قازاق حالقى ءۇشىن اتادان بالاعا جالعاسقان ۇرپاقتار ساباقتاستىعى قاشاندا ايرىقشا مانگە يە. سەبەبى, كەز كەلگەن ادام الدىڭعى اعا بۋىننان كورگەنىن كوكەيگە ءتۇيىپ وسەدى. ابىلايحان قالىقۇلدىڭ دا قۇقىق سالاسىنا دەگەن قىزىعۋشىلىعى ادىلەتتىڭ اق تۋىن كوتەرگەن اتا جولىنان باستاۋ الادى. تەگىندە, قۇقىق سالاسىنىڭ كاسىبي مامانى بولۋ دەگەن اقجولتاي ارماننىڭ كىرپىشى سول وتباسىنداعى ءتالىمدى تاربيەدەن قالاندى. اتاسى ءومىرتاي كوپ جىلدار بويى بۇرىنعى كەلەس اۋداندىق سوتىنىڭ توراعاسى رەتىندە زاڭنىڭ ۇستەمدىك قۇرۋىنا قىزمەت ەتسە, اكەسى التاي بۇگىندە ورداباسى اۋداندىق سوتىنىڭ سۋدياسى. وسىنداي زاڭگەرلەر اۋلەتىنىڭ ءتالىمىن العان ول بۇگىندە ورداباسى اۋدانى اكىمدىگى اپپاراتىنىڭ زاڭ ءبولىمىنىڭ باس مامانى رەتىندە قىزمەت ەتىپ كەلەدى.
ول ورداباسى اۋدانىنىڭ ورتالىعى تەمىرلان اۋىلىندا جالپى ورتا مەكتەپتى بىتىرگەن سوڭ, شىمكەنت قالاسىنداعى م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنە وقۋعا ءتۇسىپ, ونى 2012 جىلى قۇقىقتانۋ ماماندىعى بويىنشا ءبىتىرىپ شىعادى.
اتا-بابالارىمىز «جاس كەلسە – ىسكە» دەپ, وسكەلەڭ ۇرپاعىنىڭ الداعى مۇراتىنا اقجول تىلەسكەن. ونىڭ دا وسى مۇرات جولىنداعى العاشقى باسپالداعى «جاستار پراكتيكاسى» باعدارلاماسى ارقىلى باستالدى. ەلباسىنىڭ ەلىمىزدەگى جاستارعا دەگەن قامقورلىعى تالاي جاستىڭ قاناتىن قاتايتىپ, ومىرگە دەگەن قۇلشىنىسىن ارتتىردى. ەلىنىڭ ەرتەڭى ءۇشىن ەڭبەك ەتسەم دەگەن تالاپتى جاستىڭ تالايىنا اتالعان باياندى باعدارلامانىڭ شاراپاتى ءتيدى. بۇل باعدارلاما بىرىنشىدەن, ءتورت جىل تەوريالىق بىلىمگە قانىققان جاستى تاجىريبەلىك تۇرعىدا شىنىقتىرسا, ەكىنشىدەن, جۇمىس تاپپاي سەندەلگەن وندىردەي جاستاردىڭ سەنىمىن نىعايتىپ, كەلەشەگىنە جول اشتى.
ا.قالىقۇل 2012 جىلى وسى «جاستار پراكتيكاسىنىڭ» جولداماسىمەن ورداباسى اۋداندىق ءماسليحات اپپاراتىندا ەڭبەك جولىن باستادى. ءسويتىپ, ەڭبەك جولىنىڭ العاشقى پاراقتارى اشىلدى. ال 2013 جىلدىڭ قازان ايىنا دەيىن وسى مەكەمەدە اۋدارماشى قىزمەتىن اتقاردى. سول جىلدىڭ قازان ايىندا مەملەكەتتىك سىناقتا وڭ ناتيجە كورسەتىپ, اۋدان اكىمى اپپاراتىنىڭ زاڭ بولىمىنە باس مامان رەتىندە جۇمىسقا قابىلداندى.
مەملەكەتتىك قىزمەتشى – حالىقتىڭ قىزمەتشىسى. العاش قىزمەتكە كىرىسكەننەن باستاپ, وسى عيبراتتى ساناسىنا بەرىك ورناتۋعا تىرىستى. سونىڭ ناتيجەسىندە ول مەملەكەتتىك قىزمەتشىگە جۇكتەلگەن مىندەتتەردىڭ ماڭىزدىلىعىن ۇعىنا ءتۇستى.
