«وبلىس بويىنشا 20-22 ماۋسىم ارالىعىندا 3858 مەكتەپ ءبىتىرۋشى ۇبت-عا قاتىستى. 20-21 ماۋسىم كۇندەرى جالپى سانى 2106 وقۋشى (قازاق تىلىندە - 1102, ورىس تىلىندە -1004) تەست تاپسىردى. ەرتەڭ 3 مىڭنان استام, بۇرسۇگۇنى 420 وقۋشى سىناقتان وتەدى دەپ جوسپارلانعان», - دەيدى وبلىستىق ءبىلىم باسقارماسىنىڭ مەكتەپكە دەيىنگى جانە جالپى ورتا ءبىلىم ءبولىمىنىڭ باس مامانى ءراۋيا حالەنوۆا.
ۇبت تاپسىرىلعان ءۇش كۇندە ءوڭىر بويىنشا جينالعان ەڭ جوعارى بال وسكەمەن قالاسىنداعى دارىندى بالالارعا ارنالعان مامانداندىرىلعان وبلىستىق مەكتەپ-ليتسەي-ينتەرناتىنىڭ وقۋشىسى ريزا بوكەيحانوۆانىڭ ەنشىسىندە. ونىڭ جيناعان بالى – 136. اتالعان ءبىلىم ورداسىنىڭ ديرەكتورى ايگۇل ابدۋلدينا شاكىرتىنىڭ بيولوگيا ءپانىن تاڭداعانىن, سەمەي مەن استانا قالاسىنداعى مەديتسينالىق اكادەميانىڭ بىرىنە وقۋعا تۇسپەك ويى بار ەكەنىن ايتتى.
ۇبت وبلىس ورتالىعىنداعى ەكى جوعارى وقۋ ورنىندا وتكىزىلىپ جاتىر. وبلىستىق ۇلتتىق بىرىڭعاي تەستىلەۋ ورتالىعىنىڭ جەتەكشىسى سايراش يسكاكوۆا س.امانجولوۆ اتىنداعى ۋنيۆەرسيتەتتەگى 21 ماۋسىمداعى العاشقى لەكتەگى تەستىلەۋ سىناعىنىڭ ءساتتى وتكەنىن, بۇل كۇنى 501 وقۋشى تەست تاپسىرعانىن حابارلادى.
ازامات قاسىم,
"ەگەمەن قازاقستان"
وسكەمەن
