرا ءتۇستى. دوڭگەلەك ۇستەلدى جامبىل وبلىسى اكىمدىگىنىڭ مادەنيەت, ارحيۆتەر جانە قۇجاتتاما باسقارماسى باسشىسىنىڭ ورىنباسارى سارا ماديەۆا اشىپ, جۇرگىزىپ وتىردى. سارا قابىلبەكقىزى ءوز سوزىندە ءمور مەملەكەتتىك عانا ەمەس, جەكەلەگەن ادامداردىڭ دا تاريحى ەكەنىن, سونداي-اق قۇجاتتارداعى مورلەردى وڭدەپ, كورەرمەننىڭ نازارلارىنا ۇسىنۋ ءۇشىن ارنايى جابدىقتار مەن ماماندار قاجەت ەكەنىن اتاپ ءوتتى.
سونىمەن قاتار, جامبىل وبلىستىق ارداگەرلەر كەڭەسىنىڭ توراعاسى ەركىنبەك سولتىباەۆ, «ەجەلگى تاراز ەسكەرتكىشتەرى» تاريحي-مادەني قورىق-مۇراجايىنىڭ ديرەكتورى تاكەن مولداقىنوۆ, ارداگەر جۋرناليست, ولكەتانۋشى ماسكەۋ نوقرابەكوۆ, وبلىستىق كينو ورتالىعىنىڭ ديرەكتورى نۇرحات سەرىكباەۆ كورمە جايلى ءوز پىكىرلەرىمەن ءبولىستى. ال وبلىستىق تاريحي-ولكەتانۋ مۋزەيىنىڭ ديرەكتورى گۇلنۇر ەمبەرديەۆا مورلەردىڭ تاريحىن ەندىگى كەزەكتە مۋزەي قىزمەتكەرلەرى دە تەرەڭىرەك زەرتتەيتىنىن ايتىپ ءوتتى.
ءوز سوزىندە قازاقستاننىڭ قۇرمەتتى ءجۋرناليسى, يدەيا اۆتورى ماقۇلبەك رىسداۋلەت ء«مور كورمەسىن وتكىزۋ وتە سيرەك كەزدەسەدى. بۇگىنگى تاڭدا ءموردىڭ تاريحىمەن سفراگيستيكا دەپ اتالاتىن عىلىم اينالىساتىندىعىن ايتا كەتكىم كەلەدى. بۇل سالادا ءبىزدىڭ ەلىمىزدە دە ناقتى جۇمىستار كوپ اتقارىلعان ەمەس. سوعان قاراماستان وسى سالانىڭ دامۋىنا كىشكەنتاي دا بولسا ۇلەس قوسۋ ءۇشىن ارحيۆ قىزمەتكەرلەرى ەكى-ءۇش جىلدان بەرى تالماي, قاجىماي ەڭبەك ەتتى», دەپ كورمە مورلەرى تۋرالى باياندادى. وبلىستىق ارحيۆ قىزمەتكەرلەرى نازىم قوجاماروۆا مەن ساعىندىق زەينۋللا ۇلى كوپشىلىككە مورلەردى جەكە-جەكە تانىستىرىپ, ولاردىڭ تاريحىن اڭگىمەلەدى.
حاميت ەسامان,
"ەگەمەن قازاقستان"
