قازاقستاننىڭ 45 مەملەكەتتەگى قۇرمەتتى كونسۋلى مەن ءبىزدىڭ ەلىمىزدە تىركەلگەن 31 شەت مەملەكەتتىڭ 47 قۇرمەتتى كونسۋلى قاتىسقان القالى جيىنعا سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردى جەتەكشىلىك ەتتى. ول مەملەكەت باسشىسىنىڭ تاپسىرماسىمەن ينۆەستيتسيالىق كليماتتى جاقسارتۋعا باعىتتالعان ەل ۇكىمەتىنىڭ نەگىزگى جۇمىستارى تۋرالى باياندادى.
بۇگىنگى تاڭدا قازاقستان ينۆەستيتسيالىق احۋالدى جاقسارتىپ, ونىڭ جۇمىس ىستەۋ مۇمكىندىگىن كەڭەيتۋ ماقساتىندا جەڭىلدەتىلگەن سالىق ءتۇرىن ۇلتتىق زاڭنامامەن قامتاماسىز ەتىپ جاتقانى بەلگىلى. سىرتقى ىستەر ءمينيسترىنىڭ ءبىرىنشى ورىنباسارى ەكونوميكامىزدىڭ باسىمدىققا يە ءارتۇرلى سالاسىندا ينۆەستيتسيالىق جوبالاردى قولعا الىپ جاتقان ينۆەستورلارعا مۇنداي ارەكەتتەر مەملەكەت تاراپىنان اركەز كەپىلدەندىرىلەتىندىگىن اتاپ ءوتتى.
«سىرتقى ساياساتتاعى ۆەدومستۆولار ارقىلى ءبىز ءوز ارەكەتىمىزدى جاڭاشىل ءادىس-تاسىلدەرمەن جەتىلدىرىپ, قايتا جاڭعىرتۋ جۇمىستارىن جۇرگىزۋدەمىز. سونىڭ ناتيجەسىندە, قازاقستاندىق ەكونوميكانىڭ باسىم باعىتتارى يننوۆاتسيالىق تەحنولوگيالارمەن جاراقتاندىرىلىپ, شەتەلدىك ينۆەستيتسيا كولەمى ارتۋى ءتيىس. سونىمەن قاتار, وتاندىق ونىمدەردى شەت مەملەكەتتەردىڭ نارىعىنا شىعارۋ ءىسى دە سىرتقى ىستەر مينيسترلىگىنىڭ وسى كۇنگى نەگىزگى مىندەتتەرىنىڭ بىرىنە اينالىپ وتىر», دەدى م.تىلەۋبەردى ءوزىنىڭ سوزىندە.
سونداي-اق, وتىرىستا ءسوز العان ينۆەستيتسيالار جانە دامۋ ۆيتسە-ءمينيسترى ەرلان قايىروۆ قازىر قازاقستاندا شەتەلدىك ينۆەستيتسيالاردىڭ وڭدەۋ سالاسىنا سالىنۋى جەدەل ماقۇلداناتىندىعىن ايتىپ, سوڭعى كەزدەرى ونىڭ ەكونوميكاعا قۇيىلۋ كورسەتكىشىنىڭ كولەمى ءوسىپ كەلە جاتقانىن تىلگە تيەك ەتتى.
«سوڭعى ون ەكى جىلدىڭ ىشىندە قازاقستان ەكونوميكاسىنا 245 ملرد دوللاردان استام شەتەل ينۆەستيتسياسى قۇيىلدى. اشىعىن ايتۋ كەرەك, ول اقشانىڭ باسىم بولىگى پايدالى قازبالاردى يگەرۋگە جۇمسالدى. دەسەك تە, ۇكىمەتتىڭ ەندىگى كوزدەگەن ماقساتى – ينۆەستيتسيالاردى وڭدەۋ سالاسىنا تارتۋ», دەدى ول.
مۇحتار بەسكەن ۇلىنىڭ ايتۋىنشا, وتكەن جىلى ەل ەكونوميكاسىنا تارتىلعان ينۆەستيتسيالاردىڭ جالپى كولەمى 2015 جىلمەن سالىستىرعاندا 40 پايىزعا ارتىق بولعان. ال بيىلعى جىلدىڭ ءبىرىنشى توقسانىندا تىكەلەي شەتەل ينۆەستيتسيالارىنىڭ كولەمى 20 پايىزعا كوبەيگەن.
جيىنعا قاتىسۋشىلار اراسىندا وربىگەن اڭگىمە اۋانىنا قاراپ, قازاقستاندا بيزنەس-سەرىكتەستىكتىڭ ەركىن دامۋىنا مەيلىنشە قولايلى جاعداي جاسالىپ جاتقانىن وڭاي اڭعارۋعا بولادى. ول سىرتقى ىستەر مينيسترلىگى تاراپىنان جۇزەگە اسىرىلىپ جاتقان ۆيزالىق ساياساتتىڭ قالىپتاسۋىنان بايقالادى. ياعني, ۆيزاسىز كەڭىستىكتى ميگراتسيالىق زاڭ شەڭبەرىندە كەڭەيتۋ ينۆەستيتسيالىق احۋالدى جاقسارتىپ, ەلىمىزدىڭ تۋريستىك الەۋەتىن ارتتىراتىنى ءسوزسىز.
سونىمەن قاتار, قۇرمەتتى كونسۋلدار قاتىسقان وتىرىستا «Kazakh Invest» اق پەن «اتامەكەن» ۇك» اق جانە «بايتەرەك» ۇلتتىق باسقارۋشى حولدينگى» اق سىندى ەلدەگى الپاۋىت كومپانيالاردىڭ جەتەكشىلەرى ارنايى بايانداما جاساپ, وزدەرىنىڭ جوبالارى مەن نارىقتاعى مۇمكىندىكتەرىن تانىستىردى.
نۇرلىبەك دوسىباي,
«ەگەمەن قازاقستان»
