مەملەكەت باسشىسى ءسۇت-تاۋار فەرماسىن ارالاپ, وندا ساۋىن زالى مەن ءسۇت قابىلدايتىن تسەحتى كوردى.
سونداي-اق, ەلباسى وبلىستاعى اۋىل شارۋاشىلىعى ونىمدەرىن وندىرۋشىلەردىڭ جەتىستىكتەرىمەن تانىسىپ, ءوڭىردىڭ شارۋالارىمەن اڭگىمەلەستى.
– شىعىس قازاقستان وبلىسى ەكونوميكامىزدىڭ اگرارلىق سەكتورىندا ەرتەدەن قالىپتاسقان بەرىك داستۇرگە يە. قازاقستاندا اۋىل شارۋاشىلىعى سالاسىنىڭ الەۋەتى زور, بولاشاقتا بۇل سالاعا دەگەن سۇرانىس ارتا تۇسەدى. قازىر ءبىز ءۇشىن قىتاي حالىق رەسپۋبليكاسىنىڭ وراسان زور نارىعى اشىق, سىزدەر شىعاراتىن ءونىم شەت ەلدەرگە ەكسپورتتالا الادى, – دەدى نۇرسۇلتان نازارباەۆ.
سوڭىندا مەملەكەت باسشىسى كەزدەسۋگە قاتىسۋشىلارعا باق-بەرەكە جانە وندىرىستە جاڭا جەتىستىكتەر تىلەدى.
***
«مايلى داقىلداردىڭ تاجىريبەلىك شارۋاشىلىعى» جشس-ءى كۇنباعىس ءدانىن ءوسىرىپ-وندىرەتىن شارۋاشىلىق بولىپ تابىلادى ءارى تاڭداۋلى تۇقىم شارۋاشىلىعى مارتەبەسىنە يە. كاسىپورىن مايلى داقىلداردى سۇرىپتاۋمەن جانە تۇقىم وسىرۋمەن, ءمۇيىزدى ءىرى قارا مالدىڭ اسىل تۇقىمدى تۇرلەرىن جاقسارتۋمەن, اۋىل شارۋاشىلىعى ءونىمىن وندىرۋمەن, ساتۋمەن, قايتا وڭدەۋمەن, عىلىمي زەرتتەۋ جۇمىستارىنىڭ ناتيجەلەرىن اپروباتسيالاۋمەن جانە اياقتالعان عىلىمي ازىرلەمەلەردى وندىرىسكە ەنگىزۋمەن اينالىسادى.
