1991 جىلدان باستاۋ العان حالىقارالىق تۋرنير بيىل 27-ءشى رەت ۇيىمداستىرعالى وتىر. عۇسمان قوسانوۆ مەموريالىنا ءۇندىستان, يران, باحرەين, سيريا, مالايزيا, اۋعانستان, تۇركىمەنستان, وزبەكستان, تاجىكستان, كەنيا جانە قازاقستاننىڭ اتلەتتەرى قاتىسادى. حالىقارالىق جارىسقا 200-دەن استام سپورتشى قاتىسادى دەپ كۇتىلۋدە. قازاقستان قۇراماسى ساپىنان ناقتى كىمدەردىڭ ونەر كورسەتەتىنى جارىستىڭ باستالۋىنا ءبىر كۇن قالعاندا انىقتالادى.
مەموريالدا قاتىسۋشىلار 30 جەكەلەگەن سايىس بويىنشا سىنعا تۇسەدى (15-ءى ەرلەر, 15-ءى ايەلدەر اراسىندا). سونىمەن قاتار, ەرلەر جانە ايەلدەر اراسىنداعى 4ح100, 4ح400 مەترگە جۇگىرۋ بويىنشا كوماندالىق ەستافەتا باعدارلاماسى قوسىلعان.
ۇيىمداستىرۋشىلار 100 مەترگە جۇگىرگەندەردىڭ ىشىندە ۇزدىك شىققان اتلەتكە ارنايى سىيلىق تاعايىنداپ وتىر (عۇسمان قوسانوۆ – ءدال وسى قاشىقتا وليمپيادا جۇلدەسىن ەنشىلەگەن العاشقى قازاق اتلەتى), ال دەمەۋشىلەردىڭ جۇلدەسى كورەرمەندەر اراسىندا ويناتىلادى.
