«شانحاي اپتالىعى» دەپ اتالاتىن شارا شانحاي حالىقارالىق ساۋداعا جاردەمدەسۋ جونىندەگى كوميتەتتىڭ باستاماسىمەن ۇيىمداستىرىلعان. ءۇش كۇنگە جالعاساتىن مۇنداي جيىن قازاقستاندا العاش رەت وتۋدە. سالتاناتتى راسىمگە قازاقستان-قىتاي تاراپتارىنىڭ قۇزىرلى وكىلدەرى قاتىستى.
كورمەنىڭ باستى ماقساتى – شانحاي مەن قازاقستان اراسىنداعى ىسكەرلىك قاتىناستى نىعايتۋ جانە كەڭەيتۋ, قازاقستاندىق كومپانيالار مەن ەلوردا تۇرعىندارىنىڭ نازارىنا جاڭا قۇرىلعىلار مەن ونەركاسىپ سالاسىنداعى كەرەك-جاراقتاردى تانىستىرۋ. قىتاي كومپانيالارىنىڭ قازاقستان نارىعىنا دەگەن قىزىعۋشىلىعى استانادا ءوتىپ جاتقان ەكسپو-2017 حالىقارالىق شاراسىمەن دە, ەلدىڭ ەنەرگەتيكا, بالامالى ەنەرگەتيكا, ماشينا جاساۋ, قۇرىلىس, حيميا ونەركاسىبى سياقتى ەكونوميكا سالالارىن دامىتۋمەن دە بايلانىستى.
بۇل كورمە قازاقستاندىق كومپانيالاردىڭ قىتايدا جاسالعان ەڭ سوڭعى تەحنولوگيالارمەن تانىسۋىنا جانە اسپان استى ەلىنەن ىسكەرلىك سەرىكتەستەرىن تابۋىنا مۇمكىندىك بەرەدى. وعان شانحايدىڭ مىناداي كورپوراتسيالارى قاتىسۋدا: «Shanghai Electric Group CO», «Ltd», «Shenergy Group Co Ltd», «Shanghai GCL New Energy Investment Co», «CEFC China Energy Company Limited», «SAIC MOTOR CORPORATION LIMITED PASSENGER VEHICLE CO», «Bright Food (Group) Co», «Shangtex Holding Co», «Shanghai Building Materials (Group) Co», «SHANGHAI HUAYI (GROUP) COMPANY».
