تاعى ءبىر ءوزىمىز كۋا بولعان كورىنىس «نۇرلى جول» شەڭبەرىندە شۇبارقۇدىق اۋىلىنىڭ سۋ قۇبىرىن جاڭارتۋ جۇمىستارى باستالىپتى. سوعان سايكەس 23,1 شاقىرىم اۋماقتاعى سۋمەن جابدىقتاۋ جەلىلەرى جاڭارتىلماق. ال قازىر قولدانىستاعى سۋ قۇبىرى سوناۋ قىرقىنشى جىلدارى سالىنعان ەكەن. راس, اتالعان گيدروينجەنەرلىك نىسان جەتپىسىنشى جىلدارى ودان ءارى كەڭەيتىلگەن.
ايتسە دە وعان قازىرگى كۇنگە دەيىن كۇردەلى جوندەۋ جۇرگىزىلمەي كەلىپتى. سوندىقتان سۋ قۇبىرى جەلىلەرىنىڭ توزۋى سالدارىنان جارىلىستار دا ءجيى ورىن الا باستاپتى. مۇنداي جاعداي ءوز كەزەگىندە اۋىز سۋدىڭ ساپاسىنا ءارى ونىڭ ءۇزىلىسسىز بەرىلۋىنە سالقىنىن تيگىزگەن. بۇل سۋ قۇبىرى 14 مىڭعا جۋىق تۇرعىنى بار اۋدان ورتالىعىن اكىمشىلىك عيماراتتار مەن دەنساۋلىق ساقتاۋ ءبىلىم بەرۋ نىساندارىن اۋىز سۋمەن قامتيتىنىن ەسكەرسەك «نۇرلى جول» باعدارلاماسىنىڭ تيگىزگەن شاپاعاتى تەرەڭدەي تۇسەدى. جۇمىستىڭ جالپى قۇنى 557 ميلليون تەڭگەنى قۇرايدى.
تەمىر اۋداندىق تۇرعىن ءۇي, كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ باسشىسى الماس جاقسىلىقوۆتىڭ ايتۋىنشا, وتكەن جىلى «نۇرلى جول» شەڭبەرىندە اقتاي اۋىلى ورتالىقتاندىرىلعان اۋىز سۋ قۇبىرىنا قوسىلىپتى. ونىڭ ۇزىندىعى 15 شاقىرىمعا جۋىق. جالپى اۋدان اۋماعىنداعى اۋىلدار تۇگەلگە دەرلىك ورتالىقتاندىرىلعان اۋىز سۋ جۇيەسىنە قوسىلعانى اجەپتاۋىر جەتىستىك. بۇل مىسالدار اۋدان تۇرعىندارى اۋىز سۋمەن تۇگەلگە دەرلىك قامتىلعانىنا دالەل. دەگەنمەن جاز ايلارىندا اۋىز سۋ تاپشىلىعىنا بايلانىستى ماسەلەلەر تۋىنداپ قالاتىن كورىنەدى. وسى كەزدە سۋعا سۇرانىس تا 3-4 ەسە ءوسىپ شىعا كەلەدى ەكەن. مۇنىڭ سەبەبىن ءبولىم باسشىسى تۇرعىندار تاراپىنان اۋىز سۋدىڭ ۇنەمدى, ءارى ءتيىمدى تۇردە جۇمسالماۋىمەن, ءسويتىپ سۋ ىسىرابىنا جول بەرىلمەۋىمەن ءتۇسىندىرىپ بەردى. ءبىز تەمىر اۋدانىنداعى سۋ ماماندارىمەن كەزدەسۋ كەزىندە اۋىز سۋ ماسەلەلەرىنە قاتىستى جوبالار جاسالعان كەزدە حالىق سانى جانە ءوسىمى, سوعان بايلانىستى بارلىق تۇرمىستىق قاجەتتىلىكتەر ەسكەرىلەتىنىن كوڭىلگە ءتۇيىپ ورالدىق.
تەمىر اۋدانى
