ەلىمىزدەگى ەڭ تانىمال, ەڭ ۇزدىك جايدارمانشىلاردىڭ باسىن قوسقان كەشتە ەكى توپ ونەر كورسەتتى. «اعالار» جانە «ىنىلەر» دەپ شارتتى تۇردە اتاۋعا يە بولعان توپتاردىڭ بىرىندە – ارداگەر جايدارمانشىلار باس قوسسا, ەكىنشىسى توپتا قازىرگى كەزدە جوعارى ليگادا ونەر كورسەتىپ جۇرگەندەردەن, بارلىعى جيىرماعا جۋىق توپتىڭ وكىلدەرى ساحناعا شىقتى.
ويىن جەڭىل, ەركىن تۇردە ءوتتى دەۋگە بولادى. جايدارمانشىلار ءتۇرلى تاقىرىپتاردى قامتۋعا تىرىسقان ەكەن. جاستاردىڭ ماسەلەسىنەن باستاپ, الەمدىك وقيعالار دا, ءتىپتى قازىر ءوتىپ جاتقان ەكسپو كورمەسى دە ءجيى ازىلگە ىلىگىپ وتىردى.
جىل بويى بىرىنشىلىكتە ونەر كورسەتىپ, ساحنادا جۇرگەن «ىنىلەر» قۇراماسى بابىندا ەكەن. اسىرەسە, «سالەمدەسۋ» جانە «كورىنىستە» جاقسى كورىنە ءبىلدى. «ۇزدىك ويىنشىعا» بەرىلەتىن كۋبوك تا وسى قۇرامداعى سىرداريالىق مارات سارسەنباەۆقا بەرىلگەن بولاتىن.
ال ساحنادان الىستاڭقىراپ كەتكەن ارداگەرلەردىڭ دايىندىعى از ەكەنى كوزگە كورىنىپ قالدى. الدە, جاتىرقاپ قالدى ما, كىم ءبىلسىن؟! بىراق تاجىريبەلى جىگىتتەر وسالدىق تانىتقان جوق. ويىن سوڭىندا قازىلار القاسىنىڭ شەشىمىمەن ەكى توپتىڭ ۇپايى تەڭ بولىپ شىعۋى دا, سونى كورسەتكەندەي. ۇلكەندى سىيلايتىن ءداستۇر بويىنشا, ۇلكەن كۋبوك «اعالار» كومانداسىنا تابىس ەتىلدى.
قازىلار القاسى دەمەكشى, جايدارمانشىلاردىڭ ونەرىن باعالاعانداردىڭ وزدەرى دە اتىنان ات ۇرىككەندەي. ويىن باستالاردا بارشا جايدارمانشىلارعا ساتتىلىك تىلەپ, «جايدارماننىڭ» ماڭىزدىلىعىن تىلگە تيەك ەتكەن ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ مىرزا قازىلار القاسىنىڭ قۇرامىنا قوسىلدى. سونداي-اق, پارلامەنت ءماجىلىسىنىڭ دەپۋتاتى باقتيار ماكەن, تەلەجۇرگىزۋشى بەرىك ءۋالي, قوعام قايراتكەرى مۇرات ابەنوۆ, تەاتر جانە كينو اكتەرى ءادىل احمەتوۆ ويىنعا قازىلىق ەتتى.
ءبىر مۇشەل بويى جاستاردىڭ قىزىعۋشىلىعىنا بولەنىپ, تەلەارناعا شىققان سوڭ دا, رەيتينگتىڭ تورىندە تۇرعان «جايدارمان» ويىنى ەندىگى حالىقتىق جوباعا اينالىپ ۇلگەردى. بۇل جەردە تەك قانا ءازىل-سايىس, قۋاقى قالجىڭ ەمەس, جاستارمەن بايلانىستىراتىن, ولاردىڭ مۇقتاجدىعى مەن ورەسىن انىقتايتىن الاڭ دەپ قاراستىراتىن ءسات كەلگەن سەكىلدى. ءدال قازىرگى ساتتە وتىز مىڭنان استام جاس پەن ءجاسوسپىرىم جايدارمان ويناپ ءجۇر. بۇل – ۇلكەن كۇش. نەبارى 13 جىلدىڭ ىشىندە وسىنشا كۇشكە يە بولعان «جايدارماننىڭ» الار بيىگى مەن اسۋى الدا.
ەندەشە, بار جاناردى جاۋلاعان «جايدارماننىڭ» تۋعان كۇنى قۇتتى بولسىن!
راۋان قايدار,
«ەگەمەن قازاقستان»
