مۇنداعى وقۋشىلاردىڭ جىل بويى دەمالۋ لاگەرى اقتوبە وبلىسىنىڭ اكىمى بەردىبەك ساپارباەۆتىڭ باستاماسىمەن ءارى تىكەلەي قولداۋىمەن وتكەن جىلى قازان ايىندا قۇرىلعان. ءارى وعان «اسەم» دەگەن ايتۋعا دا, جازۋعا دا وتە ىڭعايلى, ءان سوزىندەي ەستىلەتىن تاماشا اتاۋ بەرىلگەن.
ەلىمىزدە ەشقانداي بالاماسى جوق جارقىن جوبا مەملەكەت-جەكەمەنشىك ارىپتەستىك اياسىندا ىسكە قوسىلعان. ونىڭ باستى بازالىق تىرەگى وبلىستاعى «اقتوبە-شىعىس» لاگەرى بولىپ تابىلادى. ءبىر اۋىسىمدا مۇندا دەمالاتىن ۋاقىت 12 كۇنگە ەسەپتەلگەن. ءارى وسى ءبىر اۋىسىم ارالىعىندا «اسەم» 115 جەتكىنشەكتى قابىلداي الادى. ولاردىڭ قاتارىن حالىقارالىق جانە رەسپۋبليكالىق وليمپيادالاردا كوش باسىنان كورىنگەندەر قۇرايدى. عىلىمي جانە سپورتتىق جارىستاردا توپ جارعاندار دا وسى لەكتە. شىعارماشىلىق كونكۋرستاردىڭ جەڭىمپازدارىن دا وسى توپتان تاباسىز. قىسقاسى «اسەمدە» بيىلعى جىلدىڭ سوڭىنا دەيىن 3220 بالا دەمالادى دەپ كۇتىلۋدە.
وسى ورايدا ونىڭ قىزمەتى كەشەندى كوزقاراسپەن ۇشتاسىپ جاتقانىن ايتقان ءجون. ياعني, لاگەردىڭ ۇيىمداستىرۋ جۇمىستارى تەك دەمالىسپەن شەكتەلمەيدى. سونىمەن قاتار كەلۋشىلەردىڭ جالپى ءبىلىم بەرۋ پاندەرى بويىنشا بىلىمدەرىن تەرەڭدەتۋگە دە تولىق مۇمكىندىكتەرى بار. جىل بويى جۇمىس جاسايتىن لاگەرگە «سىمبات» جەكەمەنشىك مەكتەبى دە ارىپتەس رەتىندە ىسكە كىرىسكەن. بۇعان قوسا «اسەمدە» وقۋشىلاردىڭ جان-جاقتى ۇيلەسىمدى تۇردە دەمالۋىنا دا بارلىق جاعداي تۋعىزىلعان.