ەلباسىنىڭ «100 ناقتى قادام» ۇلت جوسپارىنىڭ بەرەرى مول. ونداعى باسىم باعىتتاردىڭ ءبىرى ەلىمىزدە كاسىبي مەملەكەتتىك اپپاراتتى قالىپتاستىرۋعا ارنالعان. ساناسى سەرگەك, ويى وزىق كاسىبي ماماندار – مەملەكەتتىك قىزمەتتىڭ لوكوموتيۆى ىسپەتتى. بۇقارا مەن بيلىك اراسىنىڭ دانەكەرى سانالاتىن مەملەكەتتىك قىزمەتشىلەردىڭ بۇل باعىتتاعى جۇمىسى ەرەن دەۋگە بولادى. رەفورما باستالعالى ءيىنى قانباعان تالاي ىستەردىڭ كوبەسى سوگىلىپ, ىلگەرىدەگى سارىتاپ كوزقاراستار جاڭا زامانعا بەيىمدەلۋ ۇستىندە. قازىر كەز كەلگەن مەملەكەتتىك قىزمەتشىنىڭ ءبىلىمى مەن بىلىگىنە ساي وسۋىنە, قىزمەتتە جوعارىلاۋىنا جاعداي قاراستىرىلعان. وقيمىن دەگەن تالاپتى قىزمەتشىلەرگە ەلىمىزبەن قاتار, شەتەلدىڭ الدىڭعى قاتارلى جوعارى وقۋ ورىندارىندا ءبىلىمىن جەتىلدىرۋىنە بولادى. ول ءۇشىن مەملەكەت بارلىق مۇمكىندىك قاراستىرۋدا. ابىلايحان قالىقۇل دا وسى تالاپقا ساي بولۋ ءۇشىن ءبىلىم مەن بىلىكتىلىكتى ۇشتاستىرىپ, حالىقتىڭ ۇدەسىنەن شىعۋدى الدىڭعى ورىنعا قويىپ وتىر.
ءبىزدىڭ كەيىپكەرىمىز وڭتۇستىك قازاقستان وبلىسى كولەمىندە وتكىزىلەتىن ءتۇرلى شارالارعا بەلسەنە قاتىسىپ, تاجىريبەسىن ارتتىرا تۇسۋدە. وسىنىڭ ارقاسىندا ول «قازاقستان-شىمكەنت» تەلەارناسىنىڭ «ايتارىم بار» حابارىنا قاتىسىپ, مەملەكەتتىك قىزمەتشىلەردى اتتەستاتتاۋ جونىندەگى وزەكتى ماسەلەلەر تۋرالى ۇتىمدى ويلارىن ءبىلدىردى. مۇنداي ەركىن سۇحباتتار ءاربىر مەملەكەتىك قىزمەتشىنىڭ تىنىسىن اشىپ, كاسىبىنە دەگەن قۇشتارلىعىن ارتتىرا تۇسەرى ءسوزسىز.
سايىپ كەلگەندە, ەلگە قىزمەت – كەلەلى مىندەت. وسىعان ساي بولۋ ءاربىر مەملەكەتتىك قىزمەتشىنىڭ پارىزى بولماق. وسى ورايدا «ۇزدىك مەملەكەتتىك قىزمەتشى» كونكۋرسىنىڭ ماڭىزى ايرىقشا. اتالعان كونكۋرستىڭ «مەملەكەتتىك ورگانداردىڭ قۇقىقتىق جانە كادر قىزمەتىن قامتاماسىز ەتۋىن باسقارۋ» نوميناتسياسىن جەڭىپ العان ابىلايحان قالىقۇل الداعى ۋاقىتتا دا وسى باعىتىنان تايماي, وزىنە جۇكتەلگەن مىندەتتى ابىرويمەن ورىنداي بەرەتىنىنە سەنىمدى.
قورىتا ايتقاندا, ەلباسى مەملەكەتتىك قىزمەتشىلەرگە ەرەكشە سەنىم ارتىپ وتىر. سول سەنىمدى اقتاۋ – ابىلايحان سەكىلدى جاس ماماندارعا ايرىقشا امانات جۇكتەيدى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
