ول ءوزى تەك قىلقالام شەبەرى عانا ەمەس, ءبىر باسىنا بىرنەشە قاسيەت قاتار قونعان امبەباپ ادام ەدى. جيھانگەز, ارحەولوگ, فيلوسوف-ميستيك, عالىم, تاعىسىن تاعىلار. ۇزىن سانى 7000 كارتينا جازىپ, 30-دان استام ادەبي ەڭبەك قالدىرعان نيكولاي كونستانتينوۆيچ بەيبىتشىلىكتى بەكەمدەۋ باعىتىندا بەلسەندى جۇمىس ىستەپتى. اتاپ ايتقاندا, جەر جۇزىنە جايىلعان رەريح پاكتىسىنىڭ اۆتورى, «مادەنيەت ارقىلى بەيبىتشىلىككە» جانە «بەيبىتشىلىك تۋى» حالىقارالىق قوزعالىسىنىڭ نەگىزىن سالۋشى.
جۋىردا مادەنيەت جانە سپورت مينيسترلىگىنىڭ تاپسىرىسىمەن, بۇۇ-نىڭ ەلىمىزدەگى ميسسياسىنىڭ, سونداي-اق قازاقستان مەن اقش ەلشىلىكتەرىنىڭ قولداۋىمەن استانادا «شامبالانى ىزدەۋ جولىندا: نيكولاي رەريحتىڭ نيۋ-يوركتەگى مۋزەيىنەن الىنعان جاۋھارلار» اتتى كورمە اشىلدى. مۇحيتتىڭ ارعى جاعىنان جەتكەن جادىگەرلەر توپتاماسىنا ساياحاتشى-سۋرەتشىنىڭ ورتالىق ازيانى ارالاعان ساپارىندا سالعان 37 تۋىندىسى تاڭدالىپتى. بۇل ەكسپەديتسيانىڭ سوقتىقپالى-سوقپاقسىز سان تاراۋ جولدارى شىعىس قازاقستان ءوڭىرىن باسىپ وتكەنى بارىمىزگە ءمالىم.
ۇلتتىق مۋزەيدىڭ زالدارىنا قويىلعان كورنەكتى كارتينالار كوز ءسۇيسىنتىپ, كوڭىل تولقىتادى ەكەن. التاي مەن گيمالايدىڭ تاماشا پەيزاجدارى تىم تارتىمدى. سۇلۋلىق تۇنعان كورىنىستەردە اسقاق شىڭدارى اسپانداعى اقشاڭقان بۇلتتارمەن استاسقان الىپ تاۋلار, ارناسىنان اسىپ-تاسىعان اساۋ وزەندەر, قيال-عاجايىپ ەرتەگىلەرىنىڭ ەلەسىندەي جۇمباق بەينەلەر سانانى سان ساققا جۇگىرتىپ, استارلى ويلارعا جەتەلەيدى. ەڭ باستىسى, وسىناۋ قۇندى جادىگەرلەردىڭ ەشقايسىسى بۇرىن سوڭدى باسقا مەملەكەتتەردە كورسەتىلمەپتى. باياعىدا گاگارين كوسموستان ورالعاندا القالاپ الدىنان شىققان جۋرناليست اعايىندار: «ال, باتىر, انا جاقتان نە كوردىڭ؟ دەمەي مە. سوندا تۇڭعىش عارىشكەر توسىلماستان تاق ەتكىزىپتى. «رەريح سۋرەتتەرىندەگىدەي كوركەمدىك كوردىم!», دەپ.
ايتسا ايتقانداي-اق ەكەن. تالعامدارىنا تاتيتىنداي دۇنيەلەرگە تامسانىپ تۇرعان كورەرمەندەردى ءبىز دە كورمەدەن كوپ كەزدەستىردىك.
كورمەگە كەلۋشىلەر الدىندا كوسىلىپ ءسوز سويلەگەن رەسەي-امەريكا قورىنىڭ پرەزيدەنتى مارينا كوۆالەۆا اتالمىش شارا ەكى ەل اراسىنداعى مادەني-رۋحاني بايلانىستاردىڭ ءبىر بەلگىسى ەكەنىن العا تارتىپ, تاۋەلسىز قازاقستاننىڭ پرەزيدەنتى نۇرسۇلتان نازارباەۆتىڭ الەمدە بەيبىتشىلىك ورناتۋ جولىنداعى ەرەن ەڭبەگى مەن باعالى باستامالارى حالىقارالىق ارەنادا قىزۋ قولداۋعا يە بولىپ جۇرگەنىن, قازاق باسشىسىنىڭ ۇستانىمى بۇل جاعىنان رەريح يدەيالارىمەن ۇندەسەتىنىن اتاپ ءوتتى.
تالعات باتىرحان,
«ەگەمەن قازاقستان»
