قازىر وڭىردە قۇرىلىسقا اسا قاجەتتى ماتەريالدىڭ ءبىرى – شىنى بولىپ وتىر. وسى ورايدا «اقتوبە» الەۋمەتتىك-كاسىپكەرلىك كورپوراتسياسىنىڭ ەنشىلەس كومپانياسى «اقتوبە-شىنى» جشس شىنى شىعارۋ زاۋىتى قۇرىلىسى ينۆەستيتسيالىق جوباسىن قولعا العانىن تەك قۇپتاۋ عانا قاجەت. وسى نىساندى تۇرعىزۋ ءۇشىن بيۋدجەتتەن 214,3 ميلليون تەڭگە بولىنگەن ەكەن.
ايتسە دە, بيۋدجەت قاراجاتىن ءتيىمسىز پايدالانۋ سالدارىنان ينۆەستيتسيالىق جوبانىڭ جولى كەسىلگەن. ارينە, بۇل ارادا «اقتوبە» الەۋمەتتىك-كاسىپكەرلىك كورپوراتسياسىنىڭ باسى-قاسىندا جۇرگەندەر بارلىق ءىس-قيمىلدى ءبىرىنشى كەزەكتە زاۋىت قۇرىلىسىن جۇرگىزۋگە جۇمىلدىرۋى كەرەك ەدى. الايدا, ولار وزدەرىنىڭ تىكەلەي اتقارۋعا ءتيىستى مىندەتتەرىنە جاۋاپسىز, سالدىر-سالاق قاراعان. ءسويتىپ, نىساننىڭ ىرگەتاسىن كوتەرۋدىڭ ورنىنا 143,9 ميلليون تەڭگەگە ابدەن ەسكىرىپ, قاراۋسىز قالعان عيماراتتى ساتىپ الىپتى. سونىڭ سالدارىنان زاۋىت قۇرىلىسى توقتاپ قالدى. مەملەكەت اكتيۆتەرى ءتيىمدى تۇردە پايدالانىلماۋىنىڭ كەسىرىنەن شىنى شىعارۋ مەن ەنەرگيا ساقتاعىش پاكەتتەردى وندىرىسكە قويۋ ءىسى قۇردىمعا كەتىپ تىندى. ايتىپ ايتپاي نە كەرەك, ايتەۋىر كورپوراتسيا جەتەكشىلەرى 73 ميلليون تەنگەنى جارعىلىق كاپيتالداعى ۇلەسكە سالۋمەن عانا شەكتەلگەن. بۇعان دا تاۋبە دەرسىز. تۇتاستاي العاندا, «اقتوبە» الەۋمەتتىك-كاسىپكەرلىك كورپوراتسياسىنا قاراستى «ازيا اگرو حولدينگى», «بازارلاردى باسقارۋ», «باتىس اگرو-2008», «تابىس قالا» ەنشىلەس كاسىپورىندارىنا ۇستەمە اۋديتتىك باقىلاۋلار جۇرگىزۋ ناتيجەسىندە 648,8 ميلليون تەنگەنىڭ اكتيۆتەرى مەن بيۋدجەت قاراجاتتارى ءتيىمسىز پايدالانىلعانى بەلگىلى بولدى. بۇل كورىنىستىڭ ءوزى وڭىردەگى ينۆەستيتسيالىق جوبالاردى ىسكە اسىرۋعا اجەپتاۋىر نۇقسان كەلتىردى.
– ءسويتىپ, ايماقتاعى الەۋمەتتىك-ەكونوميكالىق ماڭىزى وتە جوعارى نىسانداردىڭ ءبىرى بەلگىلەنگەن ۋاقىتتا پايدالانۋعا بەرىلمەي قالدى. مۇنىڭ ءوزى وڭىردەگى شىنى ءوندىرىسى نارىعىن جولعا قويۋ جانە قوسىمشا جۇمىس ورىندارىن قۇرۋ جونىندەگى ءىس-قيمىل باعدارلاماسىنىڭ ويداعىداي ورىندالۋىنا كەرى اسەرىن تيگىزدى, – دەيدى اقتوبە وبلىسى بويىنشا تەكسەرۋ كوميسسياسىنىڭ توراعاسى ساعات ەڭسەگەن ۇلى.
ءيا, ينۆەستيتسيالىق جوبانىڭ تۇساۋى كەسىلدى دەپ كوتەرىڭكى كوڭىل كۇيمەن ءسوز ساپتاۋدىڭ ورنىنا, جولى كەسىلدى, زاۋىت قۇرىلىسى توقتاپ قالدى دەپ كۇيزەلە, قامىعا جازۋعا ءماجبۇر بولىپ وتىرعانىمىز وكىنىشتى-اق.
تەمىر قۇسايىن,
«ەگەمەن قازاقستان»
اقتوبە
