ەۋروپا ليگاسى ءبىرىنشى ىرىكتەۋ كەزەڭىنىڭ قارىمتا كەزدەسۋىندە الماتىنىڭ «قايراتى» ليتۆالىق «اتلانتاسپەن» كەزدەستى.
العاشقى ماتچتا قارسىلاسىن 6:0 ەسەبىمەن ويسىراتا ۇتقان «قايرات» قارىمتا ويىندا دا «اتلانتاستان» باسىم ءتۇستى.
ءبىرىنشى تايمدا گول جىبەرگەنىنە قاراماستان تسحادادزە شاكىرتتەرى ويىن تىزگىنىن ءوز قولدارىنا الا ءبىلدى. ءبىرىنشى گولدى يۆو يليچەۆيچ سوعىپ ەسەپتى تەڭەستىرسە, ارتىنشا «قايراتتىڭ» سۇرمەرگەنى جەرەر گوۋ كومانداسىن العا شىعاردى. الماتىلىق ۇجىم ماتچ بارىسىندا كوپتەگەن مۇمكىندىكتەرىن ءتيىمدى پايدالانبادى. دەگەنمەن, العاشقى كەزدەسۋدە قارسىلاستارىنا جاۋاپسىز 6 گول سوققان ولاردىڭ كەلەسى كەزەڭگە قينالماي وتەتىنى بەلگىلى بولدى. سول سەبەپتى «قايرات» فۋتبولشىلارىنىڭ قازاقستان پرەمەر-ليگاسىنداعى كەلەسى ويىنعا كۇشتەرىن ۇنەمدەۋلەرىنە تولىق نەگىز بار ەدى.
ال ماتچ سوڭىنا قاراي «قايراتتىڭ» باس باپكەرى جاس ويىنشىلاردى تەكسەرىپ كوردى. سونىڭ ءبىرى «قايرات» اكادەمياسىنىڭ تۇلەگى مەن قازاقستان جاستار قۇراماسىنىڭ كاپيتانى ايبول ابىكەن اندرەي ءارشاۆيندى الماستىردى. گوۋ مەن يليچەۆيچتىڭ سوققان گولدارىنان كەيىن تابلوداعى ەسەپ وزگەرمەدى (1:2). وسىلايشا, ەكى ويىن ناتيجەسى بويىنشا قارسىلاس قاپاسىنا سەگىز گول سوعىپ, ءبىر گول جىبەرگەن «قايرات» ەۋروپا ليگاسىنىڭ ەكىنشى ىرىكتەۋ كەزەڭىنە جولداما الدى.
ايتا كەتەيىك, «قايراتتىڭ» ەكىنشى كەزەڭدەگى قارسىلاسى «سكەندەربەۋ» – «سان-حۋليا» كەزدەسۋىندە انىقتالماق.
سونداي-اق ەۋروپا ليگاسى ءبىرىنشى ىرىكتەۋ كەزەڭىنىڭ قارىمتا ويىنىندا پاۆلوداردىڭ «ەرتىس» كومانداسى بولگاريالىق «دۋناۆتان» باسىم ءتۇستى.
پاۆلوداردا بولگارلاردى 1:0 ەسەبىمەن تىزە بۇكتىرگەن «ەرتىس» ويىنشىلارى قارىمتا كەزدەسۋگە دە جوعارى دايىندىقپەن كەلگەندەرىن بايقاتتى. سىرت الاڭدا تاجىريبەلى كومانداعا قارسى ويىن وتكىزۋدىڭ قيىن ەكەنى بەلگىلى. دەگەنمەن, جەرلەستەرىمىز قورعانىستا دا, شابۋىلدا دا ساۋاتتى ويىن كورسەتىپ, جەڭىسكە جەتتى (0:2). ماتچتىڭ العاشقى مينۋتتارىندا «ەرتىستىڭ» ورتالىق قورعاۋشىسى ماريو ماسلاچ بۇرىشتامادان كوتەرىلگەن دوپتى قاقپاعا ءدال باعىتتاپ, كومانداسىن العا شىعاردى. ال ويىننىڭ اياقتالۋىنا بىرەر مينۋت قالعاندا جارتىلاي قورعاۋشى اسلان داراباەۆ ەسەپتى ەسەلەدى. وسىلايشا, ەكى كەزدەسۋدىڭ قورىتىندىسى بويىنشا قارسىلاسىنان 3:0 ەسەبىمەن باسىم تۇسكەن «ەرتىس» ەۋروپا ليگاسىنىڭ كەلەسى ىرىكتەۋ كەزەڭىنە ءوتتى.
ەۋروپا ليگاسى ءبىرىنشى ىرىكتەۋ كەزەڭىنىڭ قارىمتا كەزدەسۋىندە شىمكەنتتىڭ «ورداباسى» كومانداسى بوسنيالىق «شيروكي بريەگتى» قابىلدادى. الماتىنىڭ ورتالىق ستاديونىندا وتكەن ماتچتا ەسەپ اشىلمادى (0:0).
سىرت الاڭدا قارسىلاسىنا ەسە جىبەرگەن شىمكەنتتىكتەر قارىمتا ويىندا بىردەن شابۋىلعا ۇمتىلدى. ءبىرىنشى كەزدەسۋدە 2:0 ەسەبىمەن ۇتىلعان «ورداباسى» كومانداسىنا كەلەسى كەزەڭگە ءوتۋ ءۇشىن بارىنشا جىلدام گول سوعۋ قاجەت ەدى. الايدا, «شيروكي بريەگ» فۋتبولشىلارى قورعانىستا ساۋاتتى ويىن كورسەتىپ, قارسىلاسىنىڭ شابۋىلدارىنا توسقاۋىل قويا ءبىلدى.
ەكىنشى تايمدا پەترۋشين شاكىرتتەرى قىسىم كورسەتىپ, شابۋىلدارىن ۇدەتە ءتۇستى. كەزدەسۋدىڭ 49-مينۋتىندا كەرەمەت كومبيناتسيادان كەيىن ۆيتالي لي قاۋىپتى سوققى جاسادى. ال 54 مينۋتتا سول ۆيتالي لي تاعى ءبىر مۇمكىندىكتى ءمۇلت جىبەردى. سوڭىنا قاراي ويىن قىزي ءتۇستى. قوس قارسىلاس ءبىر-ءبىرىن اياماي, دورەكى وينادى. ناتيجەسىندە, سامات سماقوۆ جاراقات الىپ, الاڭنان كەتۋگە ءماجبۇر بولسا, ەركەبۇلان تۇڭعىشباەۆ بوسنيالىق فۋتبولشىنىڭ اياعىنان تەۋىپ, سارى قاعاز الدى. الما كەزەك شابۋىلداردىڭ بىرىندە قوناقتار المات بەكباەۆتىڭ قاقپاسىنىڭ الدىندا اسا قاۋىپتى جاعداي تۋعىزدى. ابىروي بولعاندا, «ورداباسىنىڭ» قورعاۋشىسى تەمىرلان ەرلانوۆ بوس قاقپادان دوپتى الىپ شىقتى. وسىلايشا, ءبىرىنشى كەزدەسۋدە 0:2 ەسەبىمەن جەڭىلگەن شىمكەنتتىكتەر قارىمتا ويىندا قارسىلاس قاقپاسىنان ساڭىلاۋ تابا المادى. ءسويتىپ, ەۋروپا ليگاسىنداعى جورىعىن ءبىرىنشى ىرىكتەۋ كەزەڭىنەن اياقتاۋعا ءماجبۇر بولدى.
