استانا مەديا ورتالىعىنداعى قالالىق ءبىلىم بەرۋ باسشىسىنىڭ مىندەتىن اتقارۋشى انۋار جانعوزيننىڭ ايتۋىنشا, وتكەن وقۋ جىلى استانانىڭ مەكتەپتەرىندە 9 588 ورىنعا جەتىسپەۋشىلىك بايقالعان, بيىل بۇل كورسەتكىش 17 مىڭدى قۇراۋى مۇمكىن.
«1-ءشى سىنىپقا كەلەتىن وقۋشىلار سانىنىڭ كۇرت وسۋىنە جانە كوشى-قون ماسەلەسىنە بايلانىستى قالا مەكتەپتەرىندە 2017-2018 وقۋ جىلىندا بولجام بويىنشا 17 مىڭ ورىن جەتىسپەيدى», – دەدى ا. جانعوزين.
ەلوردا اكىمدىگى مەكتەپتەر مەن باقشالاردا ورىن جەتىسپەۋشىلىك ماسەلەسىن كەشەندى تۇردە شەشۋدە. وسىلايشا 2017-2018 وقۋ جىلى 2600 ورىنعا شاقتالعان 5 مەكتەپتى پايدالانۋعا بەرۋ جوسپارلانعان. سونداي-اق ەلوردادا جىل سايىن كەم دەگەندە 10 جاڭا مەكتەپ سالىناتىن بولادى.
«6 مەكتەپتىڭ قۇرىلىسى باستالدى, جىل سوڭىنا دەيىن 4 ءبىلىم ورداسىن سالۋ جوسپارلانۋدا. جالپى العاندا 11 مىڭ ورىنعا ارنالعان 10 مەكتەپ سالىنادى, ول 2018-2019 جىلدارى پايدالانۋعا بەرىلەدى. وعان قوسا 13 مەكتەپتىڭ جوباسىن ىسكە اسىرۋ بويىنشا جۇمىس باستالىپ كەتتى. ءبىزدىڭ جوسپارىمىزدا – جىل سايىن 13-14 مەكتەپتى پايدالانۋعا بەرۋ», – دەدى ا. جانعوزين.
