مەرەكەلىك شاراعا باسشىلىق ەتكەن ءماجىلىس توراعاسى كەز كەلگەن قوعامدا جۋرناليستەردىڭ ورنى ەرەكشە ەكەنىن اتاپ ءوتتى.
«ەلباسىمىز نۇرسۇلتان نازارباەۆ تاۋەلسىزدىك العان العاشقى كۇننەن باستاپ ءباسپاسوز سالاسىنىڭ دامۋىنا ەرەكشە كوڭىل ءبولىپ كەلەدى. مۇمكىندىگىنشە, بارلىق جاعداي جاسالىپ جاتىر. سونىڭ ناتيجەسىندە, ءبىزدىڭ ەلىمىزدىڭ بۇقارالىق اقپارات قۇرالدارى تەك قازاقستاندا عانا ەمەس, حالىقارالىق, ءتىپتى الەمدىك دەڭگەيدە دە جىلدام اقپارات الاتىن جانە تاراتاتىن دەڭگەيگە كوتەرىلدى», دەدى ن.نىعماتۋلين.
سونداي-اق, توراعا قالامگەر قاۋىم كۇن دەمەي, ءتۇن دەمەي ەڭبەك ەتىپ, تاۋەلسىز قازاقستانىمىزدىڭ دامۋىنا ولشەۋسىز ۇلەس قوسىپ كەلە جاتقانىن دا تىلگە تيەك ەتتى. سونىڭ ىشىندە, پارلامەنت ءماجىلىسىنىڭ زاڭ قىزمەتىن بۇكىل رەسپۋبليكاعا, ەلىمىزدىڭ ءاربىر ازاماتىنا جەتكىزۋدە جۋرناليستەردىڭ ەڭبەگى ۇشان-تەڭىز ەكەندىگىن ايتتى.
وسى ەسەلى ەڭبەككە دەگەن قۇرمەت رەتىندە وتكەن جىلى پالاتا سپيكەرىنىڭ تىكەلەي باستاماسىمەن ءماجىلىس جۋرناليستەرگە ارنالعان «پارلامەنت ءسوزى» سىيلىعىن تاعايىنداعان بولاتىن. ءماجىلىس توراعاسى اتاپ وتكەندەي, «پارلامەنت ءسوزى» اتاۋىنىڭ دا وزىندىك ءمان-ماعىناسى بار.
«ويتكەنى, سوزگە توقتاۋ, ءسوزدى باعالاۋ, ءسوزدى قادىرلەۋ – ءبىزدىڭ بابالارىمىزدان كەلە جاتقان قاسيەتتى جول. سىزدەر وسى ۇلكەن جولدىڭ زامانعا ساي قالىپتاسقان اقپاراتتىق-ناسيحات باعىتىن الىپ جۇرسىزدەر. سوندىقتان, سىزدەردىڭ بۇگىنگى ەڭبەكتەرىڭىز – ەرتەڭگى تاريح», دەدى ن.نىعماتۋلين.
شارا اياسىندا جۋرناليستەر اراسىندا ۇيىمداستىرىلعان وسى بايقاۋدا ۇزدىك دەپ تانىلعاندارعا پارلامەنت عيماراتىنىڭ بەينەسىندە ارنايى جاسالعان مۇسىندەر مەن ديپلومدار تابىس ەتىلدى. اتاپ ايتقاندا, «پارلامەنتتىك جۋرناليستيكانى دامىتۋعا قوسقان ۇلەسى ءۇشىن» اتالىمى بويىنشا «حالىق كەڭەسى» گازەتىنىڭ العاشقى رەداكتورى سارباس اقتاەۆ پەن «سوۆەتى كازاحستانا» گازەتىنىڭ العاشقى رەداكتورى يۋري تاراكوۆ, «ۇزدىك تەلەۆيزيالىق سيۋجەت ءۇشىن» اتالىمى بويىنشا «قازاقستان» تەلەارناسىنىڭ ءتىلشىسى ينديرا اسانوۆا مەن «حابار» تەلەارناسىنىڭ ءتىلشىسى اسحات نيازوۆ, «ۇزدىك باسپا جاريالانىمى ءۇشىن» نوميناتسياسى بويىنشا «ايقىن» گازەتىنىڭ ءتىلشىسى ايحان ءشارىپوۆ پەن «كازاحستانسكايا پراۆدا» گازەتىنىڭ ءتىلشىسى لاۋرا تۇسىپبەكوۆا ماراپاتتالدى. «ۇزدىك ينتەرنەت جانە راديو ماتەريالى ءۇشىن» اتالىمىنا «Zakon.kz» اقپارات اگەنتتىگىنىڭ ءتىلشىسى وكسانا سكيبان مەن قازاق راديوسىنىڭ ۇجىمى لايىقتى دەپ تابىلسا, «ارنايى رەپورتاج» اتالىمى «استانا» تەلەارناسىنىڭ ءتىلشىسى ايگۇل شايحيموۆا مەن «حابار 24» تەلەارناسىنىڭ جاڭالىقتار بولىمىنە تاپسىرىلدى.
ايرىقشا اتاپ وتەتىنىمىز, «ۇزدىك بەينە-سۋرەت ماتەريالى ءۇشىن» اتالىمى «ەگەمەن قازاقستان» گازەتىنىڭ ءفوتوتىلشىسى ەرلان وماروۆ پەن «كتك» تەلەارناسىنىڭ وپەراتورى ۆلاديسلاۆ ۆودنەۆكە بۇيىردى.
ەستەرىڭىزگە سالا كەتەيىك, «پارلامەنت ءسوزى» سىيلىعىن بەرۋ بويىنشا ارنايى كوميسسيا قۇرىلىپ, وعان ءماجىلىس دەپۋتاتى قۋانىش سۇلتانوۆ جەتەكشىلىك ەتتى. جۋرناليستەر قاۋىمىنان 80-گە جۋىق ماتەريال ءتۇسىپ, ولار مۇقيات ىرىكتەۋدەن وتكىزىلگەن.
نۇرلىبەك دوسىباي,
«ەگەمەن قازاقستان»
