دامۋ قارقىنى وسىلاي كەتە بەرسە, جىل سايىن ءبىلىم تولىقتىرىپ وتىرۋ قاجەتتىگى تۋارى حاق. بۇل جونىندە ەلباسى نۇرسۇلتان نازارباەۆ ءار جىلعى جولداۋى مەن باعدارلى سوزدەرىندە ايتىپ كەلە جاتىر. وسى ماسەلە «نازارباەۆ ۋنيۆەرسيتەت» بولعان القالى جيىندا جان-جاقتى تالقىعا ءتۇستى.
باسقوسۋدىڭ تاقىرىبى ء«ومىر بويى ءبىلىم الۋ: تۇراقتى دامۋ مۇددەسىندە ۇزدىكسىز ءبىلىم بەرۋ» دەپ اتالادى. مۇنداي كونفەرەنتسيا بۇدان بۇرىن دا وتكەن ەدى. ون بەسىنشى رەت بولعان جيىننىڭ نەگىزگى ۇيىمداستىرۋشىسى ى.التىنسارين اتىنداعى ۇلتتىق ءبىلىم اكادەمياسى ەكەنىن ەسكە سالا كەتسەك دەيمىز. كونفەرەنتسيا جۇمىسىنا فرانتسيا, رەسەي, پولشا, يتاليا, بەلارۋس, گونكونگ, وزبەكستان عالىمدارى, وتاندىق ءبىلىم بەرۋ مەكەمەلەرىنىڭ وكىلدەرى, وبلىستار مەن استانا جانە الماتى قالالارى ءبىلىم باسقارمالارىنىڭ, سونىمەن قاتار جوعارى وقۋ ورىندارىنىڭ, كادرلار بىلىكتىلىگىن ارتتىرۋ جانە ولاردى قايتا دايارلاۋ ينستيتۋتىنىڭ, كوللەدجدىڭ وقىتۋشىلارى, مەكتەپ مۇعالىمدەرى قاتىستى.
الەمدىك دەڭگەيدەگى ۇزدىكسىز ءبىلىم بەرۋ جونىندەگى ۇيىمداستىرۋ كوميتەتىنىڭ قۇرامىنا بۇۇ-نىڭ ۇكىمەتارالىق ۇيىمى, يۋنەسكو, ەۋرازيالىق ەكونوميكالىق قوعامداستىعىنىڭ پارلامەنتارلىق اسسامبلەياسى, يۋنەسكو-نىڭ ۇزدىكسىز ءبىلىم بەرۋ ينستيتۋتى (گەرمانيا), گونكونگ يۋنەسكو-يۋنەۆوك ورتالىعى, رەسەي ءبىلىم اكادەمياسى, تاعى باسقا مەكەمەلەر كىرەدى. قازاق ەلىندە وتكەن مەرەيتويلىق كونفەرەنتسيا سانكت-پەتەربۋرگتە بولعان جيىننىڭ زاڭدى جالعاسى. كونفەرەنتسيانىڭ نەگىزگى ماقساتى – تۇراقتى دامۋ مۇددەسىندە ۇزدىكسىز ءبىلىم بەرۋدىڭ الەمدىك ماسەلەلەرىن تالقىلاۋ جانە حالىقارالىق دەڭگەيدە پىكىر الماسا وتىرىپ, ونىڭ وڭ ناتيجەلەرىن ىسكە اسىرۋ.
القالى جيىننىڭ اشىلۋىندا ءبىلىم جانە عىلىم مينيستر-
لىگىنىڭ جاۋاپتى حاتشىسى ارىن ورساريەۆ ءبىلىم بەرۋ ىسىنە جان-جاقتى توقتالىپ, ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» حالىقتىق جوباسى بويىنشا جۇمىستار جۇرگىزىلىپ جاتقانىن, اسىرەسە ونى ءبىلىم سالاسىندا جۇيەلى جۇرگىزۋ قولعا الىنعانىنا ناقتى دايەكتەر كەلتىردى. ءماجىلىس دەپۋتاتى ج.نۇرمانبەتوۆا, ى.التىنسارين اتىنداعى ءبىلىم اكادەمياسىنىڭ پرەزيدەنتى ج.جىلباەۆ, قازاق ەلىندە جۇمىسىن باستاعالى وتىرعان ەكسپو-2017 كورمەسى قارساڭىندا بولعان بۇل كونفەرەنتسيا ەلىمىزدىڭ الەۋەتىن كورسەتەتىنىن جان-جاقتى باياندادى. ال پلەنارلىق ماجىلىستە «نازارباەۆ زياتكەرلىك مەكتەپتەرى» دببۇ باسقارما ءتورايىمى ك.ءشامشيدينوۆا زاماناۋي الەم تالابى كونتەكسىندە ءبىلىم مازمۇنىن جاڭارتۋ تۋرالى بايلامدارىن ورتاعا سالدى. م.ك.امموسوۆ اتىنداعى سولتۇستىك شىعىس فەدەرالدى ۋنيۆەرسيتەتىنىڭ رەكتورى, اكادەميك ەۆگەنيا ميحايلوۆا (رەسەي) ءبىلىم ورداسىنداعى يننوۆاتسيالىق دامىتۋدىڭ زياتكەرلىك پلاتفورماسىنا توقتالسا, بەلارۋس رەسپۋبليكاسىنان كەلگەن عالىم ناتاليا پەرەۆالوۆا جالپى ورتا ءبىلىم بەرۋ مازمۇنىن جاڭارتۋ, ونى عىلىمي نەگىزدە جۇزەگە اسىرۋ بويىنشا ءوز تاجىريبەلەرىن ورتاعا سالدى. سول سەكىلدى «بارشاعا ارنالعان ۇزدىكسىز ءبىلىم» قوعامدىق بىرلەستىگىنىڭ پرەزيدەنتى, پروفەسسور نيكولاي لوبانوۆ, رەسەي ۇزدىكسىز كاسىپتىك ءبىلىم بەرۋ جۇيەسىندەگى ادامنىڭ ەركىندىگى مەن تاۋەلدىلىگىنە قاتىستى ماسەلەلەردى قوزعادى.
سونىمەن, ەكى كۇنگە سوزىلعان ۇزدىكسىز ءبىلىم بەرۋگە قاتىستى وتكەن جيىندا بىرنەشە ۇسىنىس قابىلدانىپ, ءار ازاماتقا ارنايى سەرتيفيكاتتار تاپسىرىلدى.
سۇلەيمەن مامەت,
«ەگەمەن قازاقستان»
