پەتروپاۆل قالاسىنىڭ 265 جىلدىعى اتاپ ءوتىلدى

ورتالىق الاڭدا ۇيىمداستىرىلعان «استانا مەنىڭ جۇرەگىمدە», «پەتروپاۆل–سۇيىكتى قالام» كونتسەرتتىك باعدارلامالاردا  قازاقستاننىڭ حالىق ءارتىسى روزا رىمباەۆا, «پەسنيارى»  ۆوكالدىق توبى ونەر كورسەتىپ, جۇرتشىلىقتىڭ ىستىق ءىلتيپاتىنا بولەندى.  ولارعا  جەرگىلىكتى جەرلەردەگى «ادەمى-اۋ», «ەككسپرومت», «تۋعان جەر», «اراي» , «سەگىز سەرى», تاعى باسقا بي, حالىقتىق  انسامبل, سيمفونيالىق وركەستر توپتارى قوسىلىپ, مەرەكە اجارىن اشا ءتۇستى.

تاريحي-ولكەتانۋ مۋزەيى جانىنا ورنالاستىرىلعان  استانا–ماقتانىشىمىز», «ارت-بۋلۆار» كورمەلەرىن قىزىقتاۋشىلار كوپ بولدى.

لوندون وليمپياداسىنىڭ چەمپيونى الەكساندر ۆينوكۋروۆ اتىنداعى سپورت سارايىنان باستالعان ۆەلومارافونعا  200-دەن  استام ادام قاتىسىپ, جەڭىمپازدار ارنايى جۇلدەلەردى  يەلەندى. «ەڭ جاس ۆەلوشاباندوز» اتالىمى بويىنشا 4 جاستاعى ەگور پاراحين  سورەگە  ءبىرىنشى بولىپ كەلدى.  ارداگەرلەر اراسىندا راشيد يسمايلوۆ جەڭىستىڭ ەڭ بيىك تۇعىرىنا كوتەرىلدى.  «سپورتتى سەرىك ەتكەن  وتباسى»  اتالىمىندا  مايەرلەرگە تەڭ كەلەر ەشكىم بولمادى.

وتاندى, ەلدى, جەردى, تۋعان قالانى سۇيۋگە ىنتىقتىراتىن باسقا دا شارالار تۇرعىندار كوڭىلىنەن شىعىپ, مەرەكە سوڭى جالپىحالىقتىق سەرۋەنگە, سپورتتىق ويىندارعا, ودان ءارى پەستروە كولى ماڭايىندا وتشاشۋعا ۇلاستى.

ءومىر ەسقالي,

«ەگەمەن قازاقستان».

سولتۇستىك قازاقستان وبلىسى.